قارۋدى قاتار ۇستاپ, اسكەري قىزمەتىن وتەپ جۇرگەن ەگىزدەر تۋرالى سىر
«وتان – وتتان دا ىستىق». بۇل ءتامسىل ءاربىر جاۋىنگەر جۇرەگىندە ورىن السا, وندا الىنبايتىن قامال, جەڭىلمەيتىن جاۋ بولماسا كەرەك. اسكەر – ساربازدار بويىنا ءدال وسى قۇندىلىقتاردى قۇيۋدا اسا ماڭىزدى مەكتەپ. وڭ مەن سولىن تانىپ ۇلگەرگەن بوزبالا جالىن اتقان شاقتىڭ جالعىز-اق جىلىن اسكەرگە ارناسا, ارعى عۇمىرى وزدىگىنەن رەتكە كەلىپ, جۇيەسىن تاپپاق. بۇل اسكەر قاتارىندا بولعان اركىمنىڭ دە قوسىلا قۇپتايتىن شىندىعى.
جاقىندا قازاقستان رەسپۋبليكاسىنىڭ ۇلتتىق ۇلانى 6654 اسكەري ءبولىمى وسى كوكتەمدە اسكەر قاتارىنا شاقىرىلعان جاس بۋىن جاۋىنگەرلەردى قابىلدادى. اتىراۋ, اقتاۋ, استانا جانە اقمولا وبلىسىنان شاقىرىلعان جاۋىنگەرلەر تاۋەلسىز ەلىمىزدىڭ ايبىندى اسكەرىنىڭ قاتارىن تولىقتىردى. اسكەري ورتا ولاردى بىركەلكى ءتارتىپ تۇعىرىنا قوندىردى, «مەن» دەگەن تۇسىنىكتەن گورى «ءبىز» دەگەن بىرلىك بيىگىنە شاقىردى.
«وتان» جانە «بورىش». وسى ۇعىمدار ەگىز دەپ بىلسەك, اسكەر قاتارىنا شاقىرىلعان ساربازدار ساپىندا بىرىنەن ءبىرىن اجىراتقىسىز ەگىزدەردىڭ بارى وسى كيەلى ءتۇسىنىككە ەرەكشە ەكپىن بەرەتىندەي. ەندى شە... ەكى بىردەي ەگىزىن اسكەر قاتارىنا اتتاندىرعاندا انا مەن اكەنىڭ وسى ۇعىمدارعا دەگەن كوزقاراستارى اسا قاستەرلى بولعاندىعىن اڭعارۋ قيىن ەمەس. ولاردىڭ ەسىمدەرى مۇسا جانە مۇحاممەد دۇيسەنوۆتەر. قوس پايعامباردىڭ ەسىمىن ارقالاعان ەگىز جاندار ءبىر-بىرىنەن اينىماي قالعان. العاشقىدا قايسىسى مۇسا, قايسىسى مۇحاممەد ەكەندىگىن ايىرا الماي بولىمشە كومانديرى قينالعانىن ايتتى. دەسە دە, امالىن تاۋىپ بۇيرىقتى ەكەۋىنە بىردەي بەرىپ, جۇمسايتىن بولعان. ويتكەنى, بىرەۋىن جۇمساسا سىڭارىن ىزدەگەن ول تاپسىرىلعان جۇمىستى الاڭداي ءجۇرىپ شالا-پۇلا اتقارا سالاتىندىعىن اڭعارعان. ال بىرىكسە ءبىر كىسىدەي تىندىرىپ تاستايدى.
اقمولا وبلىسى, كوكشەتاۋ قالاسىنان كەلگەن مۇسا مەن مۇحاممەدتىڭ ەسىمدەرىن اجەلەرى گۇلجاميلا قويعان. باۋىرىنا باسىپ, اجەلىك مەيىرىمىن قوس قوزىسىنا اياماي توككەن انا ولاردى قازاقى بولمىس جانە يمان ىزگىلىگىندە تاربيەلەگەن ەكەن. بەس ۋاقىت نامازىن قازا قىلمايتىن گۇلجاميلا اجەي ەگىزدەردىڭ ەسىمدەرىن ولاردىڭ مۇحاممەد (س.ع.س) پايعامبارىمىز تۋعان ءماۋلىت ايىندا دۇنيەگە كەلۋىنە بايلانىستى قويعان. ەگىزدەردىڭ توسەكتەرى دە, ساپتاعى ورىندارى دا قاتار. ەكەۋى دە 9-شى سىنىپتان كەيىن كوكشەتاۋ قالالىق جوعارى تەحنيكالىق مەكتەبىندە وقىپ, ۇزدىك بىتىرگەن. بولاشاق ماماندىقتارى – قۇرىلىس بۇيىمدارىن ءوندىرۋشى تەحنولوگ.
اسكەرگە دەيىن دە ازىن-اۋلاق ۋاقىت كۇزەت سالاسىندا قىزمەت ىستەگەن ەگىزدەر قارۋدى قولدانۋ, شاشۋ جانە جيناۋ ماشىقتارىن ويداعىداي مەڭگەرگەن ەكەن. وسىنىڭ دالەلى, «توز-8» قارۋىنان اتۋ جاتتىعۋلارىندا اعايىندىلاردىڭ ەكەۋى دە ويداعىداي ناتيجە كورسەتتى. الداعى ۋاقىتتا ەگىزدەر كەلىسىمشارت نەگىزىندە اسكەري سالادا قىزمەت ەتۋگە نيەتتى. ويتكەنى, ءدال مۇسا مەن مۇحاممەدتەي – وتان مەن مىندەت تە ەگىز ۇعىمدار ەكەنى ايقىن. ءبىز ءوز تاراپىمىزدان وسى ەگىزدەردىڭ انت قابىلداپ, قىزمەتكە كىرىسكەن ساتتەرىنەن جانە انا مەن اكە قۇشاعىنا قايتار كۇندەرىنە دەيىن تۇراقتى تۇردە باقىلاپ, ماقالا جاريالاپ وتىرۋدى ءجون سانادىق. ويتكەنى, اسكەري عۇمىر كىم-كىمگە بولسا قىزىق ءارى ەگىزدەردىڭ ءار قادامى وسى اسكەري ءومىردىڭ قالتارىس-بۇلتارىسىن كەڭىنەن اشا تۇسەتىن بولادى.
ادىلەت سارىباەۆ, كىشى سەرجانت
الماتى
سۋرەتتەردى تۇسىرگەن اۆتور