بۇگىن ۇكىمەت وتىرىسىندا قر پرەمەر-ءمينيسترى باقىتجان ساعىنتاەۆ قازاقستانداعى ىشكى اۋە تاسىمالدارىنداعى تاريفتەرگە قاتىستى تەكسەرۋدى تاپسىردى.
«اۆياتسيا سالاسىندا اۋقىمدى جۇمىستار ىسكە اسىرىلۋدا. وسى رەتتە ترانزيتتىك الەۋەت ارتىپ كەلەدى, ياعني استانا ارقىلى وتە كوپ رەيستەر شىعىپ جاتىر. بۇگىندە ەۋروپاعا, ونىڭ ىشىندە پاريجگە قاراي باعداردا كوبىنەسە قىتايلىق تۋريستەر ءبىزدىڭ رەيستەردى پايدالانۋدا. بۇل وتە جاقسى كورسەتكىشتەر, بىراق, سونىمەن بىرگە ەل ىشىندەگى تاريفتەرگە قاتىستى ماسەلە بار ەكەنىن بايقاپ وتىرمىز. اسىرەسە, استانا-الماتى باعدارىنا قاتىستى. بۇل تۇرعىدا قر ۇلتتىق ەكونوميكا مينيسترلىگى ءتيىستى زەرتتەۋ شارالارىنا كىرىسكەن بولاتىن», دەدى ب. ساعىنتاەۆ.
ءوز كەزەگىندە قر ۇلتتىق ەكونوميكا ءمينيسترى قۋاندىق بيشىمباەۆ كەيبىر باعىتتار بويىنشا ەداۋىر تاريفتەر ءوسىمى بار ەكەنىن جەتكىزدى. وسى ورايدا ىشكى اۋە تاسىمالىنداعى استانا-ورال, استانا-الماتى باعدارلارىندا بۇنداي جاعداي بايقالىپ وتىرعان كورىنەدى.
قازىرگى كەزدە تابيعي مونوپوليالاردى رەتتەۋ كوميتەتى تاسىمالدىڭ وزىندىك قۇنىن انىقتاۋعا تىرىسۋدا. «وكىنىشكە قاراي, كومپانيالار رەيستەردى ورىنداۋدىڭ وزىندىك قۇنىنا بايلانىستى مالىمەتتەردى بەرۋدەن باس تارتۋدا. «سامۇرىق-قازىنا» ديرەكتورلار كەڭەسىنىڭ مۇشەسى رەتىندە رەسمي تۇردە قورعا, سايكەسىنشە ونىڭ ەنشىلەس كومپانياسىنا رەيستەردى ورىنداۋداعى وزىندىك قۇنىنا قاتىستى بارلىق ەسەپ-قيساپتى ۇسىنۋ تۋرالى ساۋال جولداعىم كەلەدى. وسى مالىمەتتەردەن كەيىن باعانى ءوسىرۋ قانشالىقتى نەگىزدى ەكەنى جايىندا شەشىم شىعارۋعا بولادى»-دەدى ق. بيشىمباەۆ. بۇل تۇرعىدا ۇكىمەت باسشىسى ب. ساعىنتاەۆ وسى باعىتتاعى شارالاردى سوڭىنا دەيىن جەتكىزىپ, زاڭ بۇزۋشىلىقتار ورىن العان جاعدايدا زاڭناماعا سايكەس, ءتيىستى شەشىم قابىلداۋ كەرەكتىگىن جۇكتەدى.