ساردارلار ساپقا تۇردى

ازاماتتىق قورعانىس سالاسىنداعى مامانداردى دايارلايتىن ەلىمىزدەگى جالعىز جوعارى وقۋ ورنى – كوكشەتاۋ تەحنيكالىق ينستيتۋتىندا جاس وفيتسەرلەردىڭ كەزەكتى,  18-ءشى شىعارىلىمى وتكىزىلدى. «تاۋەلسىزدىك» الاڭىنداعى سالتاناتتى شاراعا قازاقستان رەسپۋبليكاسى ىشكى ىستەر مينيس­ترىنىڭ ورىنباسارى يۋري يلين, اقمولا وبلىسى اكىمىنىڭ ورىنباسارى نۇرلان نۇركەنوۆ, قۇر­مەتتى قوناقتار مەن اتا-انالار قاتىستى. ءبىلىم ورداسىنىڭ باستىعى ازاماتتىق قورعانىس پولكوۆنيگى سىرىم ءشارىپحانوۆ يۋري يلينگە كۇندىزگى وقۋ ءبولىمىنىڭ تۇلەك­تەرىن شىعارىپ سالۋ سالتاناتىنا ينستيتۋتتىڭ دايىن ەكەندىگىن باياندادى. ۆيتسە-مينيستر مەن وبلىس اكىمىنىڭ ورىنباسارى, توتەنشە جاعدايلار قىزمەتىنىڭ ارداگەرلەرى جاس وفيتسەرلەردى قۇتتىقتاپ, ال­داعى قىزمەتتەرىنە تابىستار تىلەدى. ال اتا-انالار اتىنان سويلەگەن ەلەۋسىز قۇلماعامبەتوۆ پەن وقۋدى ۇزدىك بىتىرگەن لەيتەنانت بەكسۇلتان راحىمباەۆ قازاقستان تاۋەلسىزدىگىنىڭ 25 جىلدىعى اتاپ وتىلەتىن جىلدا ۇلكەن ءومىر جولىنا جولداما بەرگەن ينستيتۋتتىڭ وقىتۋشى-پروفەسسورلار قۇرامىنا العىستارىن ءبىلدىردى. بيىل كوكشەتاۋ تەحنيكالىق ينستيتۋتىن 102 تۇلەك اسكەري ءىس جانە قاۋىپسىزدىك باكالاۆرىنىڭ «ءورت قاۋىپسىزدىگى» ماماندىعى بويىنشا ءبىتىرىپ وتىر. سونىمەن قاتار, رەسەي تجم مەملەكەتتىك ورتكە قارسى قىزمەت اكادەمياسىنا جانە ازاماتتىق قورعانىس اكادەمياسىنا ينستيتۋت اتىنان جىبەرىلگەن 19 كۋرسانت جوعارى ءبىلىم الىپ شىقتى. بۇعان قوسا, قازاقستان مەن قىرعىزستاننىڭ حالىقارالىق كەلىسىمدەرى بويىنشا قىرعىزستاننىڭ تجم ءۇشىن تۇڭعىش رەت ەكى ماماندىق بويىنشا ينجەنەر-وفيتسەرلەردىڭ دايارلانعانىن ينستيتۋت ءومىرىن­دەگى ەرەكشە وقيعا دەۋگە بولادى. بارلىق تۇلەكتەر ەلىمىزدىڭ وڭىرلەرىندە ورنالاسقان قازاق­ستان رەسپۋبليكاسى ىشكى ىستەر مي­نيسترلىگى توتەنشە جاعداي­لار كوميتەتىنىڭ ايماقتىق ءبولىم­شەلەرىنە جولداما الدى. تۇلەكتەرگە لەيتەنانت پوگون­دارى مەن ديپلومدارى تابىس ەتىلدى. كوكشەتاۋ تەحنيكالىق ينستي­تۋتىنداعى تانىمدىق ءداستۇر­لەردىڭ ءبىرى جاۋىنگەرلىك تۋمەن قوشتاسۋ بولىپ تابىلادى. 2016 جىلعى تۇلەكتەر اتىنان جاۋىن­گەرلىك تۋمەن قوشتاسۋ قۇقىعى ازاماتتىق قورعانىس لەيتانانتى ابىلاي بايانوۆقا بەرىلدى. ول – 4 جىل بويى كۋرس ستارشيناسىنىڭ كومەكشىسى بولىپ, كۋرستا جانە ينستيتۋتتا وتكىزىلگەن بارلىق ءىس-شارالارعا بەلسەنە قاتىسقان كۋرسانتتاردىڭ ءبىرى. سالتانات ءداستۇرلى «وفي­تسەرلىك بيمەن» اياقتالدى. باقبەرگەن امالبەك, «ەگەمەن قازاقستان» كوكشەتاۋ