«ارسەلورميتتال تەمىرتاۋ» اكتسيونەرلىك قوعامى جۇمىس كۇشىن جوسپارلاۋ باعدارلاماسىن ىسكە قوستى. بۇل تۋرالى سوعان وراي وتكىزىلگەن ءباسپاسوز ءماسليحاتىندا «ارسەلورميتتال تمد» كومپانياسىنىڭ جاڭادان تاعايىندالعان ديرەكتورى پارامجيت كالون مالىمدەدى. ونىڭ ايتۋىنشا, كاسىپورىننىڭ قازىرگى قۇرىلىمى دۇرىس ۇيىمداستىرىلماعان. «ارسەلورميتتال تەمىرتاۋ» كومپانياسىنىڭ قۇرامىندا مەتاللۋرگيالىق كومبينات, قاراعاندى وبلىسىنداعى 8 كومىر شاحتاسى, قاراعاندى, اقمولا جانە قوستاناي وبلىستارىنداعى تەمىر كەنىن وندىرەتىن 4 كەنىشى بار. كاسىپورىنداعى جۇمىستاردى شارتتى تۇردە ۇشكە بولۋگە بولادى. ونىڭ ءبىرىنشىسى – ءونىم ءوندىرىسى, ەكىنشىسى – قۇرال-جابدىقتاردى جوندەۋ مەن قامتاماسىز ەتۋ, ال ءۇشىنشىسى – سەرۆيستىك, ياعني قارجىلىق, ماركەتينگتىك جانە باسقا دا قىزمەتتەر. الەمدىك تاجىريبەگە سۇيەنسەك, العاشقى بولىك بويىنشا بارلىق ەڭبەككەرلەردىڭ 60 پايىزى, ەكىنشىسىندە 30 پايىزى جانە سوڭعىسىندا 10 پايىزى جۇمىس ىستەۋى ءتيىس. ال تەمىرتاۋ مەتاللۋرگيا كومبيناتىندا جۇمىسكەرلەردىڭ شامامەن وندىرىستە 45 پايىزى, جوندەۋ مەن قامتاماسىز ەتۋدە 40 پايىزى دا, قالعاندارى سەرۆيستىك قىزمەتتە. – قازىر ەكىنشى بولىكتەگى ەڭبەككەرلەردىڭ ءبىرازىن, ءبىرىنشى بولىككە, ۇشىنشىدەگىلەردىڭ ءبىرشاماسىن ەكىنشى بولىككە اۋىستىرۋ جوسپارلانىپ وتىر, – دەيدى پارامجيت كالون مىرزا. – ول ءۇشىن ادامداردىڭ تيىسىنشە تاجىريبە جيناقتاۋىنا مۇمكىندىك بەرۋ كەرەك. كوپشىلىك ەڭبەك ءتۇرىن وزگەرتۋگە دايىن ەمەس. ولارعا جاڭا جۇمىس ورىندارى قاراستىرىلادى نەمەسە ورنىنا جاڭادان جاس ماماندار الىنۋى مۇمكىن. كومپانيادا بىلتىرعى جىلى بولعان قيىنشىلىقتارعا توقتالعان باس ديرەكتوردىڭ ايتۋىنشا, قازىرگى ۋاقىتتا «ارسەلورميتتال تەمىرتاۋ» اق-تىڭ كومىر جانە بولات دەپارتامەنتتەرىنىڭ جۇمىستارىنا شولۋ جاسالۋدا. دايىن ءونىم شىعارۋ شىعىندارىن ازايتۋ, ساپاسىن, باسەكەگە قابىلەتتىلىگىن ارتتىرۋ قاجەت. باس ديرەكتوردىڭ پىكىرىنشە, يەلىكتەگى كەن بازاسى, كومىر سياقتى باسىمدىقتاردى ورىندى پايدالانۋ كەرەك. ەلەكتر قۋاتىن ءوندىرۋ كولەمىن ارتتىرۋ قاجەت. تەمىرتاۋ جىلۋ-ەلەكتر ورتالىعىنىڭ جۇمىسىن جاقسارتۋ دا كەزەك كۇتتىرمەيتىن ماسەلەلەردىڭ ءبىرى. كومپانيا ينۆەستيتسيالىق دامۋ باعدارلاماسىن ويداعىداي جۇزەگە اسىرىپ كەلەدى. اتاپ ايتقاندا, قازىر №4 دومنا پەشىنە جەتىلدىرۋ جۇمىستارى جۇرگىزىلۋدە. كەلەشەكتە اگرووندىرىس, باسقا دا سالالار جەتىلدىرىلەدى. جالپى, كومپانيا وسى كومبيناتتى العاننان بەرى ونى جەتىلدىرۋگە 5 ميلليارد اقش دوللارى كولەمىندە قاراجات جۇمساعان. ءبىر اي بۇرىن عانا تاعايىندالعان باس ديرەكتور ۋكرايناداعى كريۆوي روگ مەتاللۋرگيا كومبيناتىنىڭ ديرەكتورى قىزمەتىن قوسا اتقارادى. ءبىر جىلعى ۋاقىتىنىڭ 80 پايىزىندا قازاقستاندا بولۋدى جوسپارلاپ وتىر. ال تەمىرتاۋ كومبيناتىنىڭ مۇمكىندىكتەرى تۋرالى جاڭا ديرەكتور ەشتەڭە ايتا المادى. ويتكەنى, ءوندىرىس تۋرالى جان-جاقتى ءبىلىپ, ۇلكەن جوسپارلار جايلى سەنىمدى سويلەۋ ءۇشىن ءبىر اي ۋاقىت تىم از. دەگەنمەن, جاڭا باسشى جۋرناليستەرمەن ءجيى كەزدەسىپ, جاعدايدان تۇراقتى حاباردار ەتىپ وتىرۋعا ۋادە بەردى. قايرات ءابىلدينوۆ, «ەگەمەن قازاقستان» قاراعاندى وبلىسى, تەمىرتاۋ قالاسى