مەرەكەلىك ءىس-شارا ات شاپتىرىپ, ءان سالدىرىپ قانا اتاپ وتپەدى, «ريددەر تاريحي اسپەكتىلەر تۇرعىسىنان» اتتى رەسپۋبليكالىق عىلىمي-تاجىريبەلىك كونفەرەنتسيامەن باستالدى. دوڭگەلەك ۇستەلدە باس قوسقاندار قالانىڭ قالىپتاسۋ تاريحىن, ءوڭىردىڭ الەۋمەتتىك-ەكونوميكالىق دامۋىنداعى ءرولىن, تاريحي مۇراسىن تالقىلادى. ارتىنشا «ريددەر – كەندى التايدىڭ كەرەمەتى» اتتى وبلىستىق اقىندار ايتىسى ءوتىپ, ايماقتىڭ تانىمال ايتىسكەرلەرى ءسوز سايىسىنا ءتۇستى. قالا تۇرعىندارى ايتىسقا ابدەن شولدەگەن بە, مادەنيەت سارايىنىڭ زالى لىق تولدى.
ەرتەسىندە قالالىق يپپودرومدا ريددەردىڭ ءىى ۇلتتىق «اتامۇرا» ويىندارى ۇيىمداستىرىلدى. جينالعاندار كوكپار, توپ بايگە, اۋدارىسپاق, قازاقشا كۇرەس, ارقان تارتۋ, ساداق اتۋ جانە «تولاعاي» سايىستارىنان سىنعا ءتۇستى.
«ۇلتتىق سپورت تۇرىنەن ءوتىپ جاتقان سايىستاردى حالىق كۇتىپ ءجۇرىپ كورەدى. ءبىز دە تاس كوتەرىپ, اربا سۇيرەپ جارىستىق. قالانىڭ 240 جىلدىعى جوعارى دەڭگەيدە تويلانىپ جاتىر. ريددەر قالاسى كوركەيە بەرسىن», دەيدى بىلەك كۇشى سپورت تۇرىنەن الەم چەمپيونى تەمىرلان كەنجەحانوۆ.
سونداي-اق جينالعان جۇرتشىلىق اۋە شارىمەن كوككە كوتەرىلىپ, قالانى بيىكتەن تاماشالادى. مەرەكە اۋماعىندا ساۋدا-ساتتىق قىزىپ, ءتۇرلى سىيلىق ويناتىلدى. مەرەيلى مەرەكە رەسپۋبليكا الاڭىنداعى اۋقىمدى كونتسەرتپەن قورىتىندىلاندى. ءوڭىر باسشىسى نۇرىمبەت ساقتاعانوۆ ءىس-شارالارعا قاتىسىپ, تۇرعىندارعا جىلى لەبىزىن
ءبىلدىردى.
«تاريحى تەرەڭ ريددەر ەلىمىزدىڭ يندۋستريالىق دامۋىنا زور ۇلەس قوسىپ, ەڭبەك پەن ەرلىكتىڭ, بىرلىك پەن جاسامپازدىقتىڭ ۇلگىسىن كورسەتىپ كەلەدى. قالا جىل وتكەن سايىن جاڭارىپ, الەۋمەتتىك نىساندار سالىنىپ, ينفراقۇرىلىمى دامىپ, تۇرعىنداردىڭ ءومىر ءسۇرۋ ساپاسى جاقسارىپ كەلەدى. ءبىلىم سالاسىندا ماڭىزدى جوبالار جۇزەگە اسىرىلىپ جاتىر. اتاپ ايتقاندا, قازاق تىلىندە وقىتاتىن «شاڭىراق» مەكتەبىنىڭ قۇرىلىسى اياقتالۋعا جاقىن, №11 جانە №12 مەكتەپتەردىڭ جاڭا عيماراتتارى پايدالانۋعا بەرىلدى. ەلەۋلى وقيعالاردىڭ ءبىرى – 200 توسەكتىك ورنى بار زاماناۋي كوپسالالى اۋرۋحانا كەشەنى مەن ءبىر اۋىسىمدا 500 ادامدى قابىلدايتىن ەمحانانىڭ قۇرىلىسى بولدى. قالامىزدىڭ ابىرويى ارتىپ, مارتەبەسى بيىكتەپ, ءوڭىرىمىز قارقىندى دامي بەرسىن», دەدى ن.ساقتاعانوۆ.
سودان سوڭ ساحنادا ەلىمىزدىڭ ونەر جۇلدىزدارى مەن جەرگىلىكتى شىعارماشىلىق ۇجىمدار ونەر كورسەتىپ, تۇرعىندارعا كوتەرىڭكى كوڭىل كۇي سىيلادى.
شىعىس قازاقستان وبلىسى,
ريددەر قالاسى
