وزبەكستاندا تاشكەنت – ءاندىجان اراسىندا قاتىنايتىن جولاۋشىلار پويىزى ءبىرىنشى رەت فەرعانا جازىعىمەن بايلانىستىراتىن «انگرەن – پاپ» ارالىعىنداعى ەلەكترلەندىرىلگەن جاڭا تەمىرجول جەلىسى ارقىلى ءجۇرىپ ءوتتى.
«ۋزبەكيستون تەمير يۋللاري» ءباسپاسوز قىزمەتىنىڭ حابارلاۋىنشا, ۇزىندىعى 123 شاقىرىمدى قۇرايتىن جاڭا ۋچاسكە قىتايلىق ارىپتەستەردىڭ قاتىسۋىمەن سالىنعان. سونىڭ ىشىندە ۇزىندىعى 19,2 شاقىرىم بولاتىن «قامشىق» توننەلى دە بار. ول قۇرىلىسىنىڭ كۇردەلىلىگى جاعىنان الەمدە – 8-ءشى, ۇزىندىعى جاعىنان 13-ءشى ورىن الادى. ال تمد ەلدەرى تەرريتوريالارىنداعى بىردەن-ءبىر وسىنداي نىسان بولىپ تابىلادى.
توننەلدىڭ باتىس پورتالى تەڭىز دەڭگەيىنەن 1324 مەتر, شىعىس پورتالى 1465 مەتر بيىكتە ورنالاسقان. جوبا جوسپارلانعان 36 ايدىڭ ورنىنا 32 ايدا سالىنىپ ءبىتتى. وسىناۋ وراسان زور جوبانى ىسكە قوسۋعا 3 مىڭنان استام تەمىرجولشى, 1 مىڭنان اسا قىتايلىق جۇمىسشىلار قاتىستى. ونىڭ جۇمىستارىنا 600-دەن استام قازىرگى زامانعى تەحنيكا تارتىلدى.
جاڭا تەمىر جول جەلىسى ءبىر جارىم مىڭ ادامعا جۇمىس تاۋىپ بەرىپ وتىر.
مۇرات ايتقوجا