فيليپپين پرەزيدەنتى رودريگو دۋتەرتە ءوزىنىڭ ەسىرتكى ساۋداسىنا قارسى جۇرگىزىپ جاتقان كۇرەسىن حولوكوستپەن قاتار قويدى, كەزىندە گيتلەر ەۆرەيلەردى قالاي قىرسا, ءوزى ناشاقورلاردى سولاي قىراتىنىن ايتتى دەپ حابارلايدى BBC News-كە سىلتەمە جاساعان ەگەمەن-اقپارات. «گيتلەر ءۇش ميلليون ەۆرەيدى ءولتىردى. بىزدە ءۇش ميلليون ناشاقور بار. Cولاردىڭ كوزىن تۇگەل قۇرتقىم كەلەدى» دەپ مالىمدەگەن رودريگو دۋتەرتە. «گەرمانيادا گيتلەر بولسا, فيليپپيندە...» دەپ ءوزىن كورسەتكەن.
ماۋسىم ايىندا بيلىككە كەلگەن فيليپپين پرەزيدەنتى ەسىرتكى ساتۋشىلار مەن ناشاقورلارعا قارسى جۇرگىزگەن اياۋسىز كۇرەسى ءۇشىن حالىقارالىق قاۋىمداستىق پەن باتىس ەلدەرى ليدەرلەرى تاراپىنان سىنعا ۇشىراپ جاتىر. رەسمي مالىمەتتەر بويىنشا, ماۋسىم ايىنان بەرى پوليتسيا جۇرگىزگەن ءتۇرلى وپەراتسيالار كەزىندە 3000-نان اسا ادام ولتىرىلگەن. ولاردىڭ دەنەلەرى مەن جاساعان قىلمىستارىنىڭ ءتىزىمى جۇرت الدىنا قويىلادى.
دۋتەرتە فيليپپيندەگى قىلمىس دەڭگەيىن تومەندەتۋ ءۇشىن 100 000 قىلمىسكەردى ولتىرۋگە دايىن ەكەنىن اشىپ ايتقان بولاتىن.
جەرگىلىكتى باسىلىمداردىڭ مالىمەتى بويىنشا, ەلدە 1,8 ميلليونعا جۋىق ناشاقور بار. بۇل – ەل حالقىنىڭ 1,8%-ىنا تەڭ.
رودريگو دۋتەرتە جاڭاعى ءسوزدى ءوزى ءبىر كەزدە باسقارعان داۆاو قالاسىنا كەلگەن كەزدە ايتقان.
رەيتەر اگەنتتىگىنىڭ حابارىنا قاراعاندا, ەۆرەي قاۋىمى دۋتەرتەنىڭ بۇل سوزدەرىنە نارازىلىق ءبىلدىردى.
فيليپپين پرەزيدەنتى مۇنىڭ الدىندا ءوزىنىڭ قاتاڭ ساياساتىنا ەسكەرتۋ جاساعان باتىس ەلدەرىن بىت-شىت قىلىپ سىناعان بولاتىن. «تاياۋ شىعىستان بوسىپ كەتكەن ميگرانتتار ءجۇر. ولاردىڭ قىرىلىپ جاتقانىنا باستارىڭ اۋىرمايدى. ەندى 100, 2000, 3000 ادامنىڭ ولگەنىنە قالايشا قينالا قالدىڭدار؟» دەگەن ەدى ول ءسال بۇرىنىراقتا.
رودريگو دۋتەرتە بيلىككە كەلگەلى بەرى فيليپپيندە بىرنەشە مىڭ ادام سوتسىز-تەرگەۋسىز ءولتىرىلدى
ەگەمەن-اقپارات