اقمولا وبلىسىندا تەرگەۋشىگە پارا بەرمەكشى بولعان ازامات ستەپنوگورسك قالالىق سوتىنىڭ شەشىمىمەن ەندى سول ءۇشىن 600 000 تەڭگە ايىپپۇل تولەيتىن بولدى. بۇعان قوسا, كىنالىنى ءومىر بويىنا مەملەكەتتىك قىزمەتتە ىستەۋ قۇقىعىنان ايىرىلدى.
وقيعانىڭ باسى بيىلعى جىلعى اقپان ايىندا ستەپنوگور قالالىق ىشكى ىستەر ءبولىمىنىڭ اقكول اۋدانى, پريوزەرنوە اۋىلىنىڭ 62 جاستاعى تۇرعىنىنا قاتىستى ءىس قوزعاۋىنان باستالعان. كۇدىكتىگە زاڭسىز قارۋ, جارىلعىش زاتتار مەن قوندىرعىلاردى ساقتاپ, ساتىپ الۋ جانە تاسىمالداۋ بابى بويىنشا ءىس قوزعالعان.
قىلمىستىق ءىستى تەرگەۋ بارىسىندا ءبولىم تەرگەۋشىسى بيىلعى 12 ناۋرىزدا كۇدىكتىنىڭ ۇيىنە ءتىنتۋ جۇرگىزەدى. سونىڭ بارىسىندا ول تەرگەۋشىمەن جەكە قالعان كەزدە وعان پارا ۇسىنادى. سول كەزدە تەرگەۋشى پارادان باس تارتىپ, وعان پارا ۇسىنعانى ءۇشىن زاڭ الدىندا جاۋاپقا تارتىلاتىنىن ەسكەرتكەن. الايدا, ەر ادام قوياردا قويار بولماي, وزىنە قاتىستى قىلمىستىق ءىستى جاۋىپ تاستاۋدى وتىنەدى.
تەرگەۋشى مۇنىڭ سوڭىندا كۇدىكتىنىڭ ارەكەتىن اقمولا وبلىستىق ىشكى ىستەر دەپارتامەنتى وزىندىك قاۋىپسىزدىك باسقارماسىنا حابارلايدى.
كۇدىكتى 29 ناۋرىزدا ستەپنوگور قالالىق ىشكى ىستەر بولىمىنە جاۋاپ الۋعا شاقىرىلادى. تەرگەۋ ارەكەتى اياقتالعان سوڭ كۇدىكتى تاعى دا تەرگەۋشىگە پارا ۇسىنىپ, ونىڭ جۇمىس ۇستەلىندەگى قاعازدىڭ استىنا 30 000 مىڭ تەڭگە قويادى.
سول جەردە ىشكى ىستەر دەپارتامەنتى جەكە قاۋىپسىزدىك باسقارماسى مەن جەمقورلىققا قارسى قىزمەتتىڭ قىزمەتكەرلەرى كۇدىكتىنى ۇستاپ, ونىڭ ۇستىنەن قىلمىستىق كودەكستىڭ 367-بابى, 1-ءبولىمى بويىنشا قىلمىستىق ءىس قوزعالادى.
«وسىعان وراي ستەپنوگور قالالىق سوتى كىنالىگە جازا رەتىندە 600 000 ايىپپۇل سالىپ, وعان قوسا ءومىر بويىنا مەملەكەتتىك قىزمەتتە ىستەۋ قۇقىعىنان ايىردى», - دەپ كورسەتىلگەن حابارلامادا.
باقبەرگەن امالبەك