تاۋەلسىزدىكتىڭ 25 جىلدىعىنا وراي تۇركسوي-دىڭ ۇيىمداستىرۋىمەن تۇرىك حالىقتارىنىڭ ونەرپازدارىنان قۇرالعان حالىق اسپاپتار وركەسترى تالدىقورعاندىقتارعا تاماشا تارتۋ جاسادى.
دومبىرا, بالاما, سىرناي, كاۆال, قىل-قوبىز, ساز سىرناي, مورين-حۋر, رۋباب, توپشۋر سياقتى ءتۇرلى اسپاپتارىنان توگىلگەن بىردە مۇڭدى, بىردە اسقاق, بىردە باياۋ, بىردە الاساپىران ءۇن ءى. جانسۇگىروۆ اتىنداعى مادەنيەت سارايىنا جينالعان قاۋىمدى سوناۋ ەرتە عاسىرداعى تاريح قويناۋىنا جەتەلەپ اكەتتى.
كونتسەرت باۋىرلاس حالىقتاردىڭ ءتىلى, ءتۇسى, تاريحى عانا ەمەس, مۋزاكاسىنىڭ دا ورتاقتىعى جايلى ويعا جەتەلەدى. راسىندا ءوزى ابىز, ءوزى كۇيشى, ءوزى باقسى ءارى ويشىل قورقىت بابامىزدىڭ قولىنداعى قوبىزدان تۋعان سارىندار تۇركىلىك مۋزىكا تاريحىنداعى بارىمىزگە ورتاق قۇندىلىق ەمەس پە ەدى؟ قۇرمانعازىنىڭ «اداي» كۇيىنە, كەنەننىڭ انىنە كورسەتىلگەن ىستىق ىقىلاستى ايتپاعاندا, ساحا رەسپۋبليكاسىنان كەلگەن يۋليانا كريۆوشاپكينانىڭ شاڭ قوبىزىنىڭ ۇنىنە, قىرعىز ونەرپازدارىنىڭ قومىزبەن توككەن تۋىندىلارىنا, تۇرىك, ءاجىربايجان حالىق اندەرىنە, جالپى جيىرماعا تارتا ءنومىردىڭ قاي-قايسىسىنا دا كورەرمەن تىك تۇرىپ قول سوقتى.
الماتى وبلىسىنىڭ اكىمى اماندىق باتالوۆ كونتسەرت سوڭىندا تۇركسوي ۇيىمىنىڭ حاتشىسى دۇيسەن قاسەيىنوۆكە, ونەر ۇجىمىنا وسىنداي ۇلاعاتى مول شارانى جەتىسۋدىڭ كىندىك قالاسىنان باستاعاندارىنا ريزاشىلىعىن ءبىلدىرىپ, شىعارماشىلىق تابىس تىلەدى.
ارمان نۇراحمەت ۇلىنىڭ رەجيسسەرلىگىمەن, مارات ءجالبيروۆتىڭ ديريجەرلىگىمەن قويىلعان كونتسەرت جاي عانا ءان ايتىلىپ, كۇي تارتىلعان قاتارداعى ويىن-ساۋىقتىڭ ءبىرى بولعان جوق. تامىرى ءبىر حالىقتاردى بۇرىنعىدان دا جاقىنداستىرا, باۋىرلاستىعىن بەكەمدەي تۇسكەن, انشلاگپەن وتكەن رۋحاني دەمالىس بولدى.
ساعىنىش نامازشاموۆا, تالدىقورعان