كەلىسسوز بارىسىندا ساۋدا-ەكونوميكالىق ىنتىماقتاستىقتى ارتتىرۋ پەرسپەكتيۆالارى تالقىلاندى. اتاپ ايتقاندا, كولىكتىك-لوگيستيكالىق مارشرۋتتاردى دامىتۋ, ينۆەستيتسيالىق ىنتىماقتاستىقتى كەڭەيتۋ تەتىكتەرى, سونداي-اق تسيفرلاندىرۋ, ءبىلىم بەرۋ جانە تۋريزم سالاسىنداعى بىرلەسكەن جوبالار قارالدى.
«قىتايمەن ءوزارا ءتيىمدى قارىم-قاتىناستى دامىتۋ – قازاقستاننىڭ سىرتقى ساياساتىنىڭ باستى باسىمدىقتارىنىڭ ءبىرى. بۇگىندە قازاق-قىتاي ارىپتەستىگى بۇرىن-سوڭدى بولماعان دەڭگەيگە جەتتى جانە تاتۋ كورشىلىكتىڭ, ءوزارا سەنىمنىڭ جانە ۇزاقمەرزىمدى ىنتىماقتاستىقتىڭ ۇلگىسىن كورسەتىپ وتىر. وتكەن جىل ساياسي ديالوگتىڭ قارقىندىلىعى تۇرعىسىنان ەرەكشە ماڭىزدى بولدى. مەملەكەت باسشىلارى دەڭگەيىندەگى ءوزارا ساپارلار مەن كەزدەسۋلەر ەكىجاقتى ىنتىماقتاستىقتىڭ بارلىق سپەكترىنە قۋاتتى سەرپىن بەردى», دەدى ۇكىمەت باسشىسى.
دجون لي جۇرگىزىلگەن كەلىسسوزدەردىڭ ناتيجەسى قازاقستان مەن گونكونگ اراسىنداعى ارىپتەستىكتى ودان ءارى كەڭەيتەتىنىن ايتتى. ونىڭ سوزىنشە, گونكونگ پەن قىتايدىڭ بيزنەس قاۋىمداستىعى ەلىمىزدى ورتالىق ازياداعى باستى سەرىكتەستەرىنىڭ ءبىرى رەتىندە باعالايدى.
ء«بىز ءسىزدىڭ پرەزيدەنتىڭىزدىڭ باسشىلىعىمەن قىسقا ۋاقىت ىشىندە قول جەتكىزگەن اسەرلى, تۇراقتى ەكونوميكالىق ءوسۋدى كورىپ وتىرمىز. قازاقستان ۇلكەن مۇمكىندىكتەرگە, ال قىتايمەن قارىم-قاتىناس ستراتەگيالىق جانە ۇزاقمەرزىمدى سيپاتقا يە. وسى ساپاردىڭ قورىتىندىسى ودان ارعى ىنتىماقتاستىقتىڭ ەلەۋلى الەۋەتىنە جانە «حابتان حابقا» ارىپتەستىك مودەلىن دامىتۋدىڭ قولايلى پەرسپەكتيۆالارىنا دەگەن سەنىمىمىزدى ودان ءارى نىعايتتى. ءسىزدىڭ ەلىڭىز ازيا مەن ەۋروپا اراسىنداعى نەگىزگى كولىك-لوگيستيكالىق مارشرۋتتاردىڭ قيىلىسىندا بولا وتىرىپ, ورتالىق ازيادا ستراتەگيالىق ورىنعا يە», دەدى دجون لي.
كەزدەسۋدە ساۋدا-ەكونوميكالىق بايلانىستاردى كەڭەيتۋ ماسەلەسىنە ەرەكشە نازار اۋدارىلدى. بۇگىندە قىتاي قازاقستاننىڭ ەڭ ءىرى ساۋدا سەرىكتەستەرىنىڭ ءبىرى سانالادى. وتكەن جىلى ەكى ەل اراسىنداعى تاۋار اينالىمى 48,7 ملرد دوللارعا جەتكەن. ال قازاقستان مەن گونكونگ اراسىنداعى ساۋدا كولەمى ءبىر جىلدا 40 پايىزعا ءوسىپ, 180 ملن دوللارعا دەيىن ۇلعايعان. تاراپتار الداعى ۋاقىتتا ەكونوميكالىق ىنتىماقتاستىقتى جاڭا دەڭگەيگە شىعارۋعا مۇمكىندىك بەرەتىن «قازاقستان – شىڭجاڭ – گونكونگ» فورماتىنداعى ءوزارا ءىس-قيمىل تەتىگىن دامىتۋ ماسەلەسىن تالقىلادى. بۇل الاڭ تاۋارلار مەن قىزمەتتەردىڭ قوزعالىسىن جانداندىرىپ, بىرلەسكەن جوبالاردى جۇزەگە اسىرۋعا جول اشپاق.
