نەگىزگى وزگەرىس – بۇرىنعى «يپوتەكالىق قارىزدى وتەۋ» دەگەن تۇسىنىك «يپوتەكالىق نەسيەنىڭ نەگىزگى قارىزىن وتەۋ» دەپ وزگەرتىلدى. ياعني ەندى زەينەتاقى قاراجاتى تەك كرەديتتىڭ نەگىزگى سوماسىن جابۋعا عانا جۇمسالادى.
بۇعان دەيىن ازاماتتار زەينەتاقى جيناعىن يپوتەكانىڭ اي سايىنعى تولەمىن تولىق جابۋعا پايدالانا الاتىن. ونىڭ ىشىندە نەگىزگى قارىز, پايىزدار, كوميسسيالار جانە باسقا دا تولەمدەر قامتىلاتىن.
جاڭا ءتارتىپ بويىنشا پايىزدار مەن قوسىمشا تولەمدەر ازاماتتىڭ ءوز ەسەبىنەن تولەنەدى. ال زەينەتاقى قاراجاتى تەك نەگىزگى قارىزدى ازايتۋعا باعىتتالادى.
مىسالى, اي سايىنعى تولەم 450 000 تەڭگە بولسا, ونىڭ 200 000 تەڭگەسى نەگىزگى قارىزعا, ال 250 000 تەڭگەسى بانك پايىزدارىنا كەتەدى. ەندى زەينەتاقى تەك 200 000 تەڭگەنى جابادى, قالعان سومانى قارىز الۋشى ءوزى تولەيدى.
كەيبىر بانكتەر جاڭا ءتارتىپ بويىنشا ناقتى سحەما ەنگىزىپ جاتىر. الدىمەن كليەنت پايىزدار مەن اي سايىنعى تولەمدى ءوز قاراجاتىمەن جابۋى كەرەك. كەيىن عانا زەينەتاقى جيناعىن شەشۋگە ءوتىنىش بەرەدى. ەگەر تولەمدەر تولىق وتەلمەسە, وپەراتسيا ورىندالمايدى.
سونىمەن قاتار يپوتەكانى وتەۋ ءۇشىن جاڭا قارىز تۋرالى انىقتاما قاجەت بولادى. ونى بانك ارقىلى الىپ, ارنايى پورتالعا جۇكتەۋ كەرەك. قۇجاتتا نەگىزگى قارىزدىڭ قالدىعى ناقتى كورسەتىلۋى ءتيىس.
جالپى العاندا, جاڭا ەرەجەلەر زەينەتاقى قاراجاتىن تەك نەگىزگى قارىزدى ازايتۋعا باعىتتاپ, يپوتەكانى وتەۋ ءتارتىبىن قاتاڭداتادى.
