الدىمەن «The Craiova International Shakespeare Festival» – ۇلى دراماتۋرگ ۋيليام شەكسپيردىڭ شىعارماشىلىق مۇراسىن زاماناۋي تۇرعىدا زەردەلەۋگە, تەاتر ونەرىن دامىتۋعا, تاجىريبە الماسۋعا باعىتتالعان ەڭ ايتۋلى حالىقارالىق تەاتر الاڭدارىنىڭ ءبىرى ەكەنىن ايتا كەتۋ كەرەك. بۇل فەستيۆال 1994 جىلدان بەرى كرايوۆا قالاسىنداعى مارين سورەسكۋ اتىنداعى ۇلتتىق تەاتردىڭ باستاماسىمەن اراعا جىل سالىپ ءوتىپ كەلەدى. بيىلعى ونەر دوداسىندا الەمنىڭ 28 ەلىنەن كەلگەن 90 شاقتى شىعارماشىلىق ۇجىم توعىسىپ, ون كۇندە كورەرمەندەرگە شامامەن 300 مادەني ءىس-شارا ۇسىنىلعان.
الماتىداعى مەملەكەتتىك اكادەميالىق قۋىرشاق تەاترى ايتۋلى شاراعا 2025 جىلى فرانتسيانىڭ اۆينون قالاسىندا وتكەن حالىقارالىق «Off Avignon» تەاتر فەستيۆالىندە شاقىرتۋ العان. وندا دا تەاتر ماماندارىنىڭ نازارىن «رومەو مەن دجۋلەتتا» سپەكتاكلىندەگى ەرەكشە كامەرالىق ينتەرپرەتاتسياسى ارقىلى اۋدارتقان.
الەمگە ايگىلى ماحاببات حيكاياسى 2019 جىلى رەجيسسەر دينا جۇماباەۆانىڭ جەتەكشىلىگىمەن ساحنالانسا, قويىلىمنىڭ حورەوگرافى اننا تسوي مەن قويۋشى-سۋرەتشىسى يۋليا چەرنوۆانى دا اتاپ ءوتۋ ءلازىم.
«رومەو مەن دجۋلەتتا» سپەكتاكلى بۇعان دەيىن دە فرانتسيا, كانادا, بولگاريا, رەسەي, تۇركيا جانە ەلىمىزدەگى حالىقارالىق تەاتر فەستيۆالدارىندا جوعارى ماراپاتتارعا يە بولسا, كرايوۆا قالاسىنداعى قويىلىمدا ۇلان ادامباەۆ, بوتا تابىلديەۆا, ماقسات كامالوۆ, شوحان قۇلنازاروۆ, ەلميرا قۇماروۆا, ارايلىم بايىربەكوۆا سىندى اكتەرلەر ونەر كورسەتتى.
كرايوۆاداعى كورسەتىلىم كورەرمەننىڭ ۇلكەن قوشەمەتىنە بولەنگەنىن لىق تولى زال مەن سپەكتاكل اياقتالعاننان كەيىنگى ۇزاق قول شاپالاقتاۋدان بىلۋگە بولادى. ارتىستەردىڭ شىنايى ويىنى, قۋىرشاق جۇرگىزۋدەگى شەبەرلىگى, يكەمدىلىگى مەن حورەوگرافيانىڭ ۇيلەسىمدى ۇندەستىگى, سونداي-اق ستسەنوگرافيالىق شەشىمنىڭ تۇتاستىعى تەاتر ماماندارى تاراپىنان جوعارى باعالاندى. فەستيۆال قوناقتارى مەن حالىقارالىق تەاتر قاۋىمداستىعىنىڭ وكىلدەرى قازاقستاندىق قۋىرشاق ونەرىنىڭ جوعارى كاسىبي دەڭگەيىن اتاپ ءوتتى.
كورسەتىلىمنەن كەيىن تەاتر ۇجىمى 2027 جىلى رۋمىنيادا وتەتىن «The International Theatre Festival «Elvira Godeanu» حالىقارالىق تەاتر فەستيۆالىنە قاتىسۋعا شاقىرتۋ الدى.
الماتى
