قازاقستان تمد شەڭبەرىندە بەلارۋستىڭ نەگىزگى ساۋدا سەرىكتەستەرىنىڭ ۇشتىگىنە كىرەدى. ستاتيستيكالىق مالىمەتتەر بويىنشا, قازاقستان مەن بەلارۋس اراسىنداعى تاۋار اينالىمى 2015 جىلى 519,7 ملن دوللاردى قۇراعان, بۇل كورسەتكىش 2014 جىلمەن سالىستىرعاندا 37,8%-عا تومەن. سونداي-اق, قازاقستاننان بەلارۋسكە شىعارىلاتىن ەكسپورت مولشەرى 22,2%-عا قىسقارىپ, 47,7 ملن دوللار بولعان. بەلارۋستەن ەلمىزگە كەلەتىن يمپورت تا 39,0%-عا كەمىپ, 472,0 ملن دوللاردى قۇراپتى. مۇنداي ۇدەرىستىڭ قالىپتاسۋىن ساراپشىلار ەڭ الدىمەن, قازىرگى الەمدىك ەكونوميكالىق داعدارىس جاعدايىمەن بايلانىستىرىپ وتىر.
«ەكىجاقتى تاۋار اينالىمنىڭ 90%-ى بەلارۋس تاۋارلارى مەن ونىمدەرىن قۇراسا, قالعان 10%-ى وتاندىق تاۋارلارعا تيەسىلى. بۇگىنگى كۇنگە دەيىن ەكى ەلدىڭ اراسىنداعى تاۋار اينالىمى بىرتىندەپ ءوسىپ, شامامەن 1 ملرد دوللارعا جاقىنداپ قالعان ەدى. الايدا, قارجىلىق داعدارىستىڭ اسەرىنەن بۇل كورسەتكىش وتكەن جىلى 519 ملن دوللارعا دەيىن تومەندەدى. بيىلعى جىلى بۇل ۇدەرىس ءالى دە جالعاسىپ كەلەدى. ماسەلەن, اعىمداعى جىلدىڭ العاشقى جارتىجىلدىعىندا تاۋار اينالىمى 145,8 ملن دوللاردى قۇرادى. بۇل وتكەن جىلعى ءدال وسى ۋاقىت ارالىعىنداعى كورسەتكىشتەن 46,4%-عا تومەن. ارينە, بۇل جاعداي ەكى ەلگە عانا بايلانىستى بولىپ تۇرعان جوق. بۇل الەمدەگى ەكونوميكالىق جاعدايدىڭ اسەرىنەن قالىپتاسقان ءۇردىس. بىراق سوعان قاراماستان, ءبىز ەكسپورت-يمپورت, تاۋار اينالىمى كورسەتكىشتەرىن جوعارىلاتۋعا كۇش سالاتىن بولامىز». سىرتقى ىستەر مينيسترلىگى ارنايى ۇيىمداستىرعان بريفينگتە قازاقستاننىڭ بەلارۋس رەسپۋبليكاسىنداعى توتەنشە جانە وكىلەتتى ەلشىسى ەرعالي بولەگەنوۆ وسىلاي دەدى.
توتەنشە جانە وكىلەتتى ەلشى سونداي-اق ەكىجاقتى ارىپتەستىككە, قوس مەملەكەت اراسىنداعى ىنتىماقتاستىقتىڭ نىعايۋىنا مەملەكەت باسشىلارىنىڭ سەنىمگە قۇرىلعان, دوستىققا نەگىزدەلگەن قارىم-قاتىناسى ايتارلىقتاي اسەر ەتكەنىن جەتكىزدى. ول عارىش, اۋىل شارۋاشىلىعى, ونەركاسىپ, ءبىلىم-عىلىم, دەنساۋلىق ساقتاۋ, كوممۋنيكاتسيا, ترانزيت, IT-تەحنولوگيا, جول-قۇرىلىس, ماشينا جاساۋ سالالارىندا وڭ ارىپتەستىك بايلانىس ورناتىلعانىنا توقتالىپ ءوتتى. ماسەلەن, بەلارۋستىڭ 5 اسكەري اكادەمياسى مەن جوعارى وقۋ ورنىن 2012 جىلدان بەرى قازاقستاننان بارعان 300-گە تارتا اسكەري ازامات ءتامامداپتى. ال بۇگىندە بۇل ەلدە 300-دەن استام قازاقستاندىق ستۋدەنت ءبىلىم الىپ جاتىر ەكەن.
ءلايلا ەدىلقىزى