ەڭ مىقتى ەكونوميكا مارتەبەسىن جوعالتتى
اقش ەكونوميكاسى ءبىرىنشى ورىننان ءۇشىنشى ورىنعا سىرعىپ, الەمدەگى باسەكەگە اسا قابىلەتتى ەكونوميكا مارتەبەسىنەن ايىرىلدى. رەيتينگتى ادەتتەگىدەي شۆەيتساريانىڭ باسقارۋ ينستيتۋتى تۇزگەن.
ءسويتىپ, ءبىرىنشى ورىنعا گونكونگ كوتەرىلدى. ەكىنشى ورىنعا شۆەيتساريا تۇراقتادى. بۇعان دەيىن ءۇشىنشى ورىندا تۇرعان سينگاپۋر ءبىر پوزيتسياسىن جوعالتىپ, ءتورتىنشى ورىنعا تومەندەدى. العاشقى وندىققا, سونىمەن قاتار, شۆەتسيا, دانيا, يرلانديا, نيدەرلاند, نورۆەگيا جانە كانادا ەنىپ وتىر. رەسەي سوڭعى جىلدا رەيتينگتە ءبىر ساتى جوعارىلاپ, 44-ءشى ورىنعا ورنىققان كورىنەدى.
ۇيىم ۇستانىمىن بۇزدى دەپ ايىپتادى
برازيليا, جاپونيا, ەۋرووداق جانە دسۇ-نىڭ باسقا دا مۇشەلەرى اقش-تى ۇيىمدا قالىپتاسقان پىكىرتالاس قاعيداتتارىن بۇزىپ, وركوكىرەك ۇستانىم تانىتىپ وتىر دەپ ايىپتادى.
مۇنداي مالىمدەمە امەريكالىقتاردىڭ وڭتۇستىككورەيالىق سۋديا چان سون حۆانى جاڭا مەرزىمگە بەكىتۋدەن باس تارتۋىمەن بايلانىستىرىلىپ وتىر. ال كەشە اتالعان سۋديانىڭ ءتورت جىلدىق جۇمىس مەرزىمى اياقتالعان ەدى. امەريكالىقتاردىڭ پايىمىنشا, چان بىرنەشە مارتە «ابستراكتىلى» شەشىم قابىلداعان. اقش وكىلدەرى «اپەللياتسيالىق ورگان – اكادەميالىق ينستيتۋت ەمەس» دەپ مالىمدەپ وتىرسا كەرەك.
اليانستىڭ شىعىنىنا رەسەيدى كىنالايدى
ناتو-عا مۇشە ەۋروپا ەلدەرىنىڭ قورعانىسقا شىعىندارى ۇستىمىزدەگى جىلى العاش رەت سوڭعى 10 جىلدا رەسەي اگرەسسياسىنىڭ جانە كوشى-قون داعدارىسىنىڭ سالدارىنان وسەتىن بولادى. بۇل تۋرالى سولتۇستىك اتلانتيكا اليانسىنىڭ باس حاتشىسى يەنس ستولتەنبەرگ مالىمدەدى.
ناتو-نىڭ باس حاتشىسى ناقتى سانداردى اتاماعان. بىراق 2016 جىلى اليانسقا مۇشە ەۋروپا ەلدەرى قورعانىس سالاسىنا 253 ميلليارد دوللار شىعىنداعانىن كولدەنەڭ تارتقان. ال اقش-تىڭ ءبىر ءوزى 618 ميلليارد دوللار جۇمساعان كورىنەدى. ەۋروپادا ەڭ كوپ اقشا شىعىنداعان بالتىق جاعالاۋى ەلدەرى دەلىنىپ وتىر. اتاپ ايتقاندا, لاتۆيا اسكەري بيۋدجەتىن 60 پايىزعا, ليتۆا 35 پايىزعا, ەستونيا 9 پايىزعا ۇلعايتىپتى.
قىسقا قايىرىپ ايتقاندا:
حالىقارالىق فۋتبول فەدەراتسياسىنىڭ (فيفا) نۇسقاسى بويىنشا حح عاسىردىڭ ەڭ ۇزدىك ويىنشىسى پەلە ءوزىنىڭ سوڭعى 60 جىل بويى العان سپورتتىق جانە ەسكەرتكىش ناگرادالارىنىڭ ءبارىن اۋكتسيونعا شىعارۋعا شەشىم قابىلداعان. ماراپاتتاردىڭ ەڭ قۇندىسى, ارينە, 1958, 1962, 1970 جىلدارداعى الەم چەمپيوناتتارىنىڭ التىن مەدالى.
جاپونيانىڭ ياكۋدزا قىلمىستىق توپتارى باسشىلارىنىڭ ءبىرى «كوبە ياماگۋتي-گۋمي» وكاياما پرەفەكتۋراسىندا ولتىرىلگەن. پوليتسيانىڭ مالىمەتتەرىنە قاراعاندا, 55 جاستاعى مافيوزو تاداسي تاكاگي اتالعان قالاداعى ساياباقتاردىڭ بىرىندە اتىپ ءولتىرىلىپتى. بۇل – باقتالاس قىلمىستىق توپتاردىڭ اراسىنداعى دۇشپاندىقتىڭ كورىنىسى.
سانكتپەتەربۋرگتىك دەپۋتاتتار قالاداعى كوپىرلەردىڭ بىرىنە چەشەنستاننىڭ تۇڭعىش پرەزيدەنتى احمات قادىروۆتىڭ ەسىمىن بەرۋگە قارسى قول جيناۋدى جوسپارلاپ وتىر ەكەن. «ءبىز قولىمىزدى سوڭعى شەشىم قابىلداۋى ءتيىس بولاتىن قالا گۋبەرناتورىنا ارناپ جينايمىز», دەيدى دەپۋتاتتاردىڭ ءبىرى ولگا گالكينا.
يسپانيانىڭ پالما-دە-مالوركا كۋرورتتى قالاسىنىڭ تۇرعىندارى تۋريستەردىڭ تاسقىنىنا مۇلدەم نارازى. ولار دەمالۋشىلاردان قالاعا تىم جاقىنداپ كەتپەۋلەرىن ءوتىنىپتى. مۇنداي وتىنىشتەرىن ولار ۇيلەرىنىڭ قابىرعالارىنا جازا باستاعان. ءبىر جازۋ بىلاي دەيدى: «شەتەلدىك تۋريستەر, جوعالىڭدار!». تاعى بىرەۋى بىلاي دەپ جازىپتى: «بوسقىندار, قوش كەلدىڭىزدەر!».
اۆستراليالىق ادام قۇقىن قورعاۋشىلار ۇستىمىزدەگى جىلى قانشا ادامنىڭ قۇلدىقتا جۇرگەنىن ەسەپتەپ شىعارىپتى. مامانداردىڭ دەرەكتەرىنە قاراعاندا, بۇگىندە قۇلدىقتا 45,8 ميلليون ادام ءجۇر ەكەن. بۇل – وسىدان ەكى جىل بۇرىنعىدان 10 ميلليون ادامعا كوپ. قۇلدارعا ەركىنەن تىس جۇمىس ىستەپ جۇرگەندەر جاتقىزىلىپتى.
رەسەي پرەمەر-ءمينيسترى دميتري مەدۆەدەۆ ماسكەۋدىڭ ءتورتىنشى حالىقارالىق اۋەجايىن سالتاناتتى جاعدايدا اشقان. ول – جۋكوۆسكي دەپ اتالادى. قىرعىزستاننىڭ «ەير كىرگىزستان» اۋە كومپانياسى جاڭا اۋەجايعا تۇراقتى رەيس ورىنداۋدى باستايتىن العاشقى حالىقارالىق اۆياكومپانيالاردىڭ ءبىرى بولىپ تابىلماق.
قىتايدىڭ وڭتۇستىك-شىعىسىنداعى حۋنان پروۆينتسياسىندا الەمدەگى ەڭ ۇزىن شىنى كوپىردىڭ قۇرىلىسى اياقتالدى. نىسان تيانمەنشان ۇلتتىق ساياباعىنداعى 300 مەتر بيىكتىكتەگى چجانتسزياتسزە شاتقالىنىڭ ۇستىنە ورناتىلعان. ونىڭ ۇزىندىعى – 393 مەتر, ەنى – 6 مەتر. ەدەنى شىنى كوپىر ءبىر مەزگىلدە 800 ادامدى كوتەرە الادى.
