شىمكەنتتە 5 بىردەي حالىققا قىزمەت كورسەتۋ ورتالىعىنا شاعىم جاشىكتەرى ورناتىلدى, دەپ حابارلايدى ەگەمەناقپارات قالا اكىمدىگىنىڭ ءباسپاسوز قىزمەتىنە سىلتەمە جاساپ.
بۇل جۇمىسقا ۇيىتقى بولعان - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وقو بويىنشا دەپارتامەنتى مەن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وبلىستىق فيليالى. ونىڭ ماقساتى مەملەكەتتىك قىزمەتشىلەردىڭ ەتيكاسى مەن قىزمەتتەردىڭ ساپاسىن ارتتىرۋ بولىپ تابىلادى.
سونداي-اق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرى شاھارداعى حقو-لاردا اپتاسىنا ءبىر كۇن «ازاماتتاردى قابىلداۋ» شاراسىن وتكىزەتىن بولادى. قىزمەت الۋشىنىڭ قۇقىقتارى بۇزىلعان جاعدايدا ارىز-شاعىمداردى قابىلداپ, كەڭەس بەرەدى. شاعىم جاشىكتەرىنە كەلىپ تۇسكەن ارىزداردى ءتيىستى ورگاندارعا جولداپ, ءمان-جايدى انىقتاۋعا كومەكتەسەدى.
ازىرگە بۇل جوبا تەك شىمكەنتتەگى ورتالىقتاردا ىسكە اسىرىلۋدا. مەملەكەتتىك قىزمەتشىلەر تاراپىنان ساپاسىز قىزمەت العان اۋداندار مەن شالعايدا جاتقان ەلدى مەكەن تۇرعىندارى وسىندا كەلىپ, ارىزدانا الادى. بۇل ءىس تيىمدىلىگىن دالەلدەسە, اۋدان ورتالىقتارىندا وسىنداي شاعىم جاشىكتەرىن ورنالاستىرۋ جوسپارلانۋدا.