كەشە ورتالىق كوممۋنيكاتسيالار قىزمەتىندە وتاندىق تاۋارلاردى قولداۋعا قاتىستى ءباسپاسوز ءماسليحاتى ءوتتى. وعان «NADLoC جۇيەلى قولداۋ شارالارى مەن جەرگىلىكتى ۇلەستىڭ يدەولوگياسىن دامىتۋ جونىندەگى ورتالىقتىڭ» ديرەكتورى اسەمگۇل بالىقباەۆا مەن «قازاقستاندا جاسالعان» تاۋار وندىرۋشىلەر مەن كاسىپكەرلەر قاۋىمداستىعىنىڭ اتقارۋشى ديرەكتورى تالعات اسىلباەۆ قاتىستى.
بريفينگ وتاندىق تاۋار وندىرۋشىلەردى قولداۋ شارالارىنا قاتىستى ءوتتى. «NADLoC قازىر وتاندىق تاۋار وندىرۋشىلەرگە بىرقاتار قولداۋ كورسەتىپ كەلەدى. بىرىنشىدەن, اقپاراتتىق قولداۋ جاسايدى. سونداي-اق, قازاقستاندىق ۇلەس تۋرالى ينتەرنەت پورتال اشىلدى. بۇلارمەن بىرگە يندۋستريالاندىرۋ كارتاسىنا ەنگەن جوبالارعا ساراپتاما جۇرگىزىپ وتىرامىز», دەگەن ورتالىق ديرەكتورى قازىرگى كەزدە وتاندىق تاۋارلاردى ساتىپ الۋ ارقىلى ءوز كاسىپكەرلەرىمىزدى قولداۋ اسا قاجەت ەكەنىن جەتكىزدى.
ءوز ەلىمىزدە وندىرىلەتىن تاۋارلاردى ەل اۋماعىندا ساتۋ بويىنشا دا بىرقاتار جۇمىستار اتقارىلىپ جاتقانىن تىلگە تيەك ەتىپ, ءاربىر قازاقستاندىق ەل ەكونوميكاسىنىڭ وركەندەۋىنە ءوز ۇلەسىن قوسۋى كەرەكتىگىن ايتتى. «ءاربىرىمىزدىڭ سانامىزدا قازاقستاندىق ءونىمدى ساتىپ الساق, ەلىمىزدىڭ دامۋىنا, ەكونوميكامىزعا ۇلەس قوسىپ جاتىرمىن دەگەن وي قالىپتاسۋى كەرەك. ەلىمىزدىڭ ءوسىپ-وركەندەۋى وسىعان دا بايلانىستى. سوندىقتان, بار بولسا مىندەتتى تۇردە قازاقستاندا جاسالعان ءونىمدى ساتىپ الىڭىزدار», دەگەن ءا.بالىقباەۆا ءوزى ءدال قازىر قانداي قازاقستاندىق تاۋاردى تۇتىنىپ جۇرگەنى جونىندەگى سۇراققا قينالا جاۋاپ بەردى. دالىرەك ايتساق, ناقتى ەشتەڭە ايتا العان جوق.
ءباسپاسوز ءماسليحاتىنىڭ ەكىنشى بولىمىندە سپيكەرلەر جۋرناليستەردى قىزىقتىرعان سۇراقتارعا جاۋاپ بەردى. تىلشىلەردى نەگىزىنەن قازاقستاندىق قانداي تاۋارلار ەكسپورتتالىپ جاتقانى تولعاندىرادى ەكەن. وكىنىشكە قاراي, جۋرناليستەرگە ناقتى اقپاراتتار بەرۋگە دايىندالىپ كەلمەگەن سپيكەرلەر داعدارىپ قالدى. ايتكەنمەن, ءا.بالىقباەۆا «قازاقستان» شوكولادى» دەپ جاۋاپ بەردى. ال, تاۋار وندىرۋشىلەردىڭ قاۋىمداستىعىندا اتقارۋشى ديرەكتور لاۋازىمىن اتقارىپ وتىرعان ت.اسىلباەۆتىڭ بۇل سۇراقتاردىڭ ەشقايسىنا الىپ-قوسارى بولمادى.
نۇرباي ەلمۇراتوۆ,
«ەگەمەن قازاقستان»