فۋتبولدان قازاقستان ۇلتتىق قۇراماسىنىڭ بۇرناعى كۇنى ءبىشكەكتە قىرعىزستاننىڭ باس كومانداسىمەن وتكىزگەن جولداستىق كەزدەسۋىندە 0:2 ەسەبىمەن ۇتىلىپ قالۋى, جۇمسارتىپ ايتقاننىڭ وزىندە, وتە قولايسىز وقيعا بولدى. بۇل ەكى جاماعاتتىڭ بۇعان دەيىنگى ءوزارا جەتى رەت كەزدەسۋىندە ءبىزدىڭ اياقدوپ شەبەرلەرىنىڭ ۇدايى دەس بەرمەي كەلگەنى ءبىر سەبەپ شىعار.
ءسويتىپ, وسى قارسىلاسىمەن ۇشىراسۋلاردا 5 رەت جەڭىسكە جەتىپ, 2 رەت قانا تەڭ ويناعان, ەشقاشان جەڭىلىپ كورمەگەن داستۇرىمىزگە ءبىر-اق ساتتە سىزات ءتۇستى. قۇراما باس جاتتىقتىرۋشىسى لاۋازىمىنا جاقىندا عانا رەسمي تۇردە بەكىتىلگەن تالعات بايسۋفينوۆكە دە بۇل جەڭىلىس ونشالىقتى ابىروي اپەرە قويماسا كەرەك.
ەگەر ماتچتا قازاقستان قۇراماسى جوعارى دارەجەلى ويىن كورسەتە العان بولسا, اڭگىمە باسقا. بىراق ولاي بولمادى. الاڭ يەلەرى كەزدەسۋدىڭ باسىنان ونىڭ تىزگىنىن قولدارىنا ۇستادى. ولار ءبىرىنشى تايمدى قوناقتار قاقپاسىن ۇدايى قاراۋىلعا الىپ, شابۋىلداۋمەن وتكىزدى. سونىڭ ناتيجەسىندە ويىننىڭ وسى بولىگىندە ءوز باسىمدىقتارىن گولعا اينالدىرا ءبىلدى. 43-مينۋتتا بۇرىشتامادان بەرىلگەن دوپتى قورعاۋشى ۆالەري كيچين الىستان ۇرىپ ءتۇسىردى.
كەزدەسۋدىڭ ەكىنشى تايمىندا قازاقستان قۇراماسىنىڭ باس باپكەرى الاڭداعى بىرقاتار ويىنشىلاردى الماستىردى. وسىدان كەيىن جەرلەستەرىمىز ءبىرشاما باتىل ويناي باستادى. بىراق بۇدان ءتۇيىندى قورىتىندى شىعارۋعا قاۋقارسىزدىق تانىتتى. مۇنىڭ ەسەسىنە قىرعىزدار تاعى دا شالتتىق كورسەتىپ كەتتى. وسىلايشا 82-مينۋتتا ميرلان مۋرزاەۆ ەسەپتى 2:0-گە جەتكىزدى.
قازاقستان قۇراماسى كەلەسى ويىنىن 4 قىركۇيەك كۇنى استانادا وتكىزەدى. ول وسى كۇنى وتەتىن 2018 جىلعى الەم چەمپيوناتى ىرىكتەۋ ءتۋرنيرىنىڭ ءبىرىنشى ويىنىندا پولشا كومانداسىن قابىلدايدى.
دامير قوجامقۇل