قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «ن.نازارباەۆتىڭ ۇلگىسى: بەيبىتشىلىك پەن كەلىسىمنىڭ 25 جىلى» اتتى حالىقارالىق عالىمدار مەن ساراپشىلار فورۋمىنا قاتىستى, دەپ حابارلايدى egemen.kz akorda.kz سايتىنا سىلتەمە جاساپ.
ەل تاۋەلسىزدىگىنىڭ 25 جىلدىعىنا ارنالعان فورۋمعا قازاقستان حالقى اسسامبلەياسى توراعاسىنىڭ ورىنباسارى ە.توعجانوۆ, پارلامەنت ءماجىلىسىنىڭ دەپۋتاتتارى, مەملەكەتتىك ورگانداردىڭ, عىلىمي جانە شىعارماشىل زيالى قاۋىمنىڭ, ەتنومادەني بىرلەستىكتەردىڭ وكىلدەرى, قوعام قايراتكەرلەرى, قازاقستان حالقى اسسامبلەياسى عىلىمي-ساراپتامالىق كەڭەسىنىڭ مۇشەلەرى, رەسەي, ەۋروپالىق وداق, لاتىن امەريكاسى, ءۇندىستان, قىتاي, پاكىستان, وڭتۇستىك كورەيا, جاپونيا ەلدەرىنىڭ عالىمدارى مەن ساراپشىلارى قاتىستى.
فورۋمعا قاتىسۋشىلارعا ارناعان سوزىندە گ.ابدىقالىقوۆا قوعامدىق كەلىسىم مەن جالپىۇلتتىق بىرلىكتىڭ قازاقستاندىق ۇلگىسىن قالىپتاستىرعان نۇرسۇلتان نازارباەۆتىڭ اۋقىمدى تۇلعالىق ەرەكشەلىگىنە توقتالىپ ءوتتى. مەملەكەتتىك حاتشى قازاقستان ەتنوسارالىق كەلىسىم مەن حالىق بىرلىگى سالاسىندا جاھاندىق كوشباسشىلاردىڭ بىرىنە اينالعانىن ايتتى.
فورۋمعا قاتىسۋشىلار كوپۇلتتىلىق جاعدايىنداعى ەتنوسارالىق ديالوگ مودەلىنىڭ وتاندىق جانە الەمدىك تاجىريبەسىن, پوليەتنيكالىق قوعامداعى ينتەگراتسيالىق ۇدەرىستەردى, سونداي-اق ءتىل ساياساتىنىڭ بىرىكتىرۋشى ءرولىن تالقىلادى.
فورۋم قورىتىندىسى بويىنشا قازاقستان پرەزيدەنتىنە جولداناتىن ونىڭ بەيبىتشىلىك پەن كەلىسىم ساياساتىن, سونداي-اق الەمدىك قاۋىپسىزدىك پەن تۇراقتىلىقتى قامتاماسىز ەتۋ جونىندەگى جاھاندىق باستامالارىن قولداۋ تۋرالى ۇندەۋ ءماتىنى بەكىتىلدى.