سۋرەت: kaz.kazlenta.kz
جۇمىسپەن قامتۋداعى نەگىزگى باعىتتاردىڭ ءبىرى – سۋبسيديالاناتىن جۇمىس ورىندارى. قازىر مۇنداي جۇمىس ورىندارىنا 50,6 مىڭ ادام جولدانعان. ونىڭ ىشىندە 37,6 مىڭ ادام قوعامدىق جۇمىستارعا, 5,4 مىڭ ادام الەۋمەتتىك جۇمىس ورىندارىنا, 2,7 مىڭ مامان جاستار پراكتيكاسىنا, 4,9 مىڭ ادام «كۇمىس جاس» جوباسى اياسىندا جۇمىسقا ورنالاسقان. ونلاين وقۋمەن 31,7 مىڭ جۇمىسسىز ازامات قامتىلسا, ونىڭ ىشىندە 25,1 مىڭ ادام وقۋ كۋرسىن اياقتاعان.
حالىقتىڭ كاسىپكەرلىك داعدىلارىن دامىتۋعا ىقپال ەتكەن «باستاۋ بيزنەس» جوباسى دا ۇيلەسىمدى جالعاسىپ كەلەدى. جىل باسىنان بەرى 16,9 مىڭ ادام كاسىپكەرلىك نەگىزدەرىن وقىپ, 7,3 مىڭ ازامات وقۋىن ءساتتى اياقتاعان. بۇدان بولەك, جۇمىس بەرۋشىلەردىڭ سۇرانىسىنا ساي كادر دايارلاۋ ماقساتىندا 2 119 ادام كاسىپتىك وقۋعا جىبەرىلگەن. بۇل قادام وڭىرلەردە ەڭبەك نارىعىنىڭ قاجەتتىلىكتەرىن ەسكەرە وتىرىپ, كاسىپورىنداردى قاجەتتى ماماندارمەن قامتاماسىز ەتۋگە مۇمكىندىك بەرەدى. مانساپ ورتالىقتارىنىڭ ۇيىمداستىرۋىمەن 142,8 مىڭ ادام الەۋمەتتىك كاسىپتىك باعدار بەرۋ, كونسۋلتاتسيالىق قىزمەتتەر العان. بۇل قىزمەتتەر جاستاردىڭ ماماندىقتى سانالى تاڭداۋىنا, ەڭبەك نارىعىنداعى باسەكەگە قابىلەتىن ارتتىرۋعا ىقپال ەتەدى.
ەل ازاماتتارىن جۇمىسقا ورنالاستىرۋ بىرنەشە باعىتتا ىسكە اسادى. ال ولاردىڭ ناقتى جۇمىسپەن قامتىلعانى تۋرالى اقپارات ويدان الىنبايدى, مىندەتتى زەينەتاقى جارنالارىنىڭ اۋدارىلۋىمەن راستالادى. بۇگىنگە دەيىن جۇمىسپەن قامتىلعان 140,8 مىڭ ادامنىڭ شامامەن 50,6 مىڭى جۇمىسپەن قامتۋعا جاردەمدەسۋدىڭ ءىس-شارالارىنا تارتىلعان. 48,3 مىڭ ادام ەلەكتروندىق ەڭبەك بيرجاسىندا جاريالانعان بوس جۇمىس ورىندارىنا ورنالاسقان. مەملەكەت باسشىسىنىڭ «10 مىڭ تۇرعىنعا 100 جۇمىس ورنى» باستاماسى اياسىندا 40 مىڭ ادام جۇمىس تاپسا, 1,9 مىڭ ادام ورتالىق مەملەكەتتىك ورگاندار ىسكە اسىرىپ جاتقان جوبالاردىڭ يگىلىگىن كورگەن.
تاعى ءبىر ماڭىزدى اقپارات – جىلداعىداي بيىل دا الەۋمەتتىك وسال ساناتتاعى ازاماتتاردىڭ جاڭا بيزنەس باستامالارىن قولداۋعا گرانت قاراستىرىلعان. جوبا اياسىندا 400 اەك-كە دەيىنگى مولشەردە, ياعني 1 730 000 تەڭگە كولەمىندە 9 مىڭ مەملەكەتتىك گرانت بەرۋ كوزدەلىپتى. ەگەر جوسپار جىل سوڭىنا دەيىن ويداعىداي ورىندالسا, كەلەر جىلعا دەيىن وسال ساناتتاعى ازاماتتاردىڭ الەۋمەتتىك جاعدايى ءبىرشاما جاقسارادى.
