[caption id="attachment_53312" align="aligncenter" width="560"] فوتو: askeri.sud.kz[/caption]
ەلىمىزدىڭ اسكەري سوتتارى سالاسىندا زاماناۋي اقپاراتتىق تەحنولوگيالار كەڭىنەن قولدانىلا باستادى. اسكەري سوت توراعاسى ساكەن ابدۋللاەۆ بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە مالىمدەدى.
«100 ناقتى قادام» ۇلت جوسپارىنىڭ 20-قادامىندا بارلىق سوت ۇدەرىستەرىن دىبىستىق جانە بەينە تىركەۋ قۇرىلعىلارىمەن قامتاماسىز ەتۋ مىندەتى قويىلعان بولاتىن. بۇل – سوت تورەلىگىنىڭ اشىقتىعى مەن ونىڭ قولجەتىمدىلىگىن ارتتىراتىن قادامداردىڭ ءبىرى. ساكەن جۇسىپاحمەت ۇلىنىڭ ايتۋىنشا, جىلدىڭ العاشقى جارتىسىندا اسكەري سوت پروتسەستەرىنىڭ 99,4% دىبىستىق جانە بەينە تىركەۋ جۇيەسىن قولدانۋ ارقىلى قارالعان.
«بۇگىنگى كۇنى اسكەري سوتتاردىڭ سوت وتىرىسى زالدارىنىڭ 69,6% دىبىستىق جانە بەينە تىركەۋ جۇيەسىمەن جابدىقتالعان. جىل سوڭىنا دەيىن بارلىعىن تولىق جابدىقتاۋ جوسپارلانىپ وتىر», – دەيدى اسكەري سوت توراعاسى.
سونىمەن قاتار, سوت وتىرىستارىنا قاتىسۋشىلاردى حاباردار ەتۋ ءىسى دە اۆتوماتتاندىرىلعان. بۇل جۇمىس بۇگىندە سوت كابينەتى, سمس-حابارلامالار, گيبريدتىك ەلەكتروندىق پوشتالار, سونداي-اق مەملەكەتتىك ورگاندار اراسىنداعى ەلەكتروندىق قۇجات اينالىمى جۇيەلەرى ارقىلى جۇزەگە اسىرىلۋدا.
نۇرلىبەك دوسىباي