فوتو: istockphoto.com
ER-100 دەپ اتالاتىن تەراپيا ءتۇرى كوزدىڭ كورۋ جۇيكەسىنە اسەر ەتەتىن اۋىر اۋرۋلاردى ەمدەۋگە ارنالعان. اتاپ ايتقاندا, ەمدىك شارا اشىق بۇرىشتى گلاۋكوما جانە كورۋ جۇيكەسىنىڭ نەيروپاتياسى سياقتى دەرتتەردەن زارداپ شەگەتىن ناۋقاستارعا قولدانىلماق. بۇل اۋرۋلار ۋاقىت وتە كەلە كورۋ قابىلەتىنىڭ ناشارلاۋىنا نەمەسە تولىق جوعالۋىنا اكەلۋى مۇمكىن.
عالىمداردىڭ تۇسىندىرۋىنشە, ادام قارتايعان سايىن دنق وزگەرمەيدى, بىراق گەندەردىڭ قالاي جۇمىس ىستەيتىنىن باسقاراتىن جۇيەلەر بۇزىلادى. سونىڭ سالدارىنان جاسۋشالار ءوز قىزمەتىن بۇرىنعىداي ءتيىمدى اتقارا المايدى.
جاڭا تەحنولوگيانىڭ ماقساتى – جاسۋشالاردىڭ جۇمىسىن قايتا جانداندىرۋ. ول ءۇشىن Oct4, Sox2 جانە Klf4 دەپ اتالاتىن ارنايى اقۋىزدار پايدالانىلادى. زەرتتەۋشىلەر بۇل ءادىس جاسۋشالاردىڭ قارتايۋ بەلگىلەرىن ازايتىپ, زاقىمدانعان تىندەردىڭ قالپىنا كەلۋىنە كومەكتەسۋى مۇمكىن دەپ ەسەپتەيدى.
تەراپيا بۇعان دەيىن زەرتحانالىق جانۋارلار مەن پريماتتاردا سىناقتان وتكەن. ەندى ادام قاتىساتىن العاشقى كلينيكالىق زەرتتەۋ باستالىپ, العاشقى پاتسيەنت ەم قابىلدادى. قازىرگى كەزەڭدە عالىمدار ەڭ الدىمەن ءادىستىڭ قاۋىپسىزدىگىن تەكسەرمەك.
كومپانيا وكىلدەرىنىڭ ايتۋىنشا, ەگەر سىناقتار ءساتتى وتسە, بولاشاقتا بۇل تەحنولوگيانى تەك كوز اۋرۋلارىن عانا ەمەس, باۋىر مەن باسقا دا اعزالاردىڭ جاسقا بايلانىستى اۋرۋلارىن ەمدەۋگە قولدانۋعا بولادى.
ەسكە سالا كەتەيىك, بۇعان دەيىن رەسەيلىك سكولتەح عالىمدارى ادامنىڭ بيولوگيالىق جاسىن انىقتايتىن الەمدەگى العاشقى اشىق پلاتفورمانى جاسادى. عالىمدار جۇيەنى «قارتايۋ ساعاتى» دەپ اتادى.
