كەشە مەملەكەت باسشىسى نۇرسۇلتان نازارباەۆ استانادا يندۋستريالىق دامۋ باعدارلاماسىن جۇزەگە اسىرۋ كەزىندە سالىنعان بىرقاتار نىساندا بولدى
مەملەكەت باسشىسى الدىمەن «استانا» كولىك-لوگيستيكا ورتالىعىنا باردى. وندا ورتالىق جۇمىسىمەن تانىسىپ, جەڭىلدەتىلگەن كەدەندىك رەسىمدەۋ ايماعىن كوردى. جالپى اۋماعى 46 گەكتار «استانا» كولىك-لوگيستيكا ورتالىعى تەرمينالدىق وڭدەۋ ينفراقۇرىلىمى بار قازاقستانداعى «ا» ساناتىنداعى ءىرى ورتالىق بولىپ وتىر. بۇل حالىقارالىق جانە رەسپۋبليكالىق جۇك اعىمىنا قىزمەت كورسەتۋ, سونداي-اق, تاۋارلاردىڭ قالا مەن وڭىرلەرگە تاراتىلۋى ءۇشىن قويما جانە ىلەسپە قىزمەتتەر ۇسىنۋ ماقساتىمەن قۇرىلدى. ورتالىقتىڭ قويما كەشەندەرى قويما شارۋاشىلىعىن جۇرگىزۋدىڭ زاماناۋي تالاپتارىنا ساي كەلەدى جانە تيەۋ-ءتۇسىرۋ ايماعىنىڭ وتكىزۋ قابىلەتىن كۇنىنە 1000 پاللەتكە دەيىن ارتتىرۋعا مۇمكىندىك بەرەتىن جاڭا قۇرىلعىلارمەن جابدىقتالعان. جوبانى ىسكە اسىرۋ اياسىندا استانا مەن شىمكەنتتە لوگيستيكالىق ورتالىقتار جەلىسىن قۇرۋدان باسقا, قورعاس, اقتوبە, الماتى ءجانە پاۆلودار قالالارىندا كولىك-لوگيستيكا كەشەندەرىن سالۋ جانە ىسكە قوسۋ كوزدەلگەن.
پرەزيدەنت ورتالىقتى ارالاعان سوڭ كاسىپورىننىڭ ەڭبەك ۇجىمى وكىلدەرىمەن جۇزدەستى. ولارمەن اڭگىمە بارىسىندا ەلباسى ەلدىڭ يندۋستريالىق دامۋىندا كولىك-لوگيستيكا قىزمەتتەرى نارىعى ماڭىزدى ءرول اتقاراتىندىعىنا توقتالدى.
«سىرتقى ەكونوميكالىق قىزمەت وكىلدەرى بۇرىن قۇجاتتارىن ءۇش تاۋلىكتە رەسىمدەيتىن, ال مۇندا ول جەڭىلدەتىلگەن, 1 ساعاتتان 3 ساعاتقا دەيىن عانا ۋاقىت الادى. ءبىز استانادا تاۋار وڭدەۋ ءجونىنەن ورتالىق ازيا عانا ەمەس, كاۆكاز بەن ءسىبىردى قوسا العاندا ەڭ ءىرى لوگيستيكالىق حاب سالدىق. ول قازىردىڭ وزىندە 70 پايىز جۇكتەمەمەن جۇمىس ىستەپ تۇر. بۇل – ءبىزدىڭ يندۋستريالىق باعدارلامامىز بەن ينفراقۇرىلىمدىق دامۋىمىزداعى اۋقىمدى ءىس», دەدى ن.نازارباەۆ.
