ورال. 28 مامىر. باتىس قازاقستان وبلىسى, تەرەكتى اۋدانىنىڭ بۇرىنعى اكىمى جەڭىس سەرىكقاليەۆ كىسى ولتىرۋگە ارەكەت جاسادى دەگەن كۇدىكپەن قاماۋعا الىندى. بۇل تۋرالى «موي گورود» پورتالىنىڭ دەرەگىنە سۇيەنگەن egemen.kz ءتىلشىسى حابارلادى.
ينتەرنەت-پورتال حابارلاعانداي, وسى ءىس بويىنشا باتىس قازاقستان وبلىسى, تەرەكتى اۋدانىنىڭ بۇرىنعى اكىمى جەڭىس سەرىكقاليەۆتەن باسقا تاعى ەكى ادام ۇستالعان. ولار بيىلعى اقپان ايىندا ءبىر ايەلدى ولتىرۋگە ارەكەت جاساعاندارى ءۇشىن تۇتقىندالىپ وتىر. كەيبىر دەرەكتەرگە قاراعاندا, ول سەرىكقاليەۆتىڭ كوڭىلدەسى كورىنەدى. بىراق ايەل اۋپىرىممەن ءتىرى قالىپ, كەيىن ءوزىنىڭ ومىرىنە بالتا شاپپاق بولعانداردىڭ كىمدەر ەكەندەرىن ايتىپ بەرگەن.
ازىرگە قۇقىق قورعاۋ ورگاندارى اتالمىش وقيعاعا بايلانىستى تۇسىندىرمە بەرمەگەن. بىراق كۇدىكتىلەردىڭ «كىسى ولتىرۋگە ارەكەت ەتۋ» بابى بويىنشا تەكسەرۋ ءجۇرىپ جاتقانى بەلگىلى بولدى.
بۇگىن تاڭەرتەڭ باتىس قازاقستان وبلىسىنىڭ اكىمى التاي كولگىنوۆ تەرەكتى اۋدانىنىڭ اكتيۆىنە اۋداننىڭ جاڭا اكىمى مۇرات مۇقاەۆتى تانىستىردى. سول كەزدە اۋداندى 2013 جىلدان باسقارىپ كەلگەن جەڭىس سەرىكقاليەۆتىڭ ءوز ءوتىنىشى بويىنشا قىزمەتىنەن بوساعانى بەلگىلى بولدى.
تەمىر قۇسايىن.
دەرەك: موي گورود.