ەۋروپا فۋتبول اسسوتسياتسياسى فەدەراتسياسى (ۋەفا) چەمپيوندار ليگاسى مەن ەۋروپا ليگاسىنىڭ 2018/19, 2019/20 جانە 2020/21 ماۋسىمدارداعى ءپىشىمىن وزگەرتۋ جونىندە شەشىم قابىلدادى. بىراق جارىس جۇيەسى بۇرىنعىسىنشا قالا بەرەدى. وزگەرەتىن وعان قاتىساتىن كوماندالاردى ىرىكتەۋگە قاتىستى بولادى. مۇنى وسى ۇيىمنىڭ ءباسپاسوز قىزمەتى حابارلادى.
ۋەفا ەۋروپا فۋتبولىنا مۇددەلى بارلىق جاقتاردىڭ قاتىسۋىمەن اقىلداستىق جۇرگىزدى. وسىعان وراي اتقارۋ كوميتەتىنىڭ ۇسىنىسىمەن بىرقاتار وزگەرىستەر ەنگىزدى.
ول وزگەرىستەر مىناداي جاقتاردى قامتيدى:
ۋەفا ەۋروپا ليگاسىنىڭ جەڭىمپازى چەمپيوندار ليگاسىنىڭ توپتىق كەزەڭىنە بىردەن جولداما الادى (قازىر ول تەك پلەي-وفف راۋندىنان كەيىن عانا كەلە الىپ ءجۇر).
رەيتينگىلەرى بارىنشا جوعارى ءتورت اسسوتسياتسيانىىڭ ءاربىرىنىڭ ءتورت كلۋبى چەمپيوندار ليگاسىنىڭ توپتىق كەزەڭىنە بىردەن تۇسەدى (قازىر بۇل تورتتىكتى يسپانيا, گەرمانيا, انگليا جانە يتاليا قۇراپ وتىر).
مۇندا ەرەجەلەر جىل سوڭىنا دەيىن ەكى ليگا بويىنشا دا جان-جاقتى جاسالىپ شىعادى.
جاڭا جۇيە كلۋبتاردىڭ كوەففيتسيەنتتەرىن ەسەپتەۋدەن تۇرادى: كلۋبتار تىكەلەي جەكە وزدەرىنىڭ كوەففيتسيەنتتەرى بويىنشا باعالانادى, ياعني اسسوتسياتسيالاردا جينالعان ورتاق ۇپايلار بۇدان كەيىن ولاردىڭ ناتيجەلەرىنە اسەر ەتە المايدى (تەك كلۋبتار كوەففيتسيەنتتەرى اسسوتسياتسيا كوەففيتسيەنتىنەن 1/5 بولىكتەن كەم بولعان جاعدايدا عانا).
كوەففيتسيەنتتەر ەسەپتەلگەن كەزدە كلۋبتاردىڭ بۇل تۋرنيردەگى تاريحي تابىستارى ەسەپكە الىنادى. چەمپيوندار ليگاسى مەن ەۋروپا ليگاسىندا جەڭىسكە جەتكەن كوماندالار قوسىمشا ۇپايلار الادى.
ەكى تۋرنيردە دە كلۋبتار مەن ليگالارعا بولىنەتىن قارجىلار ايتارلىقتاي ۇلعايتىلادى.
دامير قوجامقۇل