بۇدان سوڭ مەملەكەت باسشىسى «GLB» ءۇي قۇرىلىسى كومبيناتىندا بولدى. مەملەكەت باسشىسى نىساندى ارالاۋ بارىسىندا كومبيناتتىڭ ارماتۋرا جانە قالىپتاۋ تسەحتارىنىڭ جۇمىسىمەن تانىستى, سونداي-اق, كورمە پاۆيلونىن قاراپ شىقتى. نۇرسۇلتان نازارباەۆ مەملەكەتتىك تۇرعىن ءۇي باعدارلاماسىن جۇزەگە اسىرۋ بارىسىندا كاسىپورىننىڭ وندىرىستىك قۋاتىن كەڭىنەن پايدالانۋ قاجەتتىگىنە نازار اۋداردى. ەلباسى 1200-گە جۋىق ادامدى جۇمىس ورنىمەن قامتاماسىز ەتىپ وتىرعان كومبيناتتىڭ الەۋمەتتىك ماڭىزىن ايرىقشا اتادى.
وندىرىستىك 8 تسەحتان تۇراتىن «GLB» ءۇي قۇرىلىسى كومبيناتى ءىرى پانەلدى جانە كاركاس-جيناقتاۋ قۇرىلىسى ءۇشىن تەمىر-بەتون بۇيىمدارىنىڭ بارلىق ءتۇرىن شىعارادى. جوبا «بيزنەستىڭ جول كارتاسى-2020» باعدارلاماسى اياسىندا ىسكە اسىرىلدى.
جالپى اۋماعى 15 گەكتاردى قامتيتىن كاسىپورىن گەرمانيا مەن اۆستريادا شىعارىلعان زاماناۋي جوعارى تەحنولوگيالىق قۇرىلعىلارمەن جابدىقتالعان. كومبيناتتىڭ جەتىلدىرىلگەن تەحنولوگيالىق ۇدەرىسى جىلىنا قۇرىلىس نىساندارىنىڭ 250 مىڭ شارشى مەترگە دەيىنگى اۋماق ونىمدىلىگىن قامتاماسىز ەتەدى.
ءونىمدى ىسكە اسىرۋ كولەمى جونىنەن جىلىنا 130 000 تەكشە مەتر تەمىر-بەتون بۇيىمدارى وندىرىلەدى. ەلباسى, سونداي-اق, «تۇلپار-تالگو» جشس-ءتىڭ جولاۋشىلار ۆاگونىن شىعاراتىن زاۋىتتا دا بولدى. وندا زاۋىتتىڭ يندۋستريالىق پاركى جۇمىسىمەن تانىستى. پرەزيدەنتكە تەمىرجول ماشينالارىن جاساۋ سالاسىنىڭ ءوسىم قارقىنى مەن جۇردەك قوزعالىستى دامىتۋ باعدارلاماسى تۋرالى باياندالدى.
كاسىپورىننىڭ وندىرىستىك ورىنجايلارىنىڭ جالپى اۋماعى – 31 مىڭ شارشى مەتر, وندىرىستىك قۋاتى – جىلىنا 150 ۆاگون. ەۋروپالىق ساپا ستاندارتتارىنا ساي وزىق تەحنولوگيالار مەن ماتەريالداردى قولدانۋ پويىزدىڭ ساعاتىنا 200 شاقىرىمعا دەيىنگى جىلدامدىقپەن ءجۇرۋىن قامتاماسىز ەتەدى. ۆاگونداردىڭ پايدالانىلۋ مەرزىمى – 40 جىل. 2012-2015 جىلدار ارالىعىندا «جولاۋشىلار تاسىمالى» اق ءۇشىن 436 ۆاگون جاسالىپ, جەتكىزىلگەن. وتكەن جىلى شاناعىنىڭ ەنى كەڭەيتىلگەن ۆاگوندار ءوندىرىسى قولعا الىنىپتى. 2020 جىلعا دەيىن وسىنداي سەريالى 603 ۆاگون شىعارۋ جوسپارلانعان. وسى رەتتە مەملەكەت باسشىسى ەلدىڭ كولىك جۇيەسىنىڭ تيىمدىلىگىن ارتتىرۋ ءۇشىن ءوندىرىستى ودان ءارى ۇلعايتۋ قاجەتتىگىن ايتتى.
