قۇجات مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا ايتىلعان تاپسىرمالارىن جۇزەگە اسىرۋ اياسىندا ۇكىمەت قاۋلىسىمەن بەكىتىلدى. اتالعان جولداۋدا تورعاي ءوڭىرىن كەشەندى الەۋمەتتىك-ەكونوميكالىق تۇرعىدان دامىتۋ قاجەتتىگى بەلگىلەنگەن.
ءۇش جىلدىق جوسپار 10 نەگىزگى باعىتتاعى 51 ءىس-شارانى قامتيدى. ولار: ونەركاسىپ پەن كولىك, تۋريزم مەن سپورت, اگروونەركاسىپتىك كەشەن, ءبىلىم, دەنساۋلىق ساقتاۋ, الەۋمەتتىك قورعاۋ, جىلۋ جانە ەلەكترمەن جابدىقتاۋ, سۋ بۇرۋ, ازاماتتىق قاۋىپسىزدىك.
ءىس-شارالار وندىرىستىك الەۋەتتى دامىتۋعا, ينجەنەرلىك ءارى الەۋمەتتىك ينفراقۇرىلىمدى جاڭعىرتۋعا, حالىقتىڭ ءومىر ءسۇرۋ ساپاسىن جاقسارتۋعا, سونداي-اق ينۆەستيتسيا تارتۋ مەن جاڭا جۇمىس ورىندارىن اشۋ ءۇشىن جاعداي جاساۋعا باعىتتالعان.
جوسپاردا اگروونەركاسىپتىك كەشەندى, ونىڭ ىشىندە مال شارۋاشىلىعىن دامىتۋعا, ينفراقۇرىلىمدىق جوبالاردى ىسكە اسىرۋعا, سونداي-اق كاسىپكەرلىك پەن ينۆەستيتسيالىق بەلسەندىلىكتى قولداۋعا ەرەكشە نازار اۋدارىلدى. اتاپ ايتقاندا, ارقالىق قالاسىندا بىرقاتار ءىرى ينۆەستيتسيالىق جوبالاردى ىسكە اسىرۋ كوزدەلىپ وتىر. ولاردىڭ ىشىندە 6 مىڭ باس ءىرى قارا مالعا مودۋلدىك رەپرودۋكتور قۇرۋ, جەلاتين مەن بيواكتيۆتى سۇيەك ماتريتساسىن شىعاراتىن زاۋىت سالۋ, 10 مىڭ باس قويعا ارنالعان مال شارۋاشىلىعى كەشەنىن, 6 مىڭ باسقا ارنالعان بورداقىلاۋ الاڭىن سالۋ. بۇدان بولەك, قۇراما جەم زاۋىتىن پايدالانۋعا بەرۋ, قۋاتتىلىعى جىلىنا 300 ملن جۇمىرتقا شىعاراتىن قۇس فابريكاسىن كەڭەيتۋ مەن جاڭعىرتۋ جوسپارلانىپ وتىر.
قوستاناي وبلىسىنىڭ اكىمى قۇمار اقساقالوۆ بيىلعا جالپى سوماسى 78,4 ملرد تەڭگەگە 33 ءىس-شارانى ىسكە اسىرۋ كوزدەلگەنىن حابارلادى. قازىر ءىس جۇزىندە 39,2 ملرد تەڭگە ءبولىندى.
ء«بىز بارلىعىن جوسپارلى مەرزىمدە ىسكە اسىرۋ ءۇشىن قاجەتتىنىڭ ءبارىن جاسايمىز. وسى جىلى وبلىستىق بيۋدجەتتەن 8,8 ملرد تەڭگە ءبولىندى. بۇل نەگىزگى جوبالاردى تولىق كولەمدە قارجىلاندىرۋعا مۇمكىندىك بەردى. ولاردىڭ ەڭ باستىسى — ارقالىق اۋەجايىنىڭ قۇرىلىسى. بۇگىندە قارجىلاندىرۋ ارقىلى اۋەايلاق ينفراقۇرىلىمىن قايتا جاڭارتۋ, جولاۋشىلار تەرمينالىن سالۋ جانە قاجەتتى جابدىقتاردى ساتىپ الۋ تولىق قامتاماسىز ەتىلدى. جۇمىس قاتاڭ تۇردە كەستەگە ساي جۇرگىزىلىپ جاتىر. بيىلعى تامىزدا نىسان پايدالانۋعا بەرىلەدى. اۋەجايدى ىسكە قوسۋ اۋە قاتىناسىن قالپىنا كەلتىرىپ قانا قويماي, كولىك قاتىناسى, ينۆەستيتسيالىق تارتىمدىلىقتى ايتارلىقتاي ارتتىرىپ, ءوڭىردى دامىتۋدىڭ جاڭا كەزەڭىن اشادى», دەدى ق.اقساقالوۆ.
سونىمەن قاتار ارقالىقتا اباتتاندىرۋ جۇمىسى جۇرگىزىلىپ, بوس تۇرعان عيماراتتار قالپىنا كەلتىرىلىپ جاتىر. اۋلاىشىلىك اۋماقتار مەن ۆوكزال ماڭىنداعى الاڭدار جوندەلىپ جاتىر. قالادا ۋنيۆەرسيتەت عيماراتىن قايتا جاڭعىرتۋ جۇمىسى اياقتالدى. سونداي-اق جەزقازعان – ارقالىق اۆتوجولىن جوندەۋ جۇمىسى سوڭعى كەزەڭگە ءوتتى.
«Arkalyk QUS» جشس قۇس فابريكاسىنىڭ تەڭ قۇرىلتايشىسى ماكسيم بوجكو كاسىپورىندى ەكى ساتىلى جاڭعىرتۋ جوباسىن تانىستىردى. بۇل ءوندىرىس كولەمىن ەكى ەسەگە – جىلىنا 150 ميلليوننان 300 ميلليون جۇمىرتقاعا دەيىن ۇلعايتۋعا جول اشادى.
«بيىل ءبىز 70 ملن جۇمىرتقاعا ارنالعان جاڭا قۇس قورالارىن پايدالانۋعا بەرۋدى, ءوزىمىزدىڭ قۇراما جەم زاۋىتىن سالۋدى جوسپارلاپ وتىرمىز. كەلەسى جىلى تاعى 80 ملن دانا قۇس ءۇيى ىسكە قوسىلادى. ەكى كەزەڭدى جۇزەگە اسىرۋ قورىتىندىسىندا قۇس فابريكاسىنىڭ قۋاتى جىلىنا 300 ملن جۇمىرتقاعا جەتەدى. قازىر بىزدە شامامەن 250–270 ادام جۇمىس ىستەيدى. شتاتتى 370 قىزمەتكەرگە دەيىن كوبەيتە وتىرىپ, 100-دەن استام قوسىمشا جۇمىس ورنىن قۇرۋعا مۇمكىندىك بار», دەدى كاسىپكەر.
كەڭەس قورىتىندىسىندا ۆيتسە-پرەمەر سەرىك جۇمانعارين مەملەكەتتىك ورگاندارعا وبلىس اكىمدىگىمەن بىرلەسىپ قاراجاتتى ۋاقتىلى يگەرۋ ماسەلەسىن قاتاڭ باقىلاۋدا ۇستاۋدى جانە ينۆەستورلارعا جوسپارلانعان جوبالاردى ناقتى ىسكە قوسۋ ءۇشىن بارلىق قاجەتتى قولداۋ كورسەتۋدى تاپسىردى.
