ەلىمىزدىڭ باس قالاسىنىڭ تۇرعىنى ءانۋار شايمەرگەنوۆ كاسىپتىڭ كوزىن تابا بىلگەن جىگىت. ول گاراجىندا ءتۇرلى كۇيمەلەر جاساپ شىعارىپ, قالاعا كەلگەن تۋريستەردى قىدىرتادى. ايتۋىنشا, تەك تۋريستەردەن عانا ەمەس, كاسىپكەرلەردەن دە كوپ تابىس تۇسەدى ەكەن.
العاشقى كۇيمەسىن 2012 جىلى قۇراپ شىعارعان. بۇگىنگە دەيىن وسىندايدىڭ توعىزىن جاساپتى.
– بۇل ىسكە كىرىسپەس بۇرىن جەكە بيزنەسىمدى باستاۋىم كەرەك بولدى. استانادا جىلقى ۇستايتىن تانىستارىمىز بار. ويلانا كەلە ساندەلگەن اربا جاساۋ تۋرالى شەشىمگە توقتالدىم. سەبەبى, ءۇيلەنۋ تويلارىندا ليمۋزيندەر جالداپ جاتادى عوي, كۇيمەلەرگە دە ۇسىنىس تۇسەر دەگەن وي كەلدى. ەڭ ءبىرىنشىسىن وتباسىممەن بىرىگىپ جاسادىق. ينتەرنەت بەتتەرىنەن ءتۇرلى ءمالىمەتتەردى قاراپ شىقتىم. بىراق جاي عانا قاراپ وتىرىپ ەشنارسەنى تۇسىنبەيدى ەكەنسىڭ. «شەشىنگەن سۋدان تايىنباس» دەپ, ەكى بىلەگىمدى سىبانا كىرىسىپ كەتتىم. العاشقىدا ارينە, جىبەرگەن قاتەلىكتەرىم بولدى. بىراق سول كەمشىلىكتەرىمدى تۇزەي ءجۇرىپ, كوپ نارسەنى ۇيرەندىم. كۇيمەنىڭ ءتۇر-ءتۇرىن جاساپ كوردىك. سوڭىندا كوڭىلىمىزدەن شىققان نۇسقاعا توقتالدىق. وسىلايشا, ۋاقىت وتە كەلە وسى ءىستىڭ قىر-سىرىن جەتىك مەڭگەرىپ الدىم, – دەدى تالانتتى جىگىت.
ءبىر كۇيمەنى دايىنداۋ ءۇشىن ونىڭ كەم دەگەندە ەكى اي ۋاقىتى كەتەدى ەكەن. الايدا, «ەڭبەگىنە قاراي – ونبەگى» دەگەندەي, ءبىر اربانىڭ قۇنى شامامەن ءۇش ميلليون تەڭگەگە ساتىلادى. وسىعان دەيىن الماتىدان, بالقاشتان, قاراعاندىدان, شىمكەنتتەن كەلگەن كاسىپكەرلەرگە ساتىلىپتى. اراسىندا رەسەيگە دە جىبەرىلگەنى بار ەكەن.
دايىنداۋ بارىسىندا ول كوبىنە اعاش پەن مەتالل پايدالانادى. ال قازىر «كورول كۇيمەسىن» جاساماقشى بولىپ ءجۇر.
– شىنى كەرەك, بۇل ۇلكەن جوبا بولعالى تۇر. مەن ونى ساتپاۋىم دا مۇمكىن. ول وسىعان دەيىن دايىنداعاندارىمنىڭ ىشىندە كوبىرەك ۋاقىت الايىن دەپ تۇر. ءىشى-سىرتى دا وزگەشەلەۋ بولارى انىق. ءوزىم التىن تۇستەس بولعانىن قالاپ وتىرمىن. ارينە, بۇل جونىندە وتباسىممەن دە اقىلداسىپ بارىپ شەشىم قابىلدايمىن, – دەدى ءانۋار شايمەرگەنوۆ.
ايان ءابدۋالي,
«ەگەمەن قازاقستان»