24 ەل دەلەگاتسياسى مەن ەۋرووداق وكىلدەرى انتاركتيكادا الەمدەگى ەڭ ءىرى تەڭىز قورىعىن سالۋدى ماقۇلدادى, دەپ حابارلايدى egemen.kz ريا نوۆوستي - عا سىلتەمە جاساپ.
انتاركتيكانىڭ ءتىرى تەڭىز رەسۋرستارىن ساقتاۋ جونىندەگى كوميسسيانىڭ (انتكوم) جىل سايىن وتەتىن كەزدەسۋى بيىل اۋستراليالىق حوبارتتا ءوتتى.
جاڭا زەلانديا ءسىم باسشىسى ميۋررەي ماككاليدىڭ مالىمدەۋىنشە, انتكوم شەشىمىمەن قۇرىلعان روسسا تەڭىزىندەگى قورىق زوناسى 1,55 ميلليون شارشى شاقىرىمنان اسادى. بۇل اۋماقتا 35 جىلعا بالىق اۋلاۋعا تىيىم سالىنادى.
ءمينيستردىڭ ايتۋىنشا, قورىق قۇرۋ تۋرالى كەلىسىم 2017 جىلدىڭ 1 جەلتوقسانىندا كۇشىنە ەنەدى. وڭتۇستىك مۇحيتتىڭ تەك 2%-ىن الاتىن روسسا تەڭىزىندە ادەلي پينگۆيندەرىنىڭ الەمدىك پوپۋلياتسياسىنىڭ 38%, داۋىلپازداردىڭ (بۋرەۆەستنيك) 30% جانە تەڭبىل باۋىرلى كيتتەردىڭ 6% تىرشىلىك ەتەدى.