مەملەكەت باسشىسى استاناداعى №84 مەكتەپ-ليتسەيدە بولدى. بۇل تۋرالى akorda.kz حابارلادى.
ەلباسى مەكتەپتىڭ وقۋ سىنىپتارىن ارالاپ, مۇعالىمدەرمەن اڭگىمەلەستى.
نۇرسۇلتان نازارباەۆ جينالعانداردى جاڭا مەكتەپتىڭ اشىلۋىمەن قۇتتىقتاپ, تاۋەلسىزدىك جىلدارىندا ءبىلىم بەرۋ سالاسىن دامىتۋ جانە قاجەتتى ينفراقۇرىلىمدى قالىپتاستىرۋ ءۇشىن مەملەكەت كوپ كۇش-جىگەر جۇمساعانىن اتاپ ءوتتى.
«كوپتەگەن جاستارىمىز شەت ەلدەردە ءبىلىم الۋدا, بۇل جىلداردا ەلىمىز بويىنشا 1700-دەن استام مەكتەپ, سونىڭ ىشىندە زياتكەرلىك مەكتەپتەر اشىلدى. بيىل 60 جاڭا وقۋ ورنىن اشۋ جوسپارلانۋدا. وسى قادامدار جاس ۇرپاقتىڭ ءوسىپ-وركەندەۋى مەن ەلىمىزدىڭ بولاشاعى ءۇشىن جاسالىپ وتىر. بۇل مەكتەپ شەيح حاليفپەن كەلىسىم نەگىزىندە سونىڭ قاراجاتى ەسەبىنەن سالىندى. سول ءۇشىن وعان العىس ايتامىن», – دەدى قازاقستان پرەزيدەنتى.
ايدار ورىسباەۆ