وبلىس اكىمدىگىندە وتكەن توعىز ايدىڭ قورىتىندىلارىنا ارنالعان القالى جيىنعا بارلىق دەڭگەيدەگى اكىمدەر, مەملەكەتتىك ورگانداردىڭ باسشىلارى, شاعىن جانە ورتا بيزنەس وكىلدەرى, ءىرى كومپانيالاردىڭ جەتەكشىلەرى قاتىستى. وندا ەكونوميكانىڭ ەگىز سالاسى – ونەركاسىپ پەن اۋىل شارۋاشىلىعىنىڭ دامۋ باعىتتارى جانە وزەكتى ماسەلەلەرى تالقىلانىپ, اڭگىمە وزەگىنە اينالدى.
جيىندى كىرىسپە ءسوز سويلەپ اشقان وبلىس اكىمى بەردىبەك ساپارباەۆ قاتىسۋشىلار نازارىن ءالى دە بولسا نەگىزگى سالالاردىڭ كورسەتكىشتەرى تومەن ەكەندىگىنە, مۇمكىندىكتەر مەن رەزەرۆتەردىڭ ءتيىمدى پايدالانىلماي وتىرعانىنا, ەكونوميكالىق تالداۋدىڭ, باقىلاۋ مەن تيىمدىلىكتى ەسەپتەۋدىڭ جەتىسپەيتىندىگىنە اۋداردى.
ءوڭىردىڭ ونەركاسىپ سالاسىنداعى اتقارىلعان جۇمىستار تۋرالى بايانداعان وبلىس اكىمىنىڭ ورىنباسارى اسقار بياحمەتوۆ ەسەپتى مەرزىم ىشىندە ونەركاسىپ ونىمدەرىن ءوندىرۋ كولەمى 844,2 ميلليارد تەڭگەنى قۇراعانىن, ءونىم كولەمى يندەكسى وتكەن جىلدىڭ وسى كەزەڭىمەن سالىستىرعاندا, 97,5 پايىز بولعانىن جەتكىزدى. اتالعان كورسەتكىشتەردىڭ تومەندەۋى شالقار, مۇعالجار, تەمىر, بايعانين جانە حرومتاۋ اۋداندارىندا ورىن الىپ وتىرعانىن اتاپ ءوتتى. ناقتى ايتقاندا, مۇناي, مەتالل رۋدالارىن وندىرۋدە, تاۋ-كەن ونەركاسىبىنىڭ باسقا دا سالالارىندا, تاۋ-كەن ءوندىرىسى ونەركاسىبى سالاسىنا تەحنيكالىق قىزمەت كورسەتۋ باعىتىندا بۇرىنعىمەن سالىستىرعاندا باياۋلىق بايقالۋدا. وڭدەۋشى ونەركاسىپتە 245,1 ميلليارد تەڭگەنىڭ ءونىمى ءوندىرىلدى.
ۇستىمىزدەگى جىلى وڭىرلىك كاسىپكەرلىكتى قولداۋ كارتاسى اياسىندا جالپى سوماسى 6,5 ميلليارد تەڭگەگە 4 جوبانى يگەرۋ قولعا الىندى. وسى ورايدا, ءۇش جۇزدەن استام جۇمىس ورىندارى قۇرىلدى. «سايلان اقتوبە» جشس «حروميكس» پيگمەنتتى-تولتىرعىش پەن ماگنەزيالدى ۇنتاقتىڭ 6 مىڭ تونناسىن شىعارۋ مۇمكىندىگىنە يە تسەح جوباسىن قولعا الدى. «تەحنودوم ست-كZ» جشس تىركەمە تەحنيكاسىن شىعاراتىن زاۋىتتى كەڭەيتۋدە. بۇل جوبانىڭ قۇنى 600 ميلليون تەڭگە قۇرايدى. «قازينرۋسسترەيدينگ» جشس-ءنىڭ از توننالى مۇناي وڭدەۋشى زاۋىتى مەن نەمىس تەحنولوگياسى بويىنشا جۇمىس ىستەيتىن ءۇي قۇرىلىسى كومبيناتى ءوڭىر ونەركاسىبىن دامىتۋعا سەرپىن بەرەدى دەپ كۇتىلۋدە.
شاعىن جانە ورتا بيزنەس دامىتىلۋدا. بۇل سالادا ەڭبەك ەتەتىندەر سانى 51 مىڭ بىرلىكتى قۇرايدى, ال بولشەك تاۋار اينالىمى كولەمى 215,7 ميلليارد تەڭگەگە جەتتى.
وبلىس بويىنشا جۇمىسسىزدىق دەڭگەيى قازىرگى ۋاقىتتا 4,9 پايىزدى قۇراپ وتىر. 21672 ادام جۇمىسپەن قامتاماسىز ەتىلدى. جەرگىلىكتى بيۋدجەت قارجىسى ەسەبىنەن 7604 ادام قوعامدىق جۇمىستارعا تارتىلدى.
وبلىس اكىمى بەردىبەك ساپارباەۆ القالى جيىندى قورىتىندىلاي كەلە, ونەركاسىپ سالاسىندا ەسەپتىلىكتىڭ تومەندىگىن, سونداي-اق, يندۋستريالىق ايماقتىڭ مۇمكىندىگى ءتيىمدى پايدالانىلماي وتىرعانىن سىنعا الدى. قول قويىلعان مەموراندۋمداردى ىلگەرى اپارۋعا باقىلاۋ جەتىسپەيتىندىگىنە, شاعىن جانە ورتا بيزنەس نىساندارىندا اشىقتىقتىڭ قامتاماسىز ەتىلمەيتىنىنە, سالىقتان جالتارۋشىلىق كەزدەسىپ قالاتىنىنا, ينۆەستيتسيا تارتۋ كوزدەرىن تابۋدىڭ كوڭىلدەگىدەي بولماي وتىرعانىنا نازار اۋداردى.
ول اۋىل شارۋاشىلىعى سالاسىندا مالدىڭ ءوسۋى وعان بولىنگەن مەملەكەتتىك قولداۋ قارجىلارىنان اناعۇرلىم كەيىن قالىپ وتىرعانى سالاداعى العا باسۋشىلىقتى تەجەپ وتىرعانىن اتاپ ءوتتى. «سىباعا», «التىن اسىق», «قۇلان» جانە «ىرىس» مەملەكەتتىك باعدارلامالارىنىڭ مۇمكىندىكتەرىن ءالى دە بولسا جەتكىلىكتى تۇردە پايدالانا الماي وتىرعانىنا قىنجىلىس ءبىلدىردى. سۇدىگەر جىرتۋ جانە كۇزگى داقىلداردى ەگۋدە باياۋلىق بار ەكەنىن دە جاسىرمادى.
الىستاعى اۋىلدارعا باعدارلامانىڭ ءمان-ماعىناسى جەتكىزىلە بەرمەيدى, ءتۇسىندىرۋ جۇمىستارى ناشار, دەگەن بەردىبەك ماشبەك ۇلى اۋدانداردا وڭدەۋ كاسىپورىندارىنىڭ جۇمىس ىستەمەيتىندىگىن دە سىنعا الدى.
ءوڭىر باسشىسىنىڭ تالاپ پەن ءتارتىپتى ءبىرىنشى كەزەككە قويۋى بوساڭسىپ كەتكەندەردى شيراق قيمىلداپ, ىزدەنىسپەن جۇمىس ىستەۋگە ىقپال ەتەدى دەگەن ۇمىتپەن تاراستى جۇرت.
ساتىبالدى ءساۋىرباي,
«ەگەمەن قازاقستان»
اقتوبە وبلىسى