اتىراۋدا ءبىر جاس جىگىت كوشەدە, جۇرتتىڭ كوز الدىندا وزىنە ءوزى پىشاق سالدى. ينتسيدەنت 30 شىلدە, سەنبى كۇنى قالاداعى «راحات» شاعىن اۋدانىندا ورىن العان.
كوز كورگەندەر سول ساتتە بولعان وقيعانى ۆيدەوعا ءتۇسىرىپ الىپ, ونى Instagram-داعى پاراقشالارىنا جاريالاعان. «ءبىر ەر كىسى ءوزىن ءوزى جارىپ جىبەرمەك بولدى! شاماسى, ءومىر سۇرۋدەن جالىققان-اۋ!», دەپ جازدى ولار روليكتەگى ماتىندەرىندە.
ۆيدەو كادرلارىنان جارتىلاي شەشىنىپ العان جاس جىگىتتىڭ الدىمەن پىشاقپەن ءوزىنىڭ ىشىنەن تارتىپ وتكەنى, سوسىن تاماعىن ورىپ جىبەرمەك بولعانى كورىنىپ تۇر.
كەيىن وبلىستىق ىشكى ىستەر دەپارتامەنتىندەگىلەر بولعان وقيعاعا تۇسىندىرمە بەردى. تەكسەرە كەلگەندە, بەلگىسىز ەكەۋدىڭ قالانىڭ ءبىر تۇرعىنىن ۇرىپ-سوعىپ, ۇيالى تەلەفونى مەن 15 مىڭ تەڭگەسىن تارتىپ العانى انىقتالدى. زارداپ شەگۋشى وسىعان بايلانىستى قالالىق ىشكى ىستەر باسقارماسىنا شاعىم جازادى.
كەلەسى كۇنى وبلىس ورتالىعىنداعى بازارلاردىڭ ءبىرىنىڭ كۇزەتشىلەرى ەكى جىگىتتىڭ ۇيالى تەلەفون ساتپاقشى بولىپ جۇرگەندەرىن حابارلايدى. كۇزەتشىلەر ءتارتىپ ساقشىلارى كەلگەنشە كۇدىكتىلەردى ۇستاپ تۇرادى. ولاردىڭ ءبىرى سول كەزدە قولدان سىتىلىپ شىعىپ كەتىپ, باكى مەن پىشاققا ۇقساس ءبىر زاتتى تاماعىنا تاقاپ, پوليتسەيلەردەن جانىنا جاقىنداماۋدى تالاپ ەتەدى. وسى قاربالاستى پايدالانىپ قالعان ەكى كۇدىكتى سودان سوڭ قاشىپ كەتەدى. كەيىنىرەك ولاردىڭ ءبىرى قايتا قولعا تۇسەدى. ال جۇرت الدىندا ءوزىن باۋىزداپ تاستاماق بولعانى قازىر ىزدەستىرىلىپ جاتىر.
ءتارتىپ ساقشىلارى ەكى كۇدىكتىنىڭ دە كىمدەر ەكەنىن انىقتادى. ولاردىڭ ۇستىنەن قىلمىستىق ءىس قوزعالدى.
جولداسبەك شوپەعۇل
https://youtu.be/wIKZXddXLXM