مەملەكەت باسشىسى قاسىم-جومارت توقاەۆ دەنساۋلىق ساقتاۋ سالاسىن دامىتۋعا, اسىرەسە اۋىلدىق جەرلەردەگى مەديتسينالىق ينفراقۇرىلىمدى جاڭعىرتۋعا ەرەكشە كوڭىل ءبولىپ كەلەدى. پرەزيدەنت تاپسىرماسىنا سايكەس ۇلىتاۋ وبلىسىنىڭ قالا-اۋداندارىندا جاڭا مەديتسينالىق نىساندار سالىنىپ, حالىققا كورسەتىلەتىن قىزمەت ساپاسى جاقسارا باستادى. وڭىردە مەديتسينا سالاسىنىڭ ساپاسىن جاقسارتۋعا قاتىستى جۇمىستار جۇيەلى جۇرگىزىلىپ كەلەدى. وبلىس قۇرىلعالى بەرى 26 جاڭا نىسان اشىلدى. ەكى مەديتسينالىق مەكەمەدە كۇردەلى جوندەۋ جۇمىسى تولىق اياقتالدى. قازىرگى ۋاقىتتا تاعى بەس نىساندا جوندەۋ جۇمىسى جالعاسىپ جاتىر.
21 بىرلىك «جەدەل جاردەم» كولىگى ساتىپ الىندى. جاساندى ينتەللەكت كومەگىمەن راديولوگيالىق زەرتتەۋلەردىڭ بىرىڭعاي دەرەكتەر بازاسى قۇرىلدى. بارلىعى 333 بىرلىك جابدىق ساتىپ الىندى, ونىڭ ىشىندە جوعارى تەحنولوگيالىق قۇرال-جابدىق – روبوتتى ميكروسكوپ, 128 كەسىندى كومپيۋتەرلىك توموگرافيا, انگيوگراف اپپاراتتارى بار.
وڭىردە اۋىلداعى مەديتسينانىڭ دامۋىنا ءمان بەرۋدىڭ ماڭىزى زور. بيىل ۇلىتاۋ اۋدانىندا جاڭا اۋرۋحانا پايدالانۋعا بەرىلەدى. جاڭاارقا اۋداندىق اۋرۋحاناسىندا كۇردەلى جوندەۋ جۇمىسى جۇرگىزىلىپ جاتىر. شالعاي ەلدى مەكەندەردەگى جيىرما شاقتى فەلدشەرلىك-اكۋشەرلىك, مەديتسينالىق پۋنكتتەر, دارىگەرلىك امبۋلاتوريالاردى جاڭارتۋ جۇمىستارى قولعا الىنعان.
سالاعا بىلىكتى دارىگەرلەر تارتۋ باستى نازاردا. وبلىستىق بيۋدجەت ەسەبىنەن مەديتسينا قىزمەتكەرلەرىن ىنتالاندىرۋ, الەۋمەتتىك قولداۋ شارالارى كورسەتىلەدى. وڭىرگە كەلگەن 84 دارىگەرگە كوتەرمە جاردەماقى تولەندى. ونىڭ ىشىندە اۋىلدىق جەرلەرگە كەلگەن 23 مامانعا 8 ملن تەڭگەدەن قاراجات بەرىلدى. وعان قوسا تۇرعىن ۇيمەن قامتاماسىز ەتىلدى.
«2025 جىلى وبلىستىق كوپسالالى اۋرۋحانادا كۇردەلى جوندەۋ جۇمىسى باستالدى. اۋرۋحانا ءۇش جىل ىشىندە تولىق جاڭارتىلادى. مۇندا كارديولوگيا, گاستروەنتەرولوگيا, پۋلمونولوگيا, رەۆماتولوگيا, گوسپيتالدىق فارماتسيا سياقتى بەس جاڭا بولىمشە اشىلادى. ونكولوگيالىق اۋرۋلاردىڭ الدىن الۋ, ەرتە انىقتاۋ, ەمدەۋ جونىندەگى جۇمىستار كۇشەيتىلىپ كەلەدى. ەگەر ءۇش جىل بۇرىن 20 توسەكتىك بولىمدە نەبارى ەكى مامان جۇمىس ىستەسە, بۇگىندە جەتى مامان جۇمىس ىستەيدى. ونكوحيرۋرگتاردى دايارلاۋ جونىندەگى جۇمىستار دا جۇرگىزىلەدى. بولىمشە قاجەتتى جابدىقپەن تولىق جابدىقتالعان. سونىمەن قاتار 100 توسەكتىك وبلىستىق اۋرۋحانانىڭ جاڭا عيماراتىن سالۋ ارقىلى بولىمشەنى كەڭەيتۋ جوسپاردا بار», دەدى وبلىس اكىمى داستان رىسپەكوۆ.
كەڭگىر اۋىلىنداعى 25 كەرەۋەتتىك جاڭادان سالىنعان فەلدشەرلىك-دارىگەرلىك امبۋلاتوريا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا سالىنىپ, پايدالانۋعا بەرىلدى. «اۋىلدىق دەنساۋلىق ساقتاۋدى جاڭعىرتۋ» قاناتقاقتى جوباسىنىڭ باستى مىندەتتەرىنىڭ ءبىرى – جەتىسپەيتىن مەديتسينالىق-سانيتارلىق العاشقى كومەك ۇيىمدارىن, اتاپ ايتقاندا, مەديتسينالىق, فەلدشەرلىك-اكۋشەرلىك پۋنكتتەر, دارىگەرلىك امبۋلاتوريالار سالۋ ارقىلى بارلىق اۋىلدىق ەلدى مەكەندەردى ساپالى مەديتسينالىق ينفراقۇرىلىممەن قامتاماسىز ەتۋ. ەكىنشى مىندەتى – اۋىلدىق دەنساۋلىق ساقتاۋ نىساندارىن مەديتسينا كادرلارىمەن قامتاماسىز ەتۋ. دەمەك, اۋىلدىق دەنساۋلىق ساقتاۋدى جاڭعىرتۋ ءىسى حالىقتىڭ ءومىر ءسۇرۋ ۇزاقتىعىن, الەۋمەتتىك ءال-اۋقاتىن ارتتىرۋعا سەپتىگىن تيگىزەدى.
جاڭادان اشىلعان دارىگەرلىك امبۋلاتوريا اۋىل تۇرعىندارىنا العاشقى مەديتسينالىق كومەكتى ساپالى ءارى دەر كەزىندە الۋعا مۇمكىندىك بەرەدى. اسىرەسە انالار مەن بالالار دەنساۋلىعىن ساقتاۋ, پروفيلاكتيكالىق جۇمىستار جۇرگىزۋ, اۋىل تۇرعىندارىنىڭ دەنساۋلىعىن باقىلاۋدا ۇستاۋعا بۇل نىسان اسا قاجەت. جاڭا امبۋلاتوريانىڭ العاشقى مەديتسينالىق كومەك كورسەتۋ كابينەتتەرى, پروفيلاكتيكالىق تەكسەرۋ بولمەلەرى, قولدانىلاتىن مەديتسينالىق جابدىقتارى تالاپقا ساي.
مەديتسينالىق نىساننىڭ قۇرىلىس جۇمىسىن مەردىگەر – «استانا پرەميۋم قۇرىلىس» جشس جۇرگىزسە, «دوستار قۇرىلىس توبى» جشس تەحنيكالىق قاداعالاۋ جاسادى. دارىگەرلىك امبۋلاتوريا قۇرىلىسىنا 416 ملن 971 194 تەڭگە قاراجات جۇمسالدى. مەديتسينالىق نىسان 2025 جىلى مەملەكەت باسشىسىنىڭ تاپسىرماسىن ورىنداۋ ماقساتىندا ەلىمىزدىڭ باس پروكۋراتۋراسى قايتارعان اكتيۆتەر ەسەبىنەن سالىندى. دەنساۋلىق ساقتاۋ نىسانى تاۋلىگىنە 20-دان اسا تۇرعىنعا قىزمەت ەتەدى. سونىمەن قاتار مۇندا كۇندىزگى ستاتسيونار جۇمىس ىستەيدى, وندا 10-عا جۋىق ەم ءتۇرى كورسەتىلەدى. دەنساۋلىق سالاسىنىڭ قىزمەتكەرلەرىنە بارلىق جاعداي جاسالعان. كەڭگىرلىكتەر زاماناۋي مەديتسينا جابدىعىنىڭ كومەگىنە سۇيەنە الادى.
نىساننىڭ اشىلۋ سالتاناتىندا ءوڭىر باسشىسى وبلىستا قايتارىلعان اكتيۆتەر ەسەبىنەن الەۋمەتتىك ماڭىزى بار نىسانداردىڭ كەزەڭ-كەزەڭىمەن سالىنىپ, حالىق يگىلىگىنە بەرىلىپ جاتقانىن اتاپ ءوتتى. سونداي-اق جۇيەلى جۇمىستاردىڭ جۇزەگە اسۋىنا قولداۋ كورسەتكەن باس پروكۋراتۋرا مەن وبلىس پروكۋراتۋراسىنا ريزاشىلىعىن ءبىلدىردى.
«وسى اۋىلدا مەيىربيكە بولىپ جۇمىس ىستەگەنىمە 46 جىل بولدى. ءبىرتالاي قيىن باسپالداقتان وتتىك. بۇرىن وتباسىلىق دارىگەرلىك امبۋلاتوريا عيماراتى جەكەمەنشىك ەدى. يەسى ساتىپ جىبەرگەن سوڭ جەزقازعان قالاسىنىڭ ەمحاناسىنا اۋىستىق. ودان كەيىن كەڭگىر اۋىلدىق وكرۋگىنىڭ اكىمدىگى ءوز عيماراتىنان تەگىن بولمە بەرىپ, جەتى جىل بويى جۇمىسىمىزدى سوندا جالعاستىردىق. ەندى جاڭا مەديتسينالىق عيمارات اشىلىپ, قۋانىپ جاتىرمىز», دەيدى گۇلسىم التاەۆا.
ءسويتىپ, كەڭگىر اۋىلىندا قايتارىلعان اكتيۆتەر قاراجاتى ەسەبىنەن سالىنعان جاڭا دارىگەرلىك امبۋلاتوريا ەندى حالىق يگىلىگىنە اينالادى. مەديتسينالىق نىساننىڭ اشىلۋ سالتاناتىندا ۇلىتاۋ وبلىسىنىڭ اكىمى داستان رىسپەكوۆ پەن ۇلىتاۋ وبلىسىنىڭ پروكۋرورى جاسۇلان ەلامانوۆ قۇتتىقتاۋ ءسوز سويلەپ, كەڭگىر اۋىلدىق ارداگەرلەر كەڭەسىنىڭ مۇشەسى شايمۇحامبەت نۇرىموۆ اق باتاسىن بەردى.
ۇلىتاۋ وبلىسى
