چل: «استانا» كەلەسى كەزەڭگە ءوتتى

«استانا» – «جالگيريس» 2:1 ماتچ قاھارمانى – مارين انيچيچ چەمپيوندار ليگاسىنىڭ ىرىكتەۋ كەزەڭىندەگى ويىندا ەلوردالىق «استانا» فۋتبول كلۋبى ليتۆالىق «جالگيريسپەن» كەزدەسىپ, 2:1 ەسەبىمەن جەڭىسكە جەتتى. بۇل ماتچتى ەلوردالىق كلۋبتىڭ قورعاۋشىسى مارين ءانيچيچتىڭ بەنەفيسى دەسەك ارتىق ايتپايمىز. «استانا» ساپىندا ەكى گولدىڭ ەكەۋىن دە ماقتاۋلى شابۋىلشىلار نەمەسە جارتىلاي قورعاۋشىلار ەمەس, ءدال سول انيچيچ سوقتى. باس باپكەر ستانيمير ستويلوۆ ماتچ الدىنداعى ءباسپاسوز ءماس­ليحاتىندا ءوز شاكىرتتەرى نەعۇر­لىم تەزىرەك ەسەپ اشسا, سوعۇرلىم پسيحولوگيالىق قىسىمنان ارىلىپ, ەركىن ويناۋعا مۇمكىندىگى ارتاتىنىن ايتقان بولاتىن. سىرت الاڭدا گول سوعا الماي, تەڭ ناتيجەمەن قايتقان ەلوردالىق كلۋبتىڭ ويىنشىلارى ماتچ باستالىسىمەن شابۋىلداۋعا كوشتى. الدىمەن 3-مينۋتتا تەپكەن ايىپ دوبى قاقپادان بيىك كەتكەن مارين انيچيچ 31-مينۋتتا سونىڭ ەسەسىن قايتاردى. بۇرىشتان بەرىلگەن دوپقا قارعىعان بوسنيالىق قورعاۋشى باسىمەن سوققى جاساپ, ليتۆالىق كلۋبتىڭ قاقپاشىسىن قاپى قالدىردى. ەكىنشى تايمنىڭ باسىندا برا­زيليالىق ەليۆەلتو ايىپ الاڭىنا ەنەر ۇرىمتال تۇستان سوققى جاساپ, ەسەپتى تەڭەستىرىپ كەتكەن. «استانا» جانكۇيەرلەرىنىڭ كوڭىلىن كۇپتى قىلعان وسى ەسەپ قوسىمشا ۋاقىتقا دەيىن ساقتالدى. ستاديونعا جيىلعان ەلوردالىق جانكۇيەرلەردىڭ قۇلاق تۇندىرا قيقۋلاعان قولداۋى دەمەۋ بولدى ما, ايتەۋىر, «استانانىڭ» جىگىتتەرى سوڭعى سەكۋندقا دەيىن جانىن سالدى. اقىرى 92-ءشى مينۋتتا ءدال سول انيچيچ تاعى دا بۇرىشتاما سوققىدان كەيىن قاقپا الدىندا بولعان قاربالاستا دوپتى تورعا توعى­تىپ ۇلگەردى. ارنۇر اسقاروۆ, «ەگەمەن قازاقستان» سۋرەتتەردى تۇسىرگەن ەرلان وماروۆ