بيىل قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءسابيت ورازباەۆ اكتەرلىق عۇمىرىندا سومداعان شوقتىعى بيىك ءرولى – سەكسەندەگى سۇيەۋ قارتتىڭ جاسىنا كەلىپتى. ءبىر جەردە كوگەرگەن داراقتاي بولعان دارىن يەسىنىڭ مەرەيتويى سەنبى كۇنى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا مارەگە جەتتى.
قازاقتىڭ تەاتر ونەرىنىڭ قارا شاڭىراعىندا الپىس جىلعا جۋىق قىزمەت ەتىپ, 200-گە تارتا ءرولدى سومداپ, كەسەك كەلبەتتى كەيىپكەرلەردى تىرىلتكەن ءسابيت اعامىز ءدال وسى جولى ابىزدىق جاسقا كەلگەندە ەلدىڭ دە اقساقالى مەن اقىلشىسىنا اينالعانى داۋسىز. باسەكەلى شىعارماشىلىق ورتادا شىنايى قۇرمەتكە يە بولىپ, كورەرمەننىڭ رياسىز سۇيىسپەنشىلىگىنە جالاڭاش تالانتپەن جەتە سالۋ قيىن. ورازباەۆتاي اكتەر بۇل بەلەسكە ادامي قاسيەتتەرىمەن, ەڭبەكقورلىعىمەن, ىشكى مادەنيەتىمەن كوتەرىلگەنىن كوردىك.
شىعارماشىلىق كەشتە الدىمەن مادەنيەت جانە سپورت ءمينيسترى ارىستانبەك مۇحامەدي ۇلى ەلباسىنىڭ مەرەيتوي يەسىنە قۇتتىقتاۋ حاتىن وقىپ بەردى. پارلامەنت سەناتىنىڭ دەپۋتاتى نۇرلان ورازالين پالاتا توراعاسى قاسىم-جومارت توقاەۆتىڭ سالەمىن جەتكىزىپ, قازاقستان جازۋشىلار وداعىنىڭ دا اتىنان قۇتتىقتادى, اقىندىق ارىنمەن ءسابيت اعامىزعا جىر ارنادى.
ءسابيت ورازباەۆقا ارنالعان تولاسسىز قۇتتىقتاۋلار لەگىندە قازاقتىڭ ءبىرتۋار ازاماتتارى, وبلىس باسشىلارى مەن تۋعان ولكەسىنەن ارنايى كەلگەن ادامدار دا كوپ بولدى.
مەرەيتوي يەسىمەن ومىردە دە, ونەردە دە ۇزەڭگىلەس, تاعدىرلاس كەلە جاتقان اتاقتى اكتەر ءاسانالى ءاشىموۆ سابيتتەي اكتەردىڭ باقىتى قايدا بايلانعانىن, بۇكىل عيبراتتى عۇمىرىن, كىسىلىك كەلبەتىن قالجىڭمەن بولسا دا عاجاپ جەتكىزدى. ورەسى بيىك تۇلعالاردىڭ جاراسىمدى ازىلدەرىنىڭ استارىندا ولاردىڭ بۇكىل ءومىرى, قينالىسى مەن قۋانىشى جاتقانى ءسوزسىز.
پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ تالانتى بۇكىل ۇلتقا ورتاق قازىنا بولعان اكتەردىڭ ونەرىنە ساحنا مەن ەكراننىڭ ۇلى شەبەرى يننوكەنتي سموكتۋنوۆسكيدىڭ بەرگەن باعاسىن جاس جۋرناليستىك كۇندەرىنەن ءۇزىپ الىپ, قىزىقتى اڭگىمەلەدى. بۇل «قان مەن تەردەگى» سۇيەۋ قارتقا قاتىستى ەستەلىكتەر بولاتىن. ءسوز سوڭىندا ساۋىتبەك ابدراحمانوۆ پارلامەنت ءماجىلىسىنىڭ توراعاسى باقتىقوجا ىزمۇحامبەتوۆتىڭ ءوز قولىمەن جازىلعان قۇتتىقتاۋىن تابىستادى.
وسىلايشا ۇلتتىق تەاترعا ساپالىق وزگەرىس اكەلگەن 60-شى جىلعى بۋىننىڭ كورنەكتى وكىلى ءسابيت ورازباەۆتىڭ تاعىلىمدى كەشى تاماشا ەستەلىكتەرگە ۇلاسا بەردى. تەاتردىڭ بۇكىل ۇجىمى دا ادام رەتىندە دە, اكتەر رەتىندە دە باقىتى جانعان جانە وسى باقىتىن تاپقان ابىز تۇلعاعا شىن نيەتتەن ءجۇز دەيتىن جاستى تىلەپ تاراستى.
ءاسانالى ءاشىموۆ,
كسرو حالىق ءارتىسى:
– ءسابيت, رايىمبەك ۇشەۋمىز جۇبىمىز جازىلمايتىن جولداس بولدىق. بىرگە وقۋعا تۇستىك, بىرگە جۇردىك, تەاترعا دا بىرگە كەلدىك. ۇيلەنگەندە ءبىر-بىرىمىزگە كۇيەۋ جولداس بولدىق, بالالارىمىز دۇنيەگە كەلگەندە پەرزەنتحانادان بىرگە شىعارىسىپ الدىق, ءۇي العاندا ءوزىمىز باسپانالى بولعانداي جۇرەگىمىز جارىلا بىرگە قۋاندىق. انالارىمىزدى الماتىعا كوشىرىپ اكەلىپ, قولىمىزعا الىپ, اق باتاسىن ەستىدىك. ءبىزدىڭ انالارىمىز دا تەڭ قۇربىداي ءبىر-بىرىمەن ارالاسىپ كەتتى.
قالجىڭىم جاراسقان, ونەردىڭ الامانىندا تىزە قوسىپ قاتار شاپقان ءسابيت تۋرالى ايتارىم كوپ. دوسىم تۋرالى ەستەلىكتەرىم جازعان كىتابىمدا دا بار. ءالى دە جازارمىن. ونەردە تىرەسەتىن سەرىكتەسىڭ مىقتى بولسا عانا وسەسىڭ. ءسابيت, رايىمبەك, ەسبولعان, ءانۋار, ءازىربايجان – ءبارىمىز ءبىر توپ بولىپ, قۇيىسقان ءتۇيىستىرىپ قاتار شاپتىق. ءبىر-ءبىرىمىزدى وسىردىك. ءبىز ءازىربايجاننىڭ قويعان سپەكتاكلدەرى ارقىلى وستىك, ءبىزبەن بىرگە ءازىربايجاننىڭ ءوزى دە ءوستى.
نۇكەتاي مىشباەۆا,
قازاقستاننىڭ حالىق ءارتىسى:
– ءبىز ءسابيت ەكەۋمىز تۇيدەي قۇرداسپىز. ساكەڭمەن 61 جىلدان بەرى ونەردە بىرگە كەلە جاتىرمىن. ماڭعاز, سالماقتى جىگىت بولدى. ءبىر يىعىنا فوتواپپاراتىن, ءبىر يىعىنا دومبىراسىن اسىپ الىپ ءجۇرەتىن. «ويباي, مىنا ءسابيتتىڭ فوتواپپاراتى بار ەكەن, باي جىگىت شىعار», دەپ ويلايتىنبىز قىزدار جاعى. ول زاماندا فوتواپپارات دەگەنىڭىز تىم قات دۇنيە, ەكىنىڭ بىرىندە بولا بەرمەيتىن قىمبات بۇيىم ەدى. سويتسەك, قولىندا قارت اناسى بار, ءوزى پاتەردە تۇرادى, فوتواپپارات ونىڭ كۇنكورىسىنىڭ ءبىر كوزى ەكەن عوي. سودان ينستيتۋتتى ءتامامداپ, رايىمبەك سەيتمەتوۆ, فاريدا ءشارىپوۆا, ماتان مۇراتاليەۆ, راۋشان اۋەزباەۆا, ءسابيت ورازباەۆ جانە مەن, التى كۋرستاس م.اۋەزوۆ تەاترىنا جۇمىسقا قابىلداندىق. كوپ سپەكتاكلدە ءسابيت ەكەۋمىز ساحنالاس بولدىق. سابيتپەن ويناۋ وڭاي ەمەس ەدى. ورەسى دە, ونەرى دە بيىك ەكەنى بىلىنەتىن. گريم بولمەسىنىڭ تۇسىنان قاي ۋاقىتتا ءوتىپ بارا جاتساق تا, ءسابيتتىڭ ءان ايتىپ وتىراتىنىن ەستيتىنبىز. دومبىراسىن قولىنان تاستامادى. ءسابيت – ەڭبەكقورلىعىنىڭ ارقاسىندا قادىر-قاسيەتىن جوعالتپاي, ابىروي-بەدەلگە يە بولعان جىگىت. ءوز باسىم وسىعان ريزا بولامىن.
ەرلان ءبىلالوۆ,
م.اۋەزوۆ تەاترىنىڭ
ديرەكتورى:
– ءسابيت اعانىڭ ازاماتتىعىن, ادامگەرشىلىگىن, پاراسات-پايىمىن ارقاشان جوعارى باعالايمىن. ەرەكشە دارىنىمەن, ماڭداي تەرىمەن, كىسىلىك قادىر-قاسيەتىنىڭ وزىقتىعىمەن بۇگىنگى بيىگىنە جەتىپ وتىرعانى كەيىنگى تولقىنعا ۇلگى بولسا يگى. «بالالار, وسى ەستەرىڭدە بولسىن» دەپ نيەتتى جاقسىلىققا بۇرىپ ءجۇرۋدى, مەيىرباندىقتان قول ۇزبەۋدى تەاترعا ءبىرىنشى كەلگەن كۇننەن باستاپ ۇيرەتتى. اعامىزدىڭ ايتقان وسى ءبىر اۋىز جاقسى ءسوزى كۇنى بۇگىنگە دەيىن جادىمىزدا جاڭعىرىپ تۇرادى. ۇلكەنگە ىزەتتى, كىشىگە پەيىلدى, اقىل-كەڭەسىن بيىك پاراساتپەن, اسقان مادەنيەتپەن ايتا بىلەتىن اعامىزدى نەگە ابىز دەپ ايتپاسقا, بۇل مىنەزىن نەگە ماقتان تۇتپاسقا؟ ءسابيت اعانىڭ پىكىر-پايىمى, ءتۇر-تۇلعاسى, ومىرگە كوزقاراسى, كىرلەنبەگەن جۇرەگىنىڭ تازالىعى ءاردايىم مەنى تاڭ قالدىرۋمەن كەلەدى. عيبرات سىيلايدى. اڭگىمەلەسسەم, راحاتتانامىن. ويىنىن كورسەم, شابىتتانامىن. ءسابيت اعانىڭ بۇگىنگى مەرەيلى قۋانىشى – التى الاشتىڭ, قازاق ونەرىنىڭ قۋانىشى.
ايناش ەسالي,
«ەگەمەن قازاقستان»
الماتى