فوتو: اۋىل شارۋاشىلىعى مينيسترلىگى
اۋىل شارۋاشىلىعى مينيسترلىگىنىڭ مالىمەتىنشە, جالپى العاندا, بيىل 2,2 ملن گەكتار جەردى وڭدەۋ جوسپارلانعان. بۇل كورسەتكىش 2024 جىلمەن سالىستىرعاندا 30%-عا از. بۇل ۇكىمەتتىڭ قولداۋىمەن جۇرگىزىلگەن كەشەندى جۇمىستاردىڭ جانە وسىمدىكتەردى قورعاۋ جۇيەسىندەگى ەلەۋلى وزگەرىستەردىڭ ناتيجەسى. اتاپ ايتقاندا, قىزمەتتەردى ساتىپ الۋدىڭ بىرىڭعاي جۇيەسى ەنگىزىلىپ, ۇدەرىستەر ورتالىقتاندىرىلىپ, بيۋدجەت قاراجاتىن پايدالانۋ تيىمدىلىگى ارتتى.
قازاق-قىتاي عالىمدارى شەگىرتكەمەن كۇرەستىڭ جاڭا ءادىسىن ۇسىندى
«جەلدەتكىش بۇرىككىشتەردىڭ ونىمدىلىك نورمالارى قايتا قارالىپ, كورسەتكىش 100 گەكتاردان 70 گەكتارعا دەيىن تومەندەتىلدى. بۇل تارتىلعان تەحنيكانىڭ سانىن 556 بىرلىككە ارتتىرۋعا مۇمكىندىك بەردى, ياعني 2025 جىلمەن سالىستىرعاندا 25%-عا كوپ. سونىمەن قاتار, فيتوسانيتاريالىق قىزمەتتىڭ تەحنيكالىق پاركى جاڭارتىلىپ, 103 درون ساتىپ الىندى. ونىڭ 57-ءسى مونيتورينگ جۇمىستارىنا, 46-سى حيميالىق وڭدەۋ جۇرگىزۋگە ارنالعان», دەلىنگەن حابارلامادا.
شەگىرتكەگە قارسى كۇرەستىڭ تيىمدىلىگىن ارتتىرۋ ماقساتىندا «FITOCENTRE» قوسىمشاسى ىسكە قوسىلدى. فاو-مەن بىرلەسىپ تسيفرلىق تەحنولوگيالار, جاساندى ينتەللەكت جانە ۇشقىشسىز اپپاراتتاردى قولدانۋعا باعىتتالعان سەرىكتەستىك جوبا جۇزەگە اسىرىلىپ جاتىر.
وڭىرلەردەگى جەدەل شتابتار شتاتتىق رەجيمدە جۇمىس ىستەيدى.
بۇعان دەيىن قازاقستاندا شەگىرتكەگە قارسى 480 مىڭ گەكتارعا جۋىق جەر وڭدەلگەنى تۋرالى حابارلاعان ەدىك.