«قۇرىلىسى جونىندە يسپانيا كورولى حۋان كارلوسپەن كوپ جىل بۇرىن مەن كەلىسكەن تالگو ۆاگوندارىن شىعارۋ زاۋىتىنىڭ ونىمدەرى ەلىمىزدە كەڭىنەن پايدالانىلا باستادى. ءبىز تەمىرجول سالاسى ءۇشىن ەلەكتروۆوزدار مەن تەپلوۆوزدار عانا ەمەس, زاماناۋي جۇك جانە جولاۋشىلار ۆاگوندارىن دا جاسايمىز. قازىر ولار ءتۇرلى باعىتتاردا جولاۋشى تاسيتىن جۇردەك پويىزداردا پايدالانىلادى. جالپى, استانانىڭ يندۋستريالىق پاركى قارقىندى دامىپ كەلەدى. ءبىز وسى تەحنولوگيالىق پارككە ينۆەستيتسيا تارتىپ, جوبالاردى تابىستى جۇزەگە اسىرۋ ءۇشىن جاعداي جاساپ جاتىرمىز. سونىڭ ارقاسىندا قالا ەكونوميكاسى دامىپ, جىل سايىن بيۋدجەت تۇسىمدەرى ۇلعايىپ كەلەدى», دەدى نۇرسۇلتان نازارباەۆ.
بۇدان ءارى مەملەكەت باسشىسى وليمپيادالىق سۋ سپورتى ورتالىعىنا باردى. قازاقستان پرەزيدەنتى ەلوردانىڭ كوپفۋنكتسيالى مۇز سارايىندا ورنالاسقان جاڭا ورتالىق عيماراتىن ارالاپ, جۇمىسىمەن تانىستى. ءىس-شارا اياسىندا سۋ سپورتى وكىلدەرى كەلۋشىلەر نازارىنا ترامپليننەن سۋعا سەكىرۋ, مانەرلەپ ءجۇزۋ جانە سۋ پولوسى ويىنىن ۇسىندى.
الەمدىك ساپا ستاندارتتارىنا سايكەس سالىنىپ-جابدىقتالعان سپورت عيماراتى حالىقارالىق اۋقىمدى جارىستار وتكىزۋگە ارنالعان جانە تولىققاندى وقۋ-جاتتىعۋ ۇدەرىسىنە جاعداي جاسالعاندىعىمەن ەرەكشەلەنەدى. تاياۋدا وليمپيادالىق ورتالىقتا قازاقستان رەسپۋبليكاسىنىڭ سۋعا سەكىرۋ, مانەرلەپ ءجۇزۋ, سۋ پولوسى جانە ءجۇزۋ بويىنشا ۇلتتىق قۇراما كوماندالارى دايىندىق وتكىزەدى دەپ جوسپارلانۋدا.
ەلباسى, سونىمەن قاتار, «Forte Bank» اكتسيونەرلىك قوعامى عيماراتىنا دا باردى. مەملەكەت باسشىسى بانكتىڭ جاڭا كەڭسەلىك ورىنجايلارىن كوردى, سونداي-اق, قارجى ۇيىمىن ودان ءارى دامىتۋ جونىندەگى جوسپارمەن تانىستى. «Forte Bank» اق قۇرىلىس ۋچاسكەسىنىڭ جالپى اۋماعى – 2 گەكتار. باس عيماراتتىڭ ينفراقۇرىلىمىنا ارت-گالەرەيا, VIP-بولىمشە, WorkCafe, فيتنەس ورتالىعى, اۋديتوريا جانە تەرراسسا كىرەدى. فيليال عيماراتىندا جەكە جانە زاڭدى تۇلعالارعا قىزمەت كورسەتۋ ايماعى, سونداي-اق, بانك قىزمەتكەرلەرىنە ارنالعان كەڭسەلەر ورنالاسقان.
دينارا بىتىكوۆا,
«ەگەمەن قازاقستان»