جەتىسۋدا جاڭا مەكتەپتەر اشىلدى

1 قىركۇيەك – ءبىلىم كۇنى الماتى وبلىسىندا «نۇرلى جول» باعدارلاماسىمەن جاڭادان سالىنعان ءۇش مەكتەپ – ىلە, ەڭبەكشىقازاق جانە كوكسۋ اۋداندارىندا اشىلدى. ىلە اۋدانى, بورالداي كەنتىندە ورنالاسقان 600 ورىندىق جاڭا ۇلگىدەگى مەكتەپ وسى اۋىلداعى ءۇش اۋىسىمدا وقىتۋدى جويۋعا مۇمكىندىك تۋعىزدى. بۇل مەكتەپتىڭ قۇرىلىسىنا ۇلتتىق قور مەن جەرگىلىكتى بيۋدجەت قاراجاتى ەسەبىنەن 1623,9 ملن تەڭگە جۇمسالدى. سونداي-اق ءۇش اۋىسىمدى ەسكى مەكتەپتىڭ ورنىنا بوي كوتەرگەن 300 ورىندىق تاعى ءبىر جاڭا مەكتەپ ەڭبەكشىقازاق اۋدانى, ازات اۋىلىندا اشىلدى. نىساننىڭ جالپى قۇنى – 778,1 ملن تەڭگە. مەكتەپ ۇلتتىق قور مەن جەرگىلىكتى بيۋدجەتتەن قارجىلاندىرىلدى. ال كوكسۋ اۋدانى, جامبىل اۋىلىندا اشىلعان جاڭا مەكتەپتە 120 وقۋشى ءبىلىم الادى. ءبىلىم ورداسى جەرگىلىكتى بيۋدجەت قاراجاتىنا سالىنعان. جالپى قۇنى – 438, 4 ملن تەڭگە. نۇربول الدىباەۆ