اسكەريلەردىڭ حالىقارالىق ويىندارى

رەسەيدە اسكەريلەردىڭ حالىق­ارالىق ويىندارى باس­تالدى. ونىڭ اشىلۋ سالتاناتى ماسكەۋ وبلىسىنىڭ «الابينو» پوليگونىندا ءوتتى. وعان قازاقستان تاراپىنان  قور­عانىس ءمينيسترى يمانعالي تاسماعامبەتوۆ قاتىستى. قور­عانىس ۆەدوم­ستۆوسىنىڭ باس­شىسى ەلىمىزدىڭ قارۋلى كۇش­تەرىنىڭ نامىسىن قورعايتىن قۇراما كوماندامەن جۇزدەسىپ, اسكەري قى­زمەتشىلەرگە الداعى باي­قاۋدا ساتتىلىك پەن جەڭىس تىلەدى. بيىلعى جارىسقا ازيا, ەۋروپا, افريكا جانە وڭتۇستىك امەريكانىڭ 20 مەملەكەتىنەن 120-عا جۋىق كوماندا قاتىسۋدا. قازاق­ستان اسكەريلەرى 23 باي­قاۋ­دىڭ 21 تۇرىنەن باق سىنايدى. اسكەريلەرىمىزدىڭ قۇراما كومانداسىندا ۇشقىشتار, تەڭىزشىلەر, دەسانتشىلار, جۇرگىزۋشىلەر, تانكىشىلەر مەن تەڭىز جاياۋ اسكەرلەرى, ينجەنەرلەر, دارىگەرلەر, اسپازشىلار, رادياتسيالىق, حيميالىق جانە بيولوگيالىق قورعاۋ ماماندارى, كينولوگتار, سۇڭگۋىرلەر, مەرگەندەر مەن ارتيللەرياشىلار بار. جارىس 13 تامىزعا دەيىن جالعاسادى. بيىلعى ويىندار رەسەي مەن قازاقستاننىڭ 20 اسكەري پوليگونىندا, ال تەڭىز بايقاۋلارى بالتىق, قارا جانە كاسپي تەڭىزدەرىنىڭ سۋ ايدىندارىندا بولادى. وسى جارىستارعا                           3 000-نان اسا اسكەري قىز­مەتشى قاتىسادى. ارميا حالىق­ارا­لىق ويىندارىنىڭ «ار­تيل­لەريالىق وق اتۋ شەبەرلەرى» مەن «مەر­گەن شەبى» بايقاۋى قازاق­ستان قارۋلى كۇشتەرىنىڭ «گۆاردەيسك» پوليگونىنىڭ اۋما­عىندا ءوت­كىزىلەدى. بۇل سىندار بۇگىن باستالادى. وندا ۇزدىك مەر­گەندەر مەن ارتيللەريا­شى­لار سىنعا تۇسەدى. داستان كەنجالين, «ەگەمەن قازاقستان»