جىل باسىنان بەرى قازاقستاندا ينتەرنەتتە ورنالاستىرىلعان 20 مىڭنان استام ءارتۇرلى تاقىرىپتارداعى بەيادەپ ماتەريال بۇعاتتالعان. مۇنداي دەرەك اقپارات جانە كوممۋنيكاتسيالار مينيسترلىگىنىڭ ۇيىمداستىرۋىمەن وتكەن القادا ايتىلدى.
«16 جاسقا تولماعانداردىڭ الەۋمەتتىك جەلىلەردە تىركەلۋىنە شەكتەۋ ەنگىزۋ» تاقىرىبى اياسىندا ۇيىمداستىرىلعان وتىرىسقا مەملەكەتتىك ورگاندار مەن ءتۇرلى ۇيىمدار جانە قوعام بەلسەندىلەرى قاتىسقان بولاتىن. اتالعان مينيسترلىكتىڭ مەملەكەتتىك مەكەمە رەتىندە ينتەرنەت پەن الەۋمەتتىك جەلىلەردىڭ مۇقيات باقىلاناتىندىعىن بايانداعان جانات مۇرات ۇلى پايداسىنان زيانى كوپ سايتتاردى بىلاي قويىپ, سونىمەن ماندەس مالىمەتتەر دە بۇعاتتالاتىندىعىن ايتتى.
«ارينە, ءبىز پايداسىنان زيانى كوپ سايتتاردى قۇزىرلى ورگاندارمەن بىرلەسە وتىرىپ, قىزمەتىن توقتاتامىز. ودان بولەك, جەتكىنشەكتەر كوپ ۇيىرسەكتەيتىن الەۋمەتتىك جەلىلەردى دە قاتاڭ قاداعالاپ, ساراپتاپ وتىرامىز. جىل باسىنان بەرى 20 مىڭنان استام ماتەريالدى بۇعاتتادىق. ونىڭ باسىم بولىگى بالالاردى ءوز-وزىنە قول جۇمساۋعا جەتەلەيتىن, پورنوگرافيالىق سيپاتقا يە نەمەسە تەرىس اعىمعا ۇندەيتىن, ءتىپتى, بۇزاقىلىق ارەكەتتەر ارقىلى قاتىگەزدىككە باۋليتىن باعىتتا بولعاندىقتان وسىنداي شەشىم قابىلدادىق», – دەدى ول.
سونداي-اق, جيىندا ماسەلەنىڭ وزەكتىلىگى مەن الەۋمەتتىك ماڭىزدىلىعىنا بايلانىستى بالالاردى ينتەرنەتتىڭ قاۋىپ-قاتەرىنەن قورعاۋ ءۇشىن تەحنيكالىق مۇمكىندىكتەر ارقىلى قويىلاتىن شەكتەۋلەر تۋرالى دا ۇسىنىستار ايتىلدى.
سونىڭ ءبىرى – بايلانىس وپەراتورلارى «بالالار ينتەرنەتى» دەپ اتالاتىن قىزمەتتى ىسكە قوسۋى تۋرالى بولدى.
«بالكىم, بايلانىس وپەراتورلارىمەن بىرلەسە وتىرىپ جەتكىنشەكتەرگە ارنالعان شەكتەۋلى «بالالار ينتەرنەتى» قىزمەتىن ىسكە قوسۋ كەرەك شىعار. بۇل ءوزى كەيبىر ەلدەردىڭ تاجىريبەسىندە بار. بەلگىلى ءبىر دەڭگەيدە ينتەرنەتتىڭ ءتاريفىن ەنگىزىپ, وزگەسىنە شەكتەۋ قويىلۋى قاجەت. ونىڭ ەرەكشەلىگى سول – بالالارعا ۇسىنىلعان ينتەرنەتتە زياندى كونتەنتتى بۇعاتتاۋ مىندەتتەلەتىن بولادى», – دەدى ج.قوجاحمەتوۆ.
نۇرلىبەك دوسىباي,
«ەگەمەن قازاقستان»