ۇلتتىق برەندتى انىقتاۋ جونىندەگى بايقاۋعا داۋىس بەرۋ 12 قاراشاعا دەيىن ۇزارتىلدى, دەپ حابارلايدى egemen.kz قر اقپارات جانە كوممۋنيكاتسيالار ءمينيسترى داۋرەن اباەۆتىڭ facebook-تەگى پاراقشاسىنا سىلتەمە جاساپ.
"ازاماتتاردان وتىنىشتەردىڭ كوپتەپ تۇسۋىنە بايلانىستى, ۇلتتىق برەندتى انىقتاۋ جونىندەگى بايقاۋدىڭ ۇيىمداستىرۋ كوميتەتى داۋىس بەرۋدى تاعى 10 كۇنگە, 12 قاراشاعا دەيىن ۇزارتۋ جونىندە شەشىم قابىلدادى.
جۇمىستاردى قابىلداۋ كەزەڭىندە دە مەرزىمنىڭ ۇزارتىلعانى بەلگىلى. بارلىق ءوتىنىمنىڭ 70%-ى وسىدان كەيىن كەلىپ تۇسكەن بولاتىن. قازىردىڭ وزىندە 66 مىڭنان استام ادام داۋىس بەرىپ ۇلگەردى", - دەپ جازدى داۋرەن اباەۆ.
سونىمەن قاتار مينيستر بايقاۋدى جالپىۇلتتىق سيپاتتا وتكىزۋ تالابىنىڭ باستى ورىندا تۇرعانىن جەتكىزدى. ال كوپشىلىكتىڭ بايقاۋعا كاسىبي مامانداردى قاتىستىرۋ كەرەك دەگەن پىكىرى بۇل سيپاتقا قايشى كەلەتىنىن ءتۇسىندىردى.
"كۇنى ەرتەڭ ەلىمىزدە دە, سونىمەن قاتار, سىرت ەلدەردە دە قولدانۋعا لايىقتى برەندتى تاڭداۋ اسا ماڭىزدى بولعاندىقتان, ءبىز قازاقستاندىقتاردىڭ وزدەرىنە تىكەلەي قاتىسۋعا دا, ۇزدىك جۇمىستى تاڭداۋعا دا مۇمكىندىك بەرىپ وتىرمىز.
يدەيالاردى ىرىكتەيتىن ساراپشىلار كەڭەسىنە, ياعني ەكىنشى كەزەڭگە كەمىندە 5 جۇمىس جىبەرىلەدى. دەمەك, ولاردىڭ سانى 10 بولۋى دا, 20 بولۋى دا مۇمكىن. بۇل - ۇمىتكەرلەردىڭ كوپشىلىگىنىڭ جەڭىمپاز اتانۋ ءۇشىن باسەكەلەسۋگە مۇمكىندىگى بار دەگەن ءسوز", - دەدى مينيستر.