قاراعاندى. 1 ماۋسىم. مامىردىڭ سوڭعى كۇنى قاراعاندىداعى سپاسسك مەموريالدىق كەشەنىندە ساياسي قۋعىن-سۇرگىن قۇرباندارىن ەسكە الۋ كۇنىنە وراي قارالى ميتينگ ءوتتى. بۇل تۋرالى egemen.kz ءتىلشىسى حابارلادى.
جازىقسىز قۇربانداردىڭ ارۋاعىنا تاعزىم ەتە كەلگەن كوپشىلىك الدىندا قازاقستان حالقى اسسامبلەياسى حاتشىلىعىنىڭ مەڭگەرۋشىسى ەرالى توعجانوۆ, قاراعاندى وبلىسىنىڭ اكىمى نۇرمۇحامەت ابدىبەكوۆ ءسوز سويلەدى.
وتكەن عاسىردىڭ 30-شى جىلدارىندا قازاق ساحاراسىندا ستەپلاگ, قارلاگ, الجير ءتارىزدى تالاي جازىقسىز جاننىڭ تۇبىنە جەتكەن اباقتىلار جۇيەسى بولعانى ءمالىم. سول لاگەرلەردە كەڭەس وداعىنىڭ تۇكپىر-تۇكپىرىنەن ايدالعان 5 ميلليونداي ادام ازاپ شەكتى. قارالى جيىن وتكەن سپاسسك كەشەنىندە سول ءبىر قاسىرەت جىلدارىندا قازا تاپقان جاندار جەرلەنگەن.
كەشەندە ءتۇرلى ۇلت وكىلدەرىنىڭ قۇربان بولعان تۇلعالارىنا ارنالعان جيىرمادان استام ەسكەرتكىش بار. وسى جولى زامانىندا قازاقستانعا جەر اۋدارىلىپ, قۋعىن-سۇرگىن كورگەن 107 مىڭداي قاراشاي-مالقار ۇلتىنىڭ وكىلدەرىنە ارناپ مەموريالدىق بەلگى ورناتىلدى.
قايرات ءابىلدينوۆ.
دەرەك, فوتو: egemen.kz.