قازاقستاندىق تەلەكورەرمەندەرگە باعىتتالىپ وتىر
تسيفرلىق جانە جەرسەرىكتىك تەلەۆيزياسىنىڭ ۇلتتىق وپەراتورى «قازتەلەراديو» اق ەل حالقىنا جاڭا ساپالى تەلەديدار كورسەتىلىمىن ۇسىنادى. بۇل جاعداي جاڭا قازاقستاندىق «KazSat-3» جەرسەرىگىنە كوشۋ ناتيجەسىندە مۇمكىن بولىپ وتىر. سيگنال ساپاسىن انىقتاۋ بويىنشا تەستىلەۋ جۇمىستارى 2016 جىلدىڭ اقپان ايىندا اياقتالدى.
«Otau TV» جەرسەرىكتىك تەلەحابار تاراتۋ جەلىسى ابونەنتتەرىن وتاندىق «KazSat-3» جەرسەرىگىنە كوشىرۋ جۇمىستارىن 2016 جىلدىڭ 15 ناۋرىزىندا باستادى. بۇعان دەيىن جەرسەرىكتىك «Otau TV» تەلەحابار تارالىمى شەتەلدىك جەرسەرىكتەن جۇزەگە اسىرىلىپ كەلگەن ەدى. ەندى ول جۇمىسىن 2016 جىلى اياقتايدى.
– قازاقستاندىق جەرسەرىكتى تاڭداي وتىرىپ, ءبىز وتاندىق ەكونوميكانىڭ دامۋىنا سەپ بولامىز. «قازاقستاندىق ءونىمدى تاڭدا!» نەمەسە «قازاقستاندا جاسالعان» – جاي عانا پاتريوتتىق ۇران ەمەس. ءاربىر قازاقستاندىق ءوز بولاشاعىنا, ءوسكەلەڭ ۇرپاقتىڭ كەلەشەگىنە وسىلايشا ۇلەس قوسادى, – دەيدى «قازتەلەراديو» اق وكىلدەرى.
قازاقستاندىق «KazSat-3» جەرسەرىگىنە كوشۋ كورەرمەندەرگە قوسىمشا SD ارنالار كورۋگە ءمۇمكىندىك بەرەدى. سونداي-اق, اقىلى ارنالار توپتاماسىنا قوسىلعان پايدالانۋشىلار HD ارنالاردى تاماشالاي الادى.
– بۇگىنگى تاڭدا ەلىمىزدىڭ تۇكپىر-تۇكپىرىنەن 1 ميلليوننان استام ءۇي شارۋاشىلىعى «Otau TV» جەلىسىنە قوسىلعان, ال بۇل 4 ميلليوننان استام قازاقستاندىق ءۇشىن تەلەارنالار مەن راديوستانسالاردى تىڭدايتىن اقپارات كوزى – «وtau TV» جەرسەرىكتىك تەلەراديوحابار تاراتۋ جەلىسى دەگەن ءسوز. ءبىر جەرسەرىكتەن ەكىنشىسىنە كوشۋ ۇدەرىسى پايدالانۋشىلارىمىز ءۇشىن بارىنشا اۋىرتپالىقسىز ءوتۋى ءتيىس. ياعني, «KazSat-3» جەرسەرىگىنەن حابار تاراتۋدىڭ تەحنيكالىق تالاپتارىنا سايكەس, ابونەنتتەرگە قوندىرعىنى قايتا تەڭدەستىرۋگە ۋاقىت جەتكىلىكتى بولۋى كەرەك. وسىعان بايلانىستى ءبىزدىڭ ابونەنتتەردى جەرسەرىككە كوشىرۋ كەزەڭى 2016 جىلدىڭ ناۋرىزى مەن قىركۇيەك ايى ارالىعىندا دەپ بەلگىلەنگەن. وتپەلى كەزەڭدە حابار تاراتۋ ەكى جەرسەرىكتەن دە جۇزەگە اسىرىلادى. بۇل ۋاقىتشا شارا كوشۋ كەزىندە تۇتىنۋشىلارىمىزدىڭ قازاقستاندىق تەلەۆيزيادان قاعىلىپ قالماۋى ءۇشىن قولدانىلىپ وتىر, – دەيدى «قازتەلەراديو» اق باس كوممەرتسيالىق ديرەكتورى باقتيار وشىرباەۆ.
«KazSat» ۇلتتىق جۇيەسى قازاقستاندىق بايلانىس وپەراتورلارىنىڭ قاجەتتىلىكتەرىن قاناعاتتاندىرۋ ءۇشىن جاسالعان. سونداي-اق, ول ەلىمىزدىڭ اقپاراتتىق قاۋىپسىزدىگىن نىعايتىپ, مەملەكەتتىك ورگانداردى تاۋەلسىز بايلانىس ارنالارىمەن قامتاماسىز ەتەدى.
– «KazSat-3» جەرسەرىگىندە ءجيىلىكتىڭ Ku-دياپازونىنداعى 28 ترانسپوندەر ورناتىلعان, ولار قازاقستان اۋماعىن بايلانىس قىزمەتىمەن قامتاماسىز ەتەدى. «وtau TV» قوندىرعىسىن كۇيگە كەلتىرگەن كەزدە 58,5 گرادۋسقا جاڭا گەوستاتسيونارلىق پوزيتسيا تىركەلۋى كەرەك. «KazSat-3» عارىش اپپاراتىنا بارىنشا ناقتى تەڭدەستىرۋگە ارقىلى سيگنالدىڭ ەڭ جوعارعى دەڭگەيىنە قول جەتكىزۋ كەرەك. سوندا عانا «وtau TV» جەلىسىن ساپالى, ءۇزىلىسسىز قولدانۋعا مۇمكىندىك بولادى. تاعى ءبىر ايتا كەتەرلىك ءجايت, قوندىرعىنى تەڭدەستىرۋ كەزىندە ءاربىر ايماق ءۇشىن انتەننانىڭ كولەمى, مشۋ امبەباپتىعى سەكىلدى فاكتورلاردى قاپەردە ۇستاعان ءجون. تۇتىنۋشىلارعا ىڭعايلى بولۋ ءۇشىن ءبىز ۇيرەتەتىن ماتەريالدار دايىنداپ قويدىق. ولاردى كومپانيا سايتتارى مەن عالامتور جەلىسىنەن تابۋعا بولادى. سونىمەن قاتار, ابونەنتتەر قوندىرعىنى كاسىبي تۇردە قايتا تەڭدەستىرۋ ءۇشىن ديلەرلەرگە حابارلاسا الادى, – دەدى «قازتەلەراديو» اق باس تەحنيكالىق ديرەكتورى ايدىن باجەكەەۆ.
سۇڭعات ءالىپباي,
«ەگەمەن قازاقستان»