مينيستر: مەملەكەتتىك قارىز دەڭگەيى ەكونوميكاعا قاۋىپ توندىرمەيدى

ءماجىلىس وتىرىسىندا دەپۋتات ەرلان ستامبەكوۆ مەملەكەت حالىقتىڭ قارىز جۇكتەمەسىن ازايتۋعا باعىتتالعان قاتاڭ ساياسات جۇرگىزىپ وتىرعانىمەن, ۇكىمەتتىك قارىز كولەمى ءوسىپ جاتقانىن اتاپ ءوتتى. دەپۋتات ەگەر ازاماتتاردان قارجىلىق ءتارتىپ قالاي تالاپ ەتىلسە, ءدال وسىنداي ءتارتىپ مەملەكەتتىك دەڭگەيدە دە ساقتالۋى تيىستىگىن ايتتى.

قارجىلىق ءتارتىپتىڭ بارلىق دەڭگەيدە ماڭىزدى ەكەندىگىن اتاپ وتكەن مينيستر ءمادي تاكيەۆ ەلىمىزدىڭ مەملەكەتتىك قارىزى قاۋىپسىز دەڭگەيدە ەكەندىگىن جەتكىزدى. سونىمەن بىرگە ول مەملەكەتتىك قارىز كولەمى مەن ونىڭ قىزمەت كورسەتۋ شىعىندارىن بولەك قاراستىرۋ كەرەكتىگىن ايتتى.

«مۇندا ەكى ماسەلەنى بولەك قاراستىرۋ قاجەت. ءبىرىنشىسى – مەملەكەتتىك قارىز دەڭگەيى, ەكىنشىسى – قارىزعا قىزمەت كورسەتۋ قۇنى. 1 قاڭتارداعى جاعداي بويىنشا ول ءىجو-گە شاققاندا 22,8% نەمەسە 36,4 ترلن تەڭگەنى قۇراپ, قاۋىپسىز شەكتەردە تۇر. بۇل تۇرعىدا 32% ءىجو كولەمىندەگى بەلگىلەنگەن كوۆەنانتتان اسپاۋ ماڭىزدى كورسەتكىش بولىپ قالا بەرەدى. سوندىقتان باستى نازار تەك قارىز كولەمىنە ەمەس, ونىڭ قالاي جانە قانداي شارتتارمەن وتەلىپ جاتقانىنا دا اۋدارىلۋعا ءتيىس», دەدى مينيستر.

تيمۋر سۇلەيمەنوۆ: بانكتەرگە حالىققا ەمەس, بيزنەسكە نەسيە بەرۋ ءتيىمدى بولا ءتۇستى

سونداي-اق ول قارىزدى قايتا قارجىلاندىرۋ تاجىريبەسى حالىقارالىق دەڭگەيدە كەڭ تارالعانىن ايتىپ, قازاقستاننىڭ دا حالىقارالىق نارىقتاردا ءتيىمدى شارتتارمەن قاراجات تارتقانىن اتاپ ءوتتى.

بۇدان بولەك,ء مادي تاكيەۆ 2025 جىلدىڭ قورىتىندىسى بويىنشا, ەلىمىزدىڭ ءىجو ءوسىمى 6,5%-دى قۇراعانىن ايتتى. ونىڭ ايتۋىنشا وسىمگە كولىك, قۇرىلىس, تاۋ-كەن ونەركاسىبى مەن ساۋدا سالالارى نەگىز بولعان.