جاستار اراسىندا كىتاپ وقۋ مادەنيەتىن, ءبىلىم مەن اعارتۋشىلىق قۇندىلىقتاردى دارىپتەۋ مەن تۇلعا قالىپتاستىرۋدى ماقسات ەتكەن جوبانىڭ سەرىكتەسى – Yokohama شينا برەندى. جەڭىمپازداردى ماراپاتتاۋ ءىس-شاراسى Yokohama ونىمدەرىنىڭ ەلىمىزدەگى رەسمي ديستريبيۋتورى بولىپ تابىلاتىن SAN Tyres كومپانياسىندا ءوتتى. جوباعا كىتاپ وقۋ جانە ينتەللەكتۋالدىق سايىستار ارقىلى ءوز بىلىمدەرىن سىناۋ ماقساتىندا ەل وڭىرلەرىنەن 45 مىڭنان استام ازامات قاتىسقان.
مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتى توراعاسىنىڭ ورىنباسارى روللان قۇسپاننىڭ ايتۋىنشا, ەلىمىزدە كىتاپ وقۋ مادەنيەتىن قالىپتاستىرۋ ماقساتىندا كەشەندى شارالار ىسكە اسىپ كەلەدى. «مەملەكەت باسشىسى «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى. ماڭىزدى قۇجاتتا ادام كاپيتالىن دامىتۋ, قوعامدا كىتاپ وقۋ مادەنيەتىن قالىپتاستىرۋ, كىتاپتى رۋحاني قۇندىلىق رەتىندە ناسيحاتتاۋعا قاتىستى جۇيەلى قادامدار ناقتىلانىپ, تاپسىرما بەرىلدى. وسى ماقساتتا رەسپۋبليكالىق دەڭگەيدە جوبالار جالعاسىن تابا بەرەتىن بولادى. «كىتاپ وقىپ, تۇلعا بولامىن» رەسپۋبليكالىق جوباسىنىڭ ماقساتى – جەڭىمپازداردى انىقتاۋ ەمەس, قوعامدا كىتاپ وقۋدى ناسيحاتتاۋ, وقۋعا ۇندەۋ. «ەل بولامىن دەسەڭ, بەسىگىڭدى تۇزە» دەمەي مە حالىق دانالىعى, الداعى ۋاقىتتا وسى جوبانىڭ اۋقىمىن كەڭەيتە بەرمەكپىز» دەيدى روللان قابىل ۇلى.
جوبا بيىل ءتورتىنشى رەت ءىرى كولەمدە ءوتىپ وتىر. بۇل – ەڭ كوپ وقىرمان قاتىسقان جوبا. كاسىپكەر-مەتسەنات, SAN tyres باسشىسى سىرىمبەك تاۋ اتاپ وتكەندەي, «كىتاپ وقىپ, تۇلعا بولامىن» جوباسى 2021 جىلدان باستاپ ىسكە اسىپ كەلەدى. 2022 جىلى جوبا اياسىندا 126 مىڭ وقىرمان كىتاپ وقىپ, جەڭىمپازعا استانا قالاسىنان ءبىر بولمەلى پاتەر بەرىلگەن. ءتۇرلى سەبەپتەرگە بايلانىستى جوبا ەكى جىلعا توقتاپ, بيىلدان باستاپ قايتا قولعا الىندى.
«كىتاپ وقۋ ەستە ساقتاۋ جۇيەسىنە, جىلدام دامۋ, مادەنيەتتى تۇلعا قالىپتاستىرۋعا ىقپالى ەش دالەلدى قاجەت ەتپەيدى. وقۋعا ۇندەۋ – قوعام بولىپ اتسالىساتىن جاۋاپتى ءىس. جوباعا قىزىعۋشىلىق تانىتىپ, قاتىساتىنداردىڭ سانى ارتقان. ەڭ قىزىعى كىتاپتاردى وقىپ, 7 مينۋتتا 100 سۇراققا جاۋاپ بەرگەن وقىرمانىمىز دا بار. وقۋشىلاردىڭ جوباعا قاتىسۋى ۇبت كورسەتكىشتەرىنە وڭ ىقپال ەتىپ جاتقانىن دا بايقادىق. بۇل جولى اقتىق سايىسقا اتىراۋ, شىمكەنت, الماتى, تالدىقورعان قالاسىنان 10 وقىرمان ىرىكتەلدى. الداعى ۋاقىتتا ءتيىستى مينيسترلىكپەن بىرلەسىپ وتكىزىپ, وقىرمان سانىن 1 ملن-عا جەتكىزۋدى كوزدەپ وتىرمىز. وقىلىمدى كىتاپتار كوبەيسە, قاتىسۋشىلار دا كوبەيەدى. بۇل جولى ا.اۋەزحان ۇلىنىڭ «دالا دانىشپانى – مايقى بي», ك.توقاەۆتىڭ «تۇندە اتىلعان وق», و.بوكەيدىڭ «اتاۋ كەرە» رومانى تاڭدالدى. شەتەلدەن قاتىسقان وتانداستارىمىز دا بولدى. جوبا جاريالانعان كەزدە كىتاپ دۇكەندەرىنە دە شولۋ جاسالىپ, ساراپتالدى» دەيدى سىرىمبەك تاۋ.
جوبا 3 ايعا جوسپارلانعان. شارت بويىنشا قاتىسۋشىلار ءار ايدا ءبىر كىتاپتان وقىپ شىقتى. بارلىق كىتاپتار ونلاين تۇردە تەگىن ۇسىنىلدى. ءار كەزەڭ اياقتالعاندا 100 تەست سۇراعى ونلاين بەرىلگەن. 1-كەزەڭ ناۋرىز ايىندا «دالا دانىشپانى – مايقى بي» كىتابىمەن باستالدى. كىتاپتى 52 713 وقىرمان جۇكتەپ, 17 مىڭ وقىرمان 40 ۇپايدان جوعارى جيناعان. ءساۋىر ايىندا وتكەن 2-كەزەڭدە «تۇندە اتىلعان وق» كىتابى وقىلدى. كىتاپتى 26 مىڭنان استام وقىرمان ونلاين جۇكتەپ العان بولسا, تەستىلەۋ ناتيجەسى بويىنشا, 100 ۇپاي – 19, 90+ ۇپاي – 467, 40–90 ۇپاي اراسى 3450 وقىرماندى قۇراعان. مامىر ايىنداعى 3-كەزەڭدە «اتاۋ كەرە» رومانىنان تەست تاپسىرعاندار – 4 071 بولسا, 40 ۇپايدان جوعارى – 1 723, 80 ۇپايدان جوعارى – 663, بايقاۋ سوڭىنا دەيىن جاۋاپ بەرىپ ۇلگەرگەندەر ءبىر مىڭنان اسىپتى.
جوباعا 2021 جىلدان بەرگى ارالىقتا قاتىسىپ جۇرگەن الماتىداعى №169 مەكتەپ-ليتسەيىنىڭ 11-سىنىپ وقۋشىسى ءاسيا قاناتقىزى وسى ءجولى ى ورىنعا يە بولىپ, 2 ملن تەڭگە ەنشىلەدى. ول بۇعان دەيىن ەكى رەت اقتىق كەزەڭگە ءوتىپ, ارنايى سىيلىققا يە بولعان ەدى. ەكىنشى ورىندى نۇرسۇلتان كەنجەتاەۆ ەنشىلەپ, 1 ملن تەڭگە يەلەندى.
جوبانىڭ ەڭ جاس قاتىسۋشىسى احمات رينات ۇلى الماتى وبلىسى شامالعان اۋىلىنان كەلىپتى. ۇشقوڭىر ورتا مەكتەپ-گيمنازياسىنىڭ 5-سىنىپ وقۋشىسى. جوباعا بۇل جولى احماتتىڭ ون بەس جاستاعى باۋىرى ءسۇلتانالى دە قاتىسىپ, ءىىى ورىنعا يە بولىپ, 500 مىڭ تەڭگە ەنشىلەدى. رينات سەيىتحان ۇلى بالالارىن, اسىرەسە ادەبي كىتاپتار وقۋعا باۋلىپ, ءتۇرلى بايقاۋلارعا قاتىستىرىپ جۇرگەنىن العا تارتتى. جوبا كەزىندە ءۇش كىتاپتى وقىپ, تالقىلاپ, تالداۋعا وتباسىمەن اتسالىسقان. ونىڭ ايتۋىنشا, قوعامدا بالالاردى گادجەتكە تاۋەلدىلىكتەن قۇتقارۋدىڭ بىردەن-ءبىر جولى – كىتاپ وقۋعا كىشكەنتاي كەزىنەن باۋلۋ.
جوبا ناتيجەسىنە وراي 4-ورىنعا – 300 مىڭ, 5-ورىنعا – 200 مىڭ, 6-10-ورىنعا 100 مىڭ تەڭگەدەن ۇلەستىرىلدى. جەڭىمپازدار قاتارىندا ايگەرىم حامەتوۆا, ماقسات سابدەنبەك, جىبەك عۇبايدۋللينا, ەربولات ءابىلحان, ازات بەردەشەۆ بار.
جوبانىڭ جالپى جۇلدە قورى 35 ملن تەڭگەنى قۇرادى. جوبا قاتىسۋشىلارى اراسىندا ارنايى كەزدەيسوق ىرىكتەۋ جۇلدەسى ويناتىلدى. ونىڭ شارتى بويىنشا ۇمىتكەرلەر جوبانىڭ ءۇش كەزەڭىنە دە قاتىسىپ, ارقايسىسىندا كەمىندە 40 پايىز ناتيجە كورسەتۋى قاجەت بولاتىن. قورىتىندىسىندا 1 جەڭىمپاز – 5 ملن, 1 جەڭىمپاز – 2 ملن 500 مىڭ, 1 جەڭىمپاز – 1 ملن, 7 جەڭىمپاز 100 مىڭ تەڭگەگە يە بولدى.
الماتى
