وتىنىمدەر 30 ساۋىرگە دەيىن «astanahub.com» پلاتفورماسىندا قابىلدانادى. باعدارلاماعا قازاقستانمەن قاتار وزبەكستان, قىرعىزستان, تاجىكستان, تۇرىكمەنستان, ازەربايجان, گرۋزيا جانە موڭعوليا ەلدەرىنىڭ ستارتاپ كوماندالارى قاتىسا الادى. ەلىمىز ورتالىق ازيادا «Google for Startups» باعدارلاماسىمەن بىرلەسىپ اكسەلەراتسيا جۇرگىزىپ وتىرعان العاشقى ءارى جالعىز ەل. بيىل «Silkway Accelerator» العاش رەت الماتى قالاسىندا, «Almaty Hub» بازاسىندا وتەدى. بۇل – مەگاپوليستىڭ ەلدەگى ىسكەرلىك جانە IT-ورتالىق رەتىندەگى ءرولىنىڭ ارتىپ كەلە جاتقانىن كورسەتەدى.
كەيىنگى ءتورت جىلدا باعدارلاماعا 1 470 ءوتىنىم ءتۇسىپ, ولاردىڭ تەك 73-ءى ىرىكتەۋدەن وتكەن. اكسەلەراتسيادان وتكەن جوبالار جالپى كولەمى 48 ميلليون دوللاردان اساتىن ينۆەستيتسيا تارتىپ, جيىنتىق باعاسى 500 ميلليون دوللاردان اسقان. قاتىسۋشىلار ءباا, تۇركيا, اقش جانە باسقا دا حالىقارالىق نارىقتارعا شىعىپ ۇلگەردى.
باعدارلاما تۇلەكتەرىنىڭ قاتارىندا «Biometric Vision», «zypl.ai», «Arlan Biotech» جانە باسقا دا تابىستى جوبالار بار. «Biometric Vision» كومپانياسىنىڭ نەگىزىن قالاۋشى الىبەك نارىمبايدىڭ ايتۋىنشا, باعدارلاما ستارتاپتارعا دۇرىس نارىق تاڭداۋعا, ءونىم ستراتەگياسىن ناقتىلاۋعا جانە حالىقارالىق دەڭگەيدە وسۋگە مۇمكىندىك بەرەدى.
«Silkway Accelerator» 12 اپتاعا ەسەپتەلگەن. باعدارلاماعا دايىن ءونىمى بار جانە ونى جاڭا نارىقتارعا شىعارۋدى كوزدەيتىن كوماندالار قاتىسا الادى. قاتىسۋشىلارعا الماتىدا تەگىن تۇرۋ, كەڭسە, سونداي-اق 100 مىڭ دوللارعا دەيىن «Google Cloud» رەسۋرستارىنا قولجەتىمدىلىك بەرىلەدى. سونىمەن قاتار ءار كومانداعا جەكە دامۋ مەنەدجەرى بەكىتىلەدى. باعدارلاما جەتەكشىلەرىنىڭ ءبىرى ەۆگەني فرولوۆ قازىرگى تاڭدا باستى ماسەلە ستارتاپتاردىڭ سانىندا ەمەس, ساپاسىندا ەكەنىن اتاپ ءوتتى. ونىڭ پىكىرىنشە, نەگىزگى قيىندىق – ءونىمدى حالىقارالىق نارىققا شىعارىپ, اۋقىمدى بيزنەس مودەل قۇرۋ. باعدارلاما سوڭىندا «Demo Day» وتەدى. بۇل كۇنى قاتىسۋشىلار ءوز جوبالارىن ينۆەستورلار مەن ۆەنچۋرلىك قورلارعا تانىستىرادى. ەڭ ۇزدىك جوبالار «Astana Hub Ventures» شورت-ليستىنە ەنىپ, ينۆەستيتسيا تارتۋ مۇمكىندىگىنە يە بولادى.
