اقش پرەزيدەنتى باراك وباما اق ءۇي باسشىلىعىنداعى سوڭعى رەسمي ءسوزىن سويلەدى.
چيكاگودا حالىق الدىنا شىققان وباما الدىمەن امەريكالىقتاردى دەموكراتيانى قورعاۋعا شاقىردى.
"قاي جاعىنان الىپ قاراساق تا, امەريكا سەگىز جىل بۇرىنعىدان الدەقايدا جاقسى جانە قۋاتتى ەل. ەگەر ءبىز دەموكراتيانىڭ قادىرىن تۇسىنە المايتىن بولساق, بۇل قۇندىلىعىمىزدان ايىرىلىپ قالۋىمىز مۇمكىن" دەدى اق ءۇيدىڭ قازىرگى باسشىسى.
ايتا كەتەيىك, ەندى 2008 جىلدان بەرى بيلىكتە بولعان اق ءۇيدىڭ العاشقى قارا ءناسىلدى 55 جاسار پرەزيدەنتىنىڭ ورنىنا 20 قاڭتار كۇنى رەسمي تۇردە دونالد ترامپ كەلەدى. باسىلىمنىڭ حابارلاۋىنشا, رەسپۋبليكاشىل پرەزيدەنت وبامانىڭ ساياساتىنىڭ كوپتەگەن تۇسىن وزگەرتپەك. وباما بيلىكتىڭ اۋىسۋ كەزىندە ەل ىشىندە بەيبىتشىلىكتىڭ ساقتالۋى امەريكالىق دەموكراتيانىڭ تاعى ءبىر ەرەكشەلىگى ەكەنىن ايتتى. سونىمەن قاتار باراك وباما امەريكالىق دەموكراتياعا قاۋىپ ءتوندىرۋى مۇمكىن ءۇش نارسەنى اتادى: الەۋمەتتىك تەڭسىزدىك, ناسىلدىك ءبولىنۋ جانە قانداي دا ءبىر ەرەكشەلىكتەردى العا تارتا وتىرىپ قوعامنىڭ جىك-جىككە ءبولىنۋى. اقش پرەزيدەنتى بۇگىنگى جاستاردىڭ جىگەرلى ەكەنىن, ال چيكاگو ءوزىنىڭ دە جاستىق شاعى وتكەن قالا ەكەنىن ايتتى.