استاناداعى انا مەن بالا ۇلتتىق عىلىمي ورتالىعىندا ەل تاۋەلسىزدىگىنىڭ 25 جىلدىعىنا وراي, «بايقا جولدا, بالاقاي!» تاقىرىبىمەن تەاترلاندىرىلعان قۋىرشاقتار قويىلىمى ءوتتى. قازاقستان حالقى اسسامبلەياسى قوعامدىق قورىنىڭ «شىن جۇرەكتەن» قايىرىمدىلىق تەلەمارافونى اياسىندا ۇيىمداستىرىلعان سالتاناتتى شارا لەيكوز, ونكولوگيا جانە اۋىر سىرقاتقا شالدىققان بالالاردى قولداۋعا باعىتتالعان.
قامكوڭىل انا مەن سىرقات بالاعا ەرەكشە قۋانىش سىيلاۋعا ارنالعان جيىندا ءسوز العان قازاقستان حالقى اسسامبلەياسىنىڭ قوعامدىق قورى ديرەكتورىنىڭ ورىنباسارى تالعات بالپىشەۆ مۇنداي قايىرىمدىلىق شارالارمەن 6 جىلدان بەرى بەلسەندى اينالىسىپ كەلە جاتقاندىعىن ايتادى. «ءبىز تاپ وسى انا مەن بالا عىلىمي ورتالىعىنىڭ ونكولوگيا بولىمىنە تۇراقتى ءتۇردە ۇدايى كومەكتەسىپ تۇرامىز. بيىلدىڭ وزىندە بۇل ورتالىققا وسىمەن ءۇشىنشى كەلۋىمىز. بۇل جولى ءبىز سۇيەك كەمىگى سىرقاتىنا ۇشىراعان جانعا دالمە-ءدال سايكەس كەلەتىن رەسەيلىك ازاماتتىڭ دونورلىعىن قامتاماسىز ەتۋدەمىز», – دەدى ول.
جالپى, قحا قوعامدىق قورى ەل ىشىندە شۇعىل كومەككە مۇقتاج جاندارعا اركەز قولۇشىن سوزىپ كەلەدى. اسىرەسە, قور قىزمەتكەرلەرى الەۋمەتتىك جاعدايى از قامتىلعان وتباسى بالالارى مەن اۋىر دەرتكە ۇشىراپ, شيپا ىزدەگەن جانداردىڭ جانىنان تابىلۋعا تىرىسادى. سونداي-اق, بۇل ۇيىم ازاماتتارعا ماتەريالدىق قاجەتتىلىكتەردى وتەۋمەن عانا شەكتەلمەۋدە. ويىن-ساۋىق باعىتىنداعى سالتاناتتى جيىندارعا قۋىرشاق تەاترلارىن قاتىستىرۋ ارقىلى ءبۇلدىرشىندەردى شاتتىققا كەنەلتۋدە. ولاردىڭ اتا-انالارىمەن دە جاقىن ارالاسىپ, پسيحولوگيالىق تۇرعىدا قولداۋ بىلدىرۋگە اركەز دايىن.
ال مەرەكەلىك جيىنعا شاڭىراق يەسى رەتىندە قاتىسقان «UMC» كورپوراتيۆتىك قورى» فيليالىنىڭ ديرەكتورى بەكباي حايرۋللين مۇنداي يگى ءىستى قولداپ, قۋاتتايتىندىعىن ءبىلدىردى. «ءبىز, ارينە, ناۋقاس بالالارىمىزدىڭ تەزىرەك ساۋىعىپ كەتۋىنە تىلەۋلەس بولىپ, وسىنداي كومەك كورسەتىلىپ جاتقانىنا ءدان ريزامىز. سوندىقتان دا ۇيىمداستىرۋشىلارعا زور العىسىمدى بىلدىرەمىن. ال ەندى جۋىردا عانا ورتالىق 2016-2017 جىلدارعا گەموپوەتيكالىق باعانالى جاسۋشا (گبج) دونورلىعىنىڭ حالىقارالىق تىزىمىنە اۆتوريزاتسيالاۋ ۇدەرىسىن جۇرگىزدى. سونىڭ اياسىندا قحا قوعامدىق قورىنىڭ تىكەلەي كومەگىمەن رەسەيدەن دونور تابىلىپ, ەندى ونى جۇزەگە اسىرۋ مۇمكىندىگى تۋىپ وتىر», – دەدى بەكباي ەسلام ۇلى.
ايتا كەتەيىك, بۇگىندە «UMC» كورپوراتيۆتىك قورىنا قاراستى انا مەن بالا عىلىمي ورتالىعى فيليالىندا 100-دەن استام بالا ءتۇرلى دەڭگەيلى دەرتكە شالدىعىپ, ەم-دوم قابىلداۋدا. ال جاسوسپىرىمدەردى سىرقات ازابىنان اراشالايتىن مۇنداي قىزمەت كورسەتۋ رەسپۋبليكا بويىنشا استانا مەن الماتىدا عانا ىسكە اسىرىلادى. ب.ءحايرۋلليننىڭ ايتۋىنشا, وتكەن اپتادا ەكى بالاعا وتە كۇردەلى وپەراتسيا جاسالعان. «ءبىز ءالى تۋرا وسىنداي دياگنوزبەن جاتقان 5-6 بۇلدىرشىنگە وپەراتسيا جاساۋىمىز كەرەك», – دەدى ول.
مەملەكەت باسشىسىنىڭ ارنايى جارلىعىمەن قۇرىلىپ, جۇمىس ىستەپ جاتقان بۇل ورتالىق بۇگىندە قازاقستاننىڭ تاۋەلسىزدىك جىلدارىنداعى ەڭ تاڭداۋلى جەتىستىكتەردىڭ ءبىرى بولىپ سانالادى. ويتكەنى, بۇل جەر ۇلت ساۋلىعىن نىعايتۋعا قوماقتى ۇلەس قوسىپ قانا قويماي, الەمدىك دەڭگەيدەگى ەڭ كۇردەلى وپەراتسيالار دا جۇزەگە اسىرىلاتىن وزىق ۇلگىلى ورتالىققا اينالىپ ۇلگەردى.
نۇرلىبەك دوسىباي,
«ەگەمەن قازاقستان»
استانا