ەلباسىنىڭ جارلىعىنا سايكەس, ورتالىق اتقارۋشى بيلىك باسشىلارى مەن اكىمدەر عانا ەمەس, ۇلتتىق جوعارى وقۋ ورىندارىنىڭ رەكتورلارى دا حالىق الدىندا اتقارىلعان جۇمىستارعا بايلانىستى ەسەپ بەرە باستادى. بۇل تەك ەسەپ قانا ەمەس, ونى تالقىلاپ, سۇراقتارعا ناقتى جاۋاپ بەرىلۋى ءتيىس. وقىتۋشى-پروفەسسورلارمەن بىرگە ستۋدەنتتەر دە رەكتورعا وزدەرىن تولعاندىرىپ جۇرگەن كوكەيكەستى ماسەلەلەرگە بايلانىستى ساۋالدارىن قويۋعا مۇمكىندىك الادى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ حالىق الدىنداعى ەسەبى وسىلاي ءوربىدى.
2015-2016 وقۋ جىلىندا ۇلتتىق ۋنيۆەرسيتەتتە اتقارىلعان جۇمىس اۋقىمدى. قازىر ەۇۋ – «QS Top 50 Under» رەيتينگىنە ەنگەن قازاقستان مەن تمد-داعى جالعىز جوعارى وقۋ ورنى. اشىلعانىنا جارتى عاسىر تولماعان الەمنىڭ 100 ۋنيۆەرسيتەتى اراسىندا 37-ورىندا. بۇل – وتە جوعارى كورسەتكىش.
«QS World University Ranking 2016» رەيتينگىندە الەمنىڭ 916 ۇزدىك ۋنيۆەرسيتەتى اراسىندا ەۋرازيا ۇلتتىق ۋنيۆەرسيتەتى 345-ءشى ورىنعا كوتەرىلىپ وتىر. بۇل – باۋمان اتىنداعى ماسكەۋ جوعارى تەحنيكالىق ۋنيۆەرسيتەتىمەن, رەسەي حالىقتار دوستىعى ۋنيۆەرسيتەتىمەن ءبىر قاتاردا تۇر دەگەن ءسوز. جوعارى وقۋ ورىندارى ۆەبسايتتارىنىڭ الەمدىك «Webometrics» رەيتينگىندە قازاقستان بويىنشا ەكى جىل قاتارىنان ءبىرىنشى ورىندى يەلەندى. 2015 جىلى Academic University Ranking Performance رەيتينگى بويىنشا «ازيانىڭ ۇزدىك 550 ۋنيۆەرسيتەتى» قاتارىنا ورتالىق ازيادان ەنگەن جالعىز جوعارى وقۋ ورنى.
قازىرگى ۋاقىت يننوۆاتسيانىڭ زامانى. وسىعان ساي ماماندار ءوز ەلىمىزدە دايارلانۋى ءتيىس. ەلباسى ۇسىنعان يندۋستريالىق-يننوۆاتسيالىق دامۋ باعدارلاماسىنىڭ ماقساتى – بىلىكتى, باسەكەگە قابىلەتتى ماماندار دايارلاۋ. وسى باعدارلاماعا سايكەس 2015 جىلدان باستاپ ۋنيۆەرسيتەتتىڭ ماگيستراتۋراسىندا «قۇرىلىس ماتەريالدارى, بۇيىمدار مەن كونسترۋكتسيالار ءوندىرىسى», «عارىشتىق تەحنيكا مەن تەحنولوگيالار» ماماندىقتارى بويىنشا ماماندار دايارلانۋدا. بيىل بۇعان ءۇش ماماندىق قوسىلعان: «بيوتەحنولوگيا», «راديوتەحنيكا, ەلەكترونيكا جانە تەلەكوممۋنيكاتسيا», «جىلۋ ەنەرگەتيكاسى». بۇل قازىرگى ۋاقىتتا اۋاداي قاجەت ماماندىقتار.
ۋنيۆەرسيتەت رەكتورى, باياندامادان تىس, ستۋدەنتتىڭ ساۋالىنا وراي تاعى ءبىر جاعىمدى جاڭالىقتى جەتكىزدى. بايقوڭىر عارىش ايلاعى قازاقستاننىڭ اۋماعىندا بولا تۇرا وندا ۋنيۆەرسيتەت ستۋدەنتتەرىنىڭ وندىرىستىك تاجىريبەدەن وتۋىنە مۇمكىندىك بولماعان. وسى ماسەلەنىڭ ءتۇيىنى بيىل شەشىلگەن. تاعى ءبىر ۇلكەن جاڭالىق – ەكى-ءۇش جىلدىڭ شاماسىندا ۋنيۆەرسيتەت ءوزىنىڭ جەر سەرىگىن ۇشىرماق. قازىرگى زامانعى تەحنولوگيا بويىنشا جۇمىس ىستەيتىن قۇرىلىسى اياقتالۋعا جاقىن جاڭا كىتاپحانا تاۋلىك بويى قىزمەت كورسەتەتىن بولادى. مۇنىڭ ءبارى ۋنيۆەرسيتەتتىڭ اۋماعىنداعى نىساندار.
شەتەلدىڭ ايتۋلى جوعارى وقۋ ورىندارىمەن ۇلتتىق ۋنيۆەرسيتەتتىڭ حالىقارالىق بايلانىسى جىلدان-جىلعا ارتىپ كەلە جاتقانىنا كۋا بولدىق. ماسەلەن, وتكەن جىلى ستۋدەنتتەرگە ءدارىس وقۋ مەن عىلىمي جۇمىستارىنا جەتەكشىلىك ەتۋگە 72 شەتەلدىك پروفەسسور شاقىرىلعان. 326 ستۋدەنت اقش پەن گەرمانيانىڭ, فرانتسيا مەن كورەيانىڭ, جاپونيا مەن پولشانىڭ جانە قىتايدىڭ جوعارى وقۋ ورىندارىندا ءبىلىم العان. ال, وسى ەلدەردىڭ جاستارى ەۋرازيا ۇلتتىق ۋنيۆەرسيتەتىندە وقىپ ءجۇر. وتكەن جىلى 25 شەت ەلدەن 486 ستۋدەنت وقىعان. بۇگىندە 277 ءپان شەت تىلىندە جۇرگىزىلەدى ەكەن. شەتەل ستۋدەنتتەرى ءۇشىن بيىلدان باستاپ قازاق جانە ورىس تىلدەرىن وقىتۋ كۋرستارى اشىلماق.
رەكتور مىناداي ءبىر دەرەك كەلتىردى: كەمبريدج ۋنيۆەرسيتەتىنىڭ مالىمەتىنە قاراعاندا, وسى ىرگەلى وقۋ ورنىنىڭ ماگيستراتۋراسىندا قازاقستان مەن ورتالىق ازيادان بارىپ وقىپ جاتقانداردىڭ ەڭ كوبى ەۋرازيا ۇلتتىق ۋنيۆەرسيتەتىنىڭ تۇلەكتەرى ەكەن. دەمەك, بۇل وقۋ ورداسىنىڭ بەدەلى مەن مەرەيى قازاقستاندا عانا ەمەس, شەتەلدە دە ۇستەم ەكەندىگى وسىدان-اق بايقالادى.
ۋنيۆەرسيتەت ۇجىمى «ەكسپو» حالىقارالىق كورمەسىنە جان-جاقتى ازىرلىك جاساپ جاتقان كورىنەدى. رەكتوردىڭ ءوزى «ەكسپو-2017» حالىقارالىق كورمەسى جانىنداعى قوعامدىق كەڭەستىڭ توراعاسى.سوندىقتان بولسا كەرەك, «ENU JUNIOR-EXPO-2017» اتتى جاڭا اكتسيانى جاريا ەتتى. ونىڭ بۇل باستاماسىنا وقىتۋشى-پروفەسسورلار دا, ستۋدەنتتەر دە ۇلكەن قولداۋ ءبىلدىردى. حالىقارالىق كورمەنىڭ جۇمىسىنا 3000-نان استام ەرىكتى ستۋدەنت قاتىسپاق. ۇلتتىق ۋنيۆەرسيتەت وتاندىق ەنەرگەتيكا, ەكولوگيا, بيوتەحنولوگيا, تۋريزم سالالارىنا بايلانىستى سەمينار, سيمپوزيۋم, دوڭگەلەك ۇستەلدەر ۇيىمداستىرۋدى جوسپارلاپ وتىر. قىزمەتكەرلەر مەن ستۋدەنتتەر «ەكسپو-2017» ۇسىنادى» ساپا بەلگىسىن ازىرلەۋگە قاتىسىپ, اعىلشىن, قىتاي, تۇرىك تىلدەرىن مەڭگەرگەن گيدتەر مەن ەكسكۋرسيا جەتەكشىلەرىن دايارلاۋ ورتالىعىن اشپاق.
رەكتوردىڭ ەسەبىن تالقىلاۋ مەن سۇراق-جاۋاپ كەزىندە كوتەرىلگەن وزەكتى ماسەلەنىڭ ءبىرى – جاتاقحانا. ۋنيۆەرسيتەت جەتەكشىسى وسى جىلدىڭ سوڭىنا قاراي, تاۋەلسىزدىك مەرەكەسىنە وراي 500 ورىندىق جاڭا جاتاقحانانىڭ پايدالانۋعا بەرىلەتىنىن ايتىپ, ءبىر قۋانتىپ تاستادى.
عالىم ومارحان,
«ەگەمەن قازاقستان»