فوتو: اقوردا
دينارا زاكيەۆا بيىل «قازاقستان بالالارى» تۇجىرىمداماسى قابىلدانعانىن اتاپ ءوتتى. ونىڭ سوزىنشە, دەنساۋلىق ساقتاۋ, ءبىلىم بەرۋ, الەۋمەتتىك قورعاۋ جانە قاۋىپسىزدىك سالالارىنداعى بالا قۇقىقتارىن قامتاماسىز ەتۋ شارالارى جۇيەلەنگەن. جاعدايدى ءجىتى ساراپتاۋ نەگىزىندە بەس جىلعا ارنالعان ءىس-قيمىل جوسپارى ازىرلەنگەن. قۇجات الەۋمەتتىك قولداۋدى جانە بالا قۇقىقتارىن قورعاۋدى كۇشەيتەتىن 158 شارانى قامتيدى.
بالا قۇقىقتارى جونىندەگى ۋاكىل مەملەكەت باسشىسىنا وبلىس اكىمدىكتەرىندە بالالار قۇقىعىن قورعاۋ باسقارمالارىن قۇرۋ جۇمىسى اياقتالعانىن, ولاردىڭ قۇزىرەتتەرى ۇلتتىق زاڭنامادا بەكىتىلگەنى جانە ۇيىمداستىرۋ راسىمدەرى ءجۇرىپ جاتقانى جونىندە باياندادى.
قازىرگى ۋاقىتتا قاجەتتى ۇيىمداستىرۋ راسىمدەرى قولعا الىنعان. بيىل 9 وڭىردەگى احۋالعا مونيتورينگ جۇرگىزىلىپ, بالالاردىڭ پسيحولوگيالىق سالاماتتىلىعىن قامتاماسىز ەتۋگە جانە ولاردىڭ قۇقىقتارىنىڭ بۇزىلۋىنىڭ الدىن الۋعا باعىتتالعان ءىس-شارالار ساپاسى زەردەلەنگەن. بۇل جەرگىلىكتى دەڭگەيدە ەرەكشە نازار اۋدارۋدى جانە قولداۋدى قاجەت ەتەتىن بالالارعا جۇيەلى كومەك كورسەتۋگە سەپتىگىن تيگىزدى. سونداي-اق ول 111 مەملەكەتتىك بايلانىس ورتالىعىنا تۇسەتىن وتىنىشتەر بويىنشا جۇرگىزىلگەن جۇمىسقا توقتالدى.
مەملەكەت باسشىسى پورتۋگاليا پرەزيدەنتىنە قۇتتىقتاۋ جەدەلحاتىن جولدادى
مەكتەپتەردە QR-111 جۇيەسىنىڭ ەنگىزىلۋى بالالارمەن تىكەلەي بايلانىس ورناتۋ جانە ولاردىڭ قۇقىقتارىنىڭ بۇزىلۋ فاكتىلەرىن انىقتاۋ بارىسىندا ءتيىمدى بولعانىن كورسەتىپ وتىر. اتالعان قۇرال ىسكە قوسىلعاننان بەرى, ياعني, 2024 جىلدىڭ قازان ايىنان 2026 جىلدىڭ ماۋسىم ايىنا دەيىن بالالاردان 167 مىڭ حابارلاما مەن 4 523 قوڭىراۋ كەلىپ تۇسكەن.
پرەزيدەنت «قازاقستان بالالارى» تۇجىرىمداماسىن ساپالى جۇزەگە اسىرۋ ماقساتىندا بالا قۇقىقتارى جونىندەگى ۋاكىلدىڭ, ۇكىمەتتىڭ جانە جەرگىلىكتى اتقارۋشى ورگانداردىڭ كۇش-جىگەرىن جۇمىلدىرۋ ماڭىزدى ەكەنىن اتاپ ءوتتى.
ەسكە سالا كەتەيىك, بۇعان دەيىن مەملەكەت باسشىسى اقش پرەزيدەنتىنىڭ وڭتۇستىك جانە ورتالىق ازيا بويىنشا ارنايى وكىلى سەردجيو گوردى قابىلدادى.