رەسەي مەن قىتاي قاتىناسىنداعى سەرپىلىس
رەسەي مەن قىتايدىڭ ستراتەگيالىق سەرىكتەستىگى جاقىن ارادا جاڭا قۋاتتى سەرپىن الۋى ءتيىس. مۇنداي كوزقاراستى رەسەي سىرتقى ىستەر ءمينيسترى سەرگەي لاۆروۆ ءبىلدىردى.
رەسەي پرەزيدەنتى ۆلاديمير ءپۋتيننىڭ الداعى قىتايعا ساپارى ەكى ەل اراسىنداعى كوپقىرلى ستراتەگيالىق سەرىكتەستىك قارىم-قاتىناسىنا سونى سەرپىن بەرەتىنىنە سەنىمدىمىن, دەيدى س.لاۆروۆ. ول بۇل پىكىرىن «رەسەي جانە قىتاي: ەكىجاقتى قارىم-قاتىناستىڭ جاڭا ساپاسىنا» دەپ اتالاتىن حالىقارالىق كونفەرەنتسيادا ءسوز سويلەگەن كەزىندە ءبىلدىردى. ال شارانى رەسەيدىڭ حالىقارالىق ىستەر جونىندەگى كەڭەسى ۇيىمداستىرعان بولاتىن.
كورەيالىق شەنەۋنىكتىڭ كۇتىلمەگەن ساپارى
سولتۇستىك كورەيا ەڭبەك پارتياسى توراعاسىنىڭ ورىنباسارى ري سۋ ەن قىتايعا كۇتىلمەگەن ساپارمەن بارعان. ساپار پحەنيان مەن بەيجىڭ اراسىنداعى «توقىراۋعا ۇشىراعان» قارىم-قاتىناسقا «جان ءبىتىرۋدى» كوزدەيدى دەلىنىپ وتىر.
ديپلوماتيالىق توپتارداعى دەرەكتەر ري سۋ ەننىڭ قىتاي ساياساتكەرلەرىمەن كەزدەسۋ نيەتى بار ەكەنىن ايتادى. سولتۇستىككورەيالىق جوعارى لاۋازىمدى شەنەۋنىك كۇنى كەشەگە دەيىن ەلدىڭ سىرتقى ىستەر ءمينيسترى قىزمەتىن اتقارىپتى. مامىر ايىنىڭ باسىندا وتكەن پارتيا سەزىندە بۇرىنعى ديپلومات ەڭبەك پارتياسى توراعاسىنىڭ ورىنباسارلىعىنا سايلانعان. بۇل – جوعارى لاۋازىمدى سولتۇستىككورەيالىق شەنەۋنىكتىڭ قىتايعا العاشقى ساپارى.
«گازپروممەن» كەلىسىمشارتتى ۇزارتپايدى
پولشا «گازپروممەن» جاسالعان ۇزاق مەرزىمدى, ياعني 2022 جىلعا دەيىنگى كەلىسىمشارتتى ۇزارتۋدان باس تارتپاق نيەتىندە. بۇل تۋرالى پولشا ۇكىمەتىندە ستراتەگيالىق ەنەرگەتيكالىق ينفراقۇرىلىمداردى دامىتۋ ماسەلەلەرىمەن اينالىساتىن وكىل پەتر نايمسكي مالىمدەگەن.
«ءبىز ۇزاق مەرزىمدى كەلىسىمشارت وتكەننىڭ ىسىنە اينالاتىن جاعدايعا ۇمتىلۋىمىز كەرەك. ەگەر رەسەي گازىنىڭ باعاسى ايتارلىقتاي باسەكەگە قابىلەتتى بولاتىن بولسا, ءبىز ونى بەلگىلى ءبىر دەڭگەيدە جانە ۇزاق مەرزىمدى كەلىسىمشارت اياسىنان تىس ساتىپ الاتىنىمىزدى جوققا شىعارمايمىز», – دەيدى پ.نايمسكي. قولدانىستاعى كەلىسىمشارت بويىنشا رەسەي پولشاعا جىل سايىن 2022 جىلعا دەيىن «تولە دە الا بەر» شارتى بويىنشا 10,2 ميلليارد تەكشە مەتر گاز ساتاتىن بولادى.
ينتەرنەت ماتەريالدارى نەگىزىندە ازىرلەندى