پرەمەر-مينيستر باقىتجان ساعىنتاەۆ جەتەكشى IT-كومپانيالاردىڭ باسشىلارىمەن كەزدەسۋ ءوتكىزدى. اڭگىمە بارىسىندا وتاندىق IT-نارىقتى دامىتۋ, ستارتاپتاردى قولداۋ جانە باعدارلامالىق ءونىمدەردى ازىرلەۋ, جەكە ينۆەستيتسيالاردى ىنتالاندىرۋ, سونداي-اق, اقپاراتتىق قاۋىپسىزدىك ماسەلەلەرى تالقىلاندى.
سونىمەن قاتار, ۇكىمەت باسشىسى ونەركاسىپتىك دامۋ بويىنشا كوميسسيانىڭ وتىرىسىن وتكىزدى. وندا كوميسسيا مۇشەلەرى 2014-2019 جىلدارعا ارنالعان يندۋستريالاندىرۋ كارتاسىن ورىنداۋ ماسەلەلەرىن قاراستىردى.
كەڭەستىڭ قورىتىندىسى بويىنشا ب.ساعىنتاەۆ جاۋاپتى مەملەكەتتىك ورگاندارعا بىرقاتار تاپسىرمالار بەردى.
وسى كۇنى ب.ساعىنتاەۆ وبلىستار جانە استانا, الماتى قالالارى اكىمدەرىنىڭ قاتىسۋىمەن ەكسپو-2017 كورمەسىنە دايىندىق جانە ونى وتكىزۋ جونىندەگى مەملەكەتتىك كوميسسيانىڭ وتىرىسىن وتكىزدى.
وتىرىسقا قاتىسۋشىلار استاناداعى ەكسپو-2017 كورمەسىنە ازىرلىك بويىنشا جەرگىلىكتى اتقارۋشى ورگاندار مەن مەملەكەتتىك ورگانداردىڭ جۇمىس شتابتارىنىڭ جۇمىس بارىسىن قاراستىردى. كورمەنى ناسيحاتتاۋ, ۆولونتەرلىك قىزمەت, تۋريستىك پاكەتتەر ازىرلەۋ, استاناداعى نىسانداردىڭ كورمەگە كەلۋشىلەردى قابىلداۋ دايىندىعى, استانالىق اۋەجاي تەرمينالىنىڭ قۇرىلىسى, قوناق ۇيلەر قورىنىڭ ازىرلىگى جانە لوگيستيكا ماسەلەلەرى تالقىلاندى.
وتىرىس قورىتىندىسى بويىنشا پرەمەر-مينيستر جاۋاپتى مەملەكەتتىك ورگاندارعا ەكسپو-2017 كورمەسىن وتكىزۋگە دايىندىق بارىسىن باقىلاۋعا الۋدى جانە كورمە نىساندارىنىڭ مەرزىمىندە پايدالانۋعا بەرىلۋىن قامتاماسىز ەتۋدى تاپسىردى, دەپ حابارلادى پرەمەر-ءمينيستردىڭ رەسمي سايتى.