پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆتىڭ ايتۋىنشا, «Digital Qazaqstan» ستراتەگياسى جەكەلەگەن قىزمەتتەردى تسيفرلاندىرۋمەن شەكتەلمەيدى. قۇجاتتىڭ باستى ماقساتى – ەلىمىزدى تولىققاندى تسيفرلىق مەملەكەتكە اينالدىرۋ. وسى جولدا مەملەكەتتىك باسقارۋ, ەكونوميكا جانە الەۋمەتتىك سالادا جاساندى ينتەللەكت كەڭىنەن ەنگىزىلەدى.
دەمەك, مەملەكەتتىك جۇيەلەر ءوزارا بايلانىسىپ, قىزمەتتەر ازاماتتىڭ ومىرلىك جاعدايىنا قاراي اۆتوماتتى تۇردە ۇسىنىلادى. ماسەلەن, الەۋمەتتىك تولەمدەردى راسىمدەۋ, دارىگەرگە جازىلۋ نەمەسە ءبىلىم بەرۋ قىزمەتتەرىن الۋ ۇدەرىسى الدەقايدا جەڭىلدەيدى.
ستراتەگيانىڭ تاعى ءبىر ماڭىزدى باعىتى – ەكونوميكانى تسيفرلىق ترانسفورماتسيالاۋ. اۋىل شارۋاشىلىعى, ونەركاسىپ, قۇرىلىس, كولىك جانە قارجى سالالارىندا جاساندى ينتەللەكت پەن تسيفرلىق تەحنولوگيالار كەڭىنەن ەنگىزىلەدى. بۇل ەڭبەك ونىمدىلىگىن ارتتىرىپ, شىعىنداردى ازايتۋعا جانە بيزنەستىڭ باسەكەگە قابىلەتتىلىگىن كۇشەيتۋگە مۇمكىندىك بەرەدى.
جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنشە, جاساندى ينتەللەكتىنى جاپپاي ەنگىزۋ, ونەركاسىپ, لوگيستيكا جانە ەنەرگەتيكانى تسيفرلاندىرۋ ەل ەكونوميكاسىنا قوسىمشا سەرپىن بەرەدى. ال تەحنولوگيالىق جوبالارعا تارتىلاتىن ينۆەستيتسيا كولەمى 10,5 – 16,5 ميلليارد دوللارعا دەيىن جەتۋى مۇمكىن.
جاڭا ستراتەگيا ءبىلىم سالاسىنا دا ەرەكشە نازار اۋدارادى. قۇجاتتا جاساندى ينتەللەكت ماماندارىن دايارلاۋ, وڭىرلىك IT-مەكتەپتەر جەلىسىن كەڭەيتۋ جانە حالىقتىڭ تسيفرلىق ساۋاتتىلىعىن ارتتىرۋ كوزدەلگەن. سونىمەن قاتار وقۋشىلار ءۇشىن جاساندى ينتەللەكت نەگىزىندەگى جەكە ءبىلىم بەرۋ باعىتتارىن قالىپتاستىرۋ جوسپارلانىپ وتىر.
ساراپشىلاردىڭ پىكىرىنشە, الەمدە جاساندى ينتەللەكت تەحنولوگيالارىن ەرتە مەڭگەرگەن ەلدەر جاڭا ەكونوميكالىق كوشباسشىلارعا اينالادى. سوندىقتان «Digital Qazaqstan» ستراتەگياسى ەلىمىزدىڭ الداعى ونجىلدىقتاعى باسەكەگە قابىلەتتىلىگىن ايقىندايتىن ماڭىزدى قۇجات سانالادى.
«مەملەكەت باسشىسى ءۇش جىل ىشىندە ەلىمىزدى تولىققاندى تسيفرلىق ەلگە اينالدىرۋ مىندەتىن قويىپ وتىر. بۇگىندە جاساندى ينتەللەكتىنىڭ تولىق ەكوجۇيەسىن قالىپتاستىرىپ جاتقان ەلدەر كوش باستاپ كەلەدى. مۇنداي ارحيتەكتۋرا «AI Economy Stack» دەپ اتالادى جانە ول ەنەرگەتيكا مەن ينفراقۇرىلىم, ەسەپتەۋ قۋاتتارى, دەرەكتەر مەن ۇلكەن تىلدىك مودەلدەر, تسيفرلىق پلاتفورمالار جانە قولدانبالى جي-قىزمەتتەرى دەگەن بەس دەڭگەيدى قامتيدى», دەدى مينيستر.
ال ءىت مامانى مەيىرجان اۋەلحان ۇلىنىڭ ايتۋىنشا, بۇل جارلىقتىڭ باستى قۇندىلىعى – ونىڭ ساياسي ماڭىزىندا.
ء«ۇش جىل بويى مينيسترلىكتەردىڭ ارقايسىسى ءوز باعىتى بويىنشا عانا تسيفرلاندىرۋمەن اينالىسىپ كەلدى. ال «Digital Qazaqstan» وسىنىڭ ءبارىن ءبىر جۇيەگە بىرىكتىرەدى. تاعى ءبىر ماڭىزدى تۇسى ونىڭ مەرزىمىندە. 2029 جىلعا دەيىنگى كەزەڭ – بار-جوعى ءۇش جىل. بۇل – ناتيجەسى تەز ارادا ايقىن سەزىلەتىن قىسقا مەرزىم. حالىق تا, بيزنەس تە, شەنەۋنىكتەر دە اتقارىلعان جۇمىستىڭ جەمىسىن بىرنەشە جىل ىشىندە كورە الادى. بىراق ەڭ باستىسى – «قاراپايىم ازاماتتىڭ, بيزنەستىڭ, مۇعالىمنىڭ ومىرىندە ناقتى نە وزگەردى؟» دەگەن سۇراققا شىنايى جاۋاپ تابىلۋى كەرەك. وسى ستراتەگيانىڭ نەگىزگى تابىسى مەن جەڭىسى دە ءدال وسى سۇراققا بەرىلەتىن جاۋاپپەن ولشەنبەك», دەدى م.اۋەلحان ۇلى.
ستراتەگيا ءۇش نەگىزگى باعىت اياسىندا جۇزەگە اسىرىلادى. ءبىرىنشىسى – ازاماتتاردىڭ مۇددەسى ءۇشىن تسيفرلاندىرۋ. بۇل باعىتتا مەملەكەتتىك قىزمەتتەر ادامنىڭ ومىرلىك جاعدايىنا بەيىمدەلىپ, پرواكتيۆتى فورماتقا كوشىرىلەدى. مىسالى, الەۋمەتتىك تولەمدەر مەن مەملەكەتتىك قولداۋ كومەكتەرىن الۋ كەزىندە ازاماتتاردىڭ قوسىمشا قۇجات جيناۋىنا قاجەتتىلىك بىرتىندەپ ازايادى. دەنساۋلىق ساقتاۋ سالاسىندا دەرەكتەردى تالداۋ نەگىزىندە اۋرۋلاردىڭ الدىن الۋ مەن ەمدەۋ ساپاسىن ارتتىرۋ كوزدەلسە, ءبىلىم بەرۋ جۇيەسىندە وقۋشىلاردىڭ قابىلەتىنە قاراي جەكە وقۋ باعىتتارىن قالىپتاستىرۋ جوسپارلانعان.
ەكىنشى باعىت ناقتى سەكتوردى تسيفرلىق ترانسفورماتسيالاۋعا ارنالعان. قۇجاتتا اۋىل شارۋاشىلىعى, ونەركاسىپ, قۇرىلىس, كولىك جانە قارجى سالالارىن تسيفرلىق تەحنولوگيالار نەگىزىندە جاڭعىرتۋ مىندەتى قويىلعان. سونىمەن بىرگە روبوتتەحنيكا, ۇشقىشسىز جۇيەلەر, تسيفرلىق اكتيۆتەر جانە عارىش تەحنولوگيالارى سياقتى جاڭا سالالاردى دامىتۋعا باسىمدىق بەرىلەدى.
ستراتەگيا اياسىنداعى ەڭ ءىرى جوبانىڭ ءبىرى – «AI Hub» قۇرۋ. ول عىلىمي ورتالىقتاردى, جوعارى وقۋ ورىندارىن, تەحنولوگيالىق كومپانيالار مەن ەسەپتەۋ قۋاتتارىن ءبىر جەرگە شوعىرلاندىراتىن وڭىرلىك يننوۆاتسيالىق الاڭ بولماق. مۇندا جاساندى ينتەللەكت باعىتىنداعى جاڭا ونىمدەر ازىرلەنىپ, سىناقتان وتكىزىلىپ, كوممەرتسيالاندىرىلماق. مەملەكەت بۇل باستاما ارقىلى ەلىمىزدى ورتالىق ازياداعى تەحنولوگيالىق حابتاردىڭ بىرىنە اينالدىرۋدى كوزدەيدى.
جاساندى ينتەللەكت داۋىرىندە ەلدەردىڭ باسەكەگە قابىلەتتىلىگى تابيعي رەسۋرستاردان بولەك, تەحنولوگيالىق مۇمكىندىگىمەن دە ولشەنەدى. سوندىقتان «Digital Qazaqstan» ەلىمىزدىڭ تسيفرلىق قىزمەتتەردى دامىتۋ كەزەڭىنەن تسيفرلىق باسقارۋ كەزەڭىنە ءوتۋىن قامتاماسىز ەتەتىن ماڭىزدى ستراتەگيالىق قۇجات رەتىندە باعالانىپ وتىر.
