بەلگىلى اكتەر, ءانشى بايعالي ەسەناليەۆتىڭ ءۇش تومدىق كىتابى مادەنيەت جانە سپورت مينيسترلىگىنىڭ تاپسىرىسىمەن «تايماس» باسپاسىنان جارىق كوردى.
كىتاپ دەمەكشى, ساحنا ونەرى, ارىپتەستەرى تۋرالى كىتاپ جازۋ – شىعارماشىلىق ادامدارى اراسىندا ەجەلدەن بار ءداستۇر. مىسالى, كىتاپتارى جارىق كورگەن ونەر يەلەرىنەن تەاتر اكتريساسى, مارقۇم حابيبا ەلەبەكوۆا اپامىزدان باستاپ, بيكەن ريموۆا, اسانالى ءاشىموۆ, ەسمۇحان وباەۆ, امان قۇلباەۆ, تۇڭعىشباي جامانقۇلوۆ... ساڭلاقتار تولىپ جاتقان جوق پا؟ سول سياقتى, ەلۋباي ءومىرزاقوۆ, قاپان بادىروۆ, قانابەك بايسەيىتوۆ سياقتى تولاعاي تۇلعالاردىڭ جازبالارى كەيىنگى وسكەلەڭ ۇرپاق ءۇشىن قاشاندا تاريحي قۇندى شەجىرە بولىپ قالماعى انىق. ب. ەسەناليەۆتىڭ ۇشتومدىعى سونداي ايشۋاق جولدىڭ بۇگىنگى رۋحاني جالعاسى ىسپەتتى. وسىعان وراي كوپشىلىك بۇرىن اكتەر, ءانشى رەتىندە ونەرىن ءسۇيىپ باعالاعان ونى مىنا كىتابى ارقىلى قالامگەر رەتىندە جاتىرقاي قويماس دەگەن سەنىمدەمىز.
ءبىرىنشى تومدا اۆتوردىڭ ولەڭدەرى مەن پوەمالارىنا, جاستىق شاقتاعى البىرت سەزىم جىرلارىنا, سونداي-اق اقىلى تولىسا باستاعان, ەسەيۋ كەزەڭىندەگى ولەڭگە اينالعان ويلارى مەن بايسالدى بايلامدارىنا ورىن بەرىلگەن. سونىمەن قاتار, مۇنداعى يران-عايىپ, قاسىمحان بەگمانوۆ, گۇلنار شامشيەۆا سىندى ءبىرقاتار تانىمال اقىنداردىڭ بايعاليعا ارناپ ءار كەزەڭدەردە جازعان جىر لەبىزدەرىنەن اكتەر بولمىسىنىڭ شىعارماشىلىق قىرلارى جان-جاقتى ايقىندالا ورىلەدى. كىتاپ كوزى تىرىسىندە بايعاليعا شىعارماشىلىق ءسات-ساپار تىلەگەن بەلگىلى اقىن تۇمانباي مولداعاليەۆتىڭ اقجولتاي العىسوزىمەن اشىلىپ, ءارى قاراي ونەر يەسىنىڭ ومىردەگى, ساحناداعى كەسكىن-كەلبەتى جايىندا بەلگىلى اقىندار اقۇشتاپ باقتىگەرەەۆا, يسرايىل ساپارباەۆ, ءابدىراحمان اسىلبەكوۆ سىندى اعا-اپالارى ىستىق لەبىزدەر ارنايدى.
ال ۇشتومدىقتىڭ ەكىنشى تومىنا ساحناداعى ساتتەرى, ساعىنىشقا تولى ەستەلىكتەر, ءارىپتەستەرىنىڭ باسىنان كەشكەن ءتۇرلى ەرەكشە وقيعالار, بۇگىندە ءوزى قىزمەت اتقاراتىن قازاقستانداعى اۆتورلىق قۇقىق سالاسىنىڭ ماسەلەلەرى تۋرالى وي-تولعاۋلارى توپتاستىرىلعان. سونىمەن بىرگە, جيناققا ءوزى كوپ جىلدار زەرتتەگەن مۇحاممەد حايدار دۋلاتي تاقىرىبىنا ارنالعان تاريحي-زەرتتەۋ ەڭبەكتەرى ەنگەن.
ءۇشىنشى توم ەلىمىزدىڭ تەاتر ساحنالارىندا ءار جىلداردا قويىلعان پەسالارىنان, كەزىندە ا.ءاشىموۆ, ن.ىقتىمباەۆ, س.نارىمبەتوۆ, س.جارمۇحامبەتوۆ سىندى قازاق ۇلتتىق كينو ونەرىنىڭ قايراتكەرلەرى تاراپىنان جوعارى باعاعا يە بولعان كينوستسەناريلەرىنەن قۇرالعان.
قاراشاش توقسانباي,
«ەگەمەن قازاقستان